ଭୁବନେଶ୍ବର: ପୁରୀରେ ଉଚ୍ଛେଦକୁ ନେଇ ଥମୁନି ରାଜନୀତି । ମଠ, ମନ୍ଦିର ଉଚ୍ଛେଦ ହେଉଥିବାରୁ ଶ୍ରୀକ୍ଷେତ୍ର କୁରୁକ୍ଷେତ୍ରରେ ପରିଣତ ହେଲାଣି ବୋଲି ବିରୋଧୀ କହୁଛନ୍ତି । ତେବେ ମନ୍ଦିର ସୁରକ୍ଷାକୁ ଦୃଷ୍ଟିରେ ରଖି ଉଚ୍ଛେଦକୁ ସବୁ ଦଳ ସମର୍ଥନ କରିବା ଦରକାର ଓ ଏହାକୁ ନେଇ ରାଜନୀତି ନ କରିବାକୁ ଶାସକ ଦଳ କହିଛି ।
ମଠ ମନ୍ଦିରର ଉଚ୍ଛେଦକୁ ବିରୋଧ କରି ବିଜେପି ନେତା ବିଜୟ ମହାପାତ୍ର କହିଛନ୍ତି, ‘୭ଦିନ ହେଲାଣି ଶ୍ରୀକ୍ଷେତ୍ର କୁରୁକ୍ଷେତ୍ରରେ ପରିଣତ ହୋଇଗଲାଣି । ଶ୍ରୀକ୍ଷେତ୍ରକୁ କୁରୁକ୍ଷେତ୍ରରେ ପରିଣତ କରିବାର କୌଣସି ସାମ୍ବିଧାନିକ କିମ୍ବା ମୌଳିକ ଅଧିକାର ସରକାରଙ୍କର ନାହିଁ।’ ଏହାସହ ୫୦ ପ୍ଲାଟୁନ୍ ଫୋର୍ସ ଓ ୨୨ଟି ବୁଲଡୋଜର ନେଇ ସରକାର ପୁରୀକୁ କାହିଁକି ଯାଇଛନ୍ତି ବୋଲି ବିଜୟ ପ୍ରଶ୍ନ କରିଛନ୍ତି।
ଆତଙ୍କବାଦୀ ଶିବିର ଉପରେ ଆକ୍ରମଣ କଲା ଭଳି ମଠ ମନ୍ଦିର ଉପରେ ଆକ୍ରମଣ ଆରମ୍ଭ କରିଦେଇଛନ୍ତି। ସରକାର କ’ଣ କରିବେ ସ୍ପଷ୍ଟ କରୁ ନାହାନ୍ତି ବୋଲି ସେ କହିଛନ୍ତି ।
ଅନ୍ୟପକ୍ଷରେ କଂଗ୍ରେସ ମୁଖପାତ୍ର ପଞ୍ଚାନନ କାନୁନଗୋ ମଧ୍ୟ ସମାନ ଅଭିଯୋଗ ଆଣି ଅର୍ଥ ବିନିଯୋଗ ନେଇ ପ୍ରଶ୍ନ କରିଛନ୍ତି। ନବକଳେବର ଉଦାହରଣ ଦେଇ ସରକାରଙ୍କୁ କାଠଗଡକୁ ଟାଣିବାକୁ ସେ ଚେଷ୍ଟା କରିଛନ୍ତି।
ସେପଟେ ଏହା ଶ୍ରୀମନ୍ଦିର ସୁରକ୍ଷା ଦୃଷ୍ଟିରୁ କରାଯାଉଛି । ତେଣୁ ଅଯଥା ରାଜନୀତି ନକରି ସବୁ ଦଳ ଏହାକୁ ସମର୍ଥନ କରିବାକୁ କହିଛନ୍ତି ଆଇନ ମନ୍ତ୍ରୀ ପ୍ରତାପ ଜେନା ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ ଓ ତପନ ଦାସ, ଇଟିଭି ଭାରତ
