ଭୁବନେଶ୍ବର: ରାଜଧାନୀ ଏୟାରଫିଲ୍ଡ ଥାନା ସୁନ୍ଦରପଦା ଅଞ୍ଚଳରେ ଗୋଷ୍ଠୀ ସଂଘର୍ଷକୁ ନେଇ ହତ୍ୟା ମାମଲା । ହତ୍ୟାକାଣ୍ଡକୁ ତିନି ଦିନ ବିତିଥିଲେ ସୁଦ୍ଧା ପୋଲିସର ହାତ ଖାଲି । ବାହାରେ ଖୁଲମଖୁଲା ବୁଲିଛି ହତ୍ୟା ଅଭିଯୁକ୍ତ । ପୋଲିସ ଉପରେ ଶାସକ ଦଳର ଚାପ ଯୋଗୁଁ ଅଭିଯୁକ୍ତକୁ ଧରିବାରେ ପୋଲିସ ବିଫଳ ହୋଇଥିବା ଅଭିଯୋଗ ହୋଇଛି । ପୋଲିସର ନିଷ୍କ୍ରିୟତା ବିରୁଦ୍ଧରେ ଏବଂ ଅଭିଯୁକ୍ତକୁ ଗିରଫ ଦାବିରେ ସୋମବାର ଏୟାରଫିଲ୍ଡ ଥାନା ଘେରାଉ କରିଛନ୍ତି ଶତାଧିକ ଲୋକେ ।
ବିକ୍ଷୋଭକାରୀଙ୍କ ଅଭିଯୋଗ, ପୋଲିସର ଉପଯୁକ୍ତ କାର୍ଯ୍ୟାନୁଷ୍ଠାନ ଅଭାବ ଯୋଗୁଁ ହତ୍ୟାକାରୀ ବାହାରେ ବୁଲୁଛି । ଏପରିକି ବାଇକ ଯୋଗେ ପୁରୀରୁ ଭୁବନେଶ୍ବର ଘୁରି ବୁଲୁଥିବାବେଳେ ପୋଲିସ ତାକୁ ଧରିବାରେ ଫେଲ୍ ହୋଇଛି । ପୋଲିସର ଏ ଦିଗରେ ନିଷ୍କ୍ରିୟତା ନେଇ ଲୋକଙ୍କ ମଧ୍ୟରେ ଆକ୍ରୋଶ ପ୍ରକାଶ ପାଇଛି । ମୃତକଙ୍କୁ ନ୍ୟାୟ ଦାବିରେ ସୁନ୍ଦରପଦା ଅଞ୍ଚଳର ଶତାଧିକ ଲୋକେ ଏୟାରଫିଲ୍ଡ ଥାନା ଆଗରେ ନାରାବାଜି କରିଛନ୍ତି ।
ସୂଚନାଯୋଗ୍ୟ, ଗତ ୩୧ ତାରିଖ ରାତିରେ ଏୟାରଫିଲ୍ଡ ଥାନା ସୁନ୍ଦରପଦାରେ ଖେଳପଡିଆ ମଝିରେ ଏହି ହତ୍ୟାକାଣ୍ଡ ଘଟିଥିଲା । ଭୋଜିଭାତ ଆସର ଚାଲିଥିବା ବେଳେ ଗୋଷ୍ଠୀ ସଂଘର୍ଷକୁ ନେଇ ଦୀପକ ରାଉତ ନାମକ ଜଣେ ବ୍ୟକ୍ତିଙ୍କୁ ପିଟି ପିଟି ହତ୍ୟା କରାଯାଇଥିଲା । ଅଥଚ ହତ୍ୟାକାଣ୍ଡକୁ ତିନି ଦିନ ବିତିଥିଲେ ସୁଦ୍ଧା ଅଭିଯୁକ୍ତକୁ ଧରିବାରେ ବିଫଳ ହୋଇଛି ପୋଲିସ ।
ଭୁବେନଶ୍ବରରୁ ତାପସ ପରିଡା, ଇଟିଭି ଭାରତ
