ଭୁବନେଶ୍ବର: ରାଜ୍ୟର ବିଭିନ୍ନ ଘରୋଇ ହସ୍ପିଟାଲରେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ବାବଦରେ ପ୍ରାୟ ୨୫ ରୁ ୩୦ କୋଟି ଟଙ୍କାର ଅର୍ଥ ବାକି ପଡିଛି। ଯାହା ଦ୍ବାରା ଘରୋଇ ହସ୍ପିଟାଲମାନେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରୁ ହିତାଧିକାରୀଙ୍କୁ ବାଦ ଦେବାକୁ ବାଧ୍ୟ ହୋଇଛନ୍ତି। ଏହାକୁ ନେଇ ସରକାର ମଧ୍ୟ ନୀରବ ରହିଥିବାରୁ ସାଧାରଣ ହିତାଧିକାରୀ ମାନେ ଅସୁବିଧାର ସମ୍ମୁଖୀନ ହେଉଛନ୍ତି ।
ଘରୋଇ ହସ୍ପିଟାଲ ମାଲିକ ସଂଘ ପକ୍ଷରୁ କରାଯାଇଥିବା ଅଭିଯୋଗ ଅନୁସାରେ ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାରେ ୨୦୧୭ ମସିହାରୁ ପ୍ରାୟ ୩୦୦ରୁ ଉର୍ଦ୍ଧ୍ବ ହସପିଟାଲର ପ୍ରାୟ ୩୦ କୋଟି ଟଙ୍କା ବକେୟା ରହିଛି । ବିଭିନ୍ନ ସମୟରେ ଚିକିତ୍ସାଳୟ ଗୁଡିକ ଏ ବାବଦରେ ଅର୍ଥ ପୈଠ କରିବାକୁ ସରକାରଙ୍କୁ ଚିଠି ଲେଖିଥିଲେ ମଧ୍ୟ ବିଭାଗୀୟ କର୍ତ୍ତୃପକ୍ଷ ଏହାର ଜବାବ ଦେଇନାହାନ୍ତି । ଯେଉଁଥିପାଇଁ ହସ୍ପିଟାଲ ଗୁଡିକରେ ହିତାଧିକାରୀମାନଙ୍କୁ ଏହି ସୁବିଧାରୁ ବଞ୍ଚିତ ହେବା ପାଇଁ ବାଧ୍ୟ କରିଛି।
ଘରୋଇ ହସ୍ପିଟାଲ ଗୁଡିକରେ ସୁରକ୍ଷା, ଚିକିତ୍ସାରେ ଖର୍ଚ୍ଚକୁ ବଢ଼େଇବା, ହସ୍ପିଟାଲ ଗୁଡିକର ପଞ୍ଜିକରଣ ଏବଂ ନବୀକରଣ ନେଇ ସରକାରଙ୍କ ଦୃଷ୍ଟି ଆକର୍ଷଣ କରିବାକୁ ରାଜ୍ୟ ସ୍ବାସ୍ଥ୍ୟ ମନ୍ତ୍ରୀଙ୍କୁ ଏକ ଚିଠି ପ୍ରଦାନ କରାଯାଇଛି ବୋଲି ଓଡିଶା ଘରୋଇ ହସ୍ପିଟାଲ ଆସୋସିଏସନ ସଭାପତି ଡ଼. ଅଜୟ ମିଶ୍ର କହିଛନ୍ତି। ଘରୋଇ ମେଡିକାଲ ସଂଘ କହିଛି, ଯଦି ଏହି ବାକି ରହିଥିବା ଅର୍ଥକୁ ତୁରନ୍ତ ପଇଠ ନ କରାଯାଏ ସେମାନେ ହିତାଧିକାରୀଙ୍କୁ ସେବା ପ୍ରଦାନ କରାଯାଉଥିବା ଯୋଜନାକୁ ବନ୍ଦ କରିଦିଆଯିବ । ସରକାରଙ୍କ ପକ୍ଷରୁ ଅର୍ଥ ପଇଠ କରିବାକୁ ଆଗ୍ରହ ପ୍ରକାଶ କରାଯାଉନାହିଁ ଯେଉଁଥିପାଇଁ ଘରୋଇ ହସ୍ପିଟାଲ କର୍ତ୍ତୃପକ୍ଷ କ୍ଷତି ସହୁଛନ୍ତି।
ତେବେ ଘରୋଇ ହସ୍ପିଟାଲ ଆସୋସିଏସନ ଆଶା ରଖିଛି ଯେ ସରକାର ଏ ବାବଦରେ ଆଲୋଚନା ପାଇଁ ଆଗକୁ ଆସିବେ ଏବଂ ଖୁବଶୀଘ୍ର ସୁଫଳ ମିଳିବ । ଯାହା ଦ୍ବାରା ଘରୋଇ ହସ୍ପିଟାଲ ସଂଘ ଏବଂ ହିତାଧିକାରୀ ଲାଭାନ୍ବିତ ହୋଇପାରିବେ। କିନ୍ତୁ ସରକାର ଆଲୋଚନାକୁ ନ ଆସିବା ପର୍ଯ୍ୟନ୍ତ ଏହାର ସ୍ଥିତି ଅସ୍ପଷ୍ଟ ରହିଛି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
