ଭୁବନେଶ୍ବର: ବାହାର ରାଜ୍ୟରେ ଫସି ରହିଥିବା ଓଡିଆ ଶ୍ରମିକଙ୍କୁ ବର୍ତ୍ତମାନ ସମୟରେ ଓଡିଶା ଫେରାଇ ଆଣିବା ଏକ ଭୁଲ ନିଷ୍ପତ୍ତି ବୋଲି କହି ରାଜ୍ୟ ସରକାରଙ୍କୁ ଟାର୍ଗେଟ କରିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ । ସେ ଏହାକୁ ନେଇ ପ୍ରଶ୍ନ କରିଛନ୍ତି କି ଲକଡାଉନ ଖୋଲିବା ପରେ ବସ ଓ ଟ୍ରେନରେ ଆସିଲେ କ’ଣ ସଂକ୍ରମଣ ହେବ ନାହିଁ କି ?
ବର୍ତ୍ତମାନ ସମୟରେ ସେମାନଙ୍କୁ ରାଜ୍ୟକୁ ଫେରାଇ ଆଣିବା ବଦଳରେ ଯେଉଁଠାରେ ସେମାନେ ଅଛନ୍ତି, ସେଠାରେ ସେମାନଙ୍କୁ ରଖି ଖାଦ୍ୟପେୟର ସୁବ୍ୟବସ୍ଥା କରିବାର ଆବଶ୍ୟକତା ରହିଛି । ସେମାନଙ୍କୁ 5 ହଜାର ଟଙ୍କା ଆର୍ଥିକ ସହାୟତା ଦିଆଯାଉ ବୋଲି ମଧ୍ୟ ନିରଞ୍ଜନ ପରାମର୍ଶ ଦେଇଛନ୍ତି । ଅନ୍ୟପଟେ ଥରେ ଶ୍ରମିକମାନେ ଓଡିଶା ଫେରିଲେ ସେମାନଙ୍କ ମଧ୍ୟରୁ ଅଧା ଆଉ ଫେରିବେ ନାହିଁ । ତେବେ ଏଠି ସେମାନେ କରିବେ କ’ଣ ? ଫଳରେ ଏଠି ବି ଚାକିରି ଅଭାବରେ ଆଗକୁ ଅବସ୍ଥା ଆହୁରି ସାଂଘାତିକ ହେବ ।
ତେବେ ଦିଲ୍ଲୀ, ପଶ୍ଚିମବଙ୍ଗ, ମହାରାଷ୍ଟ୍ର ଓ ମଧ୍ୟପ୍ରଦେଶ ପ୍ରଭୃତି ରାଜ୍ୟରୁ ଶ୍ରମିକ ଓଡିଶା ଫେରିଲେ ଅବସ୍ଥା କ’ଣ ହେବ କହି ହେବ ନାହିଁ ବୋଲି କହି ଭୟ ପ୍ରକାଶ କରିଛନ୍ତି ନିରଞ୍ଜନ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
