ଭୁବନେଶ୍ବର: ୨୦୨୧-୨୨ ରବି ଋତୁରେ ଚାଷୀମାନଙ୍କଠାରୁ ଧାନ କିଣିବା ନିମନ୍ତେ ପ୍ରଶାସନିକ ପ୍ରସ୍ତୁତି ଚୂଡ଼ାନ୍ତ ହୋଇଛି । ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଏ ନେଇ ଏକ ରାଜ୍ୟସ୍ତରୀୟ ଧାନ ସଂଗ୍ରହ ବୈଠକ ଅନୁଷ୍ଠିତ ହୋଇଛି । ଧାନ କିଣା ହେବାର ୪୮ ଘଣ୍ଟା ମଧ୍ୟରେ ଦେୟ ପୈଠ କରିବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି ।
ଲୋକସେବା ଭବନରୁ ଡ଼ିଜିଟାଲ୍ ମୋଡ୍ରେ ଅନୁଷ୍ଠିତ ହୋଇଛି ଏହି ବୈଠକ । ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ପ୍ରମୁଖ ଶାସନ ସଚିବ ବୀର ବିକ୍ରମ ଯାଦବ ବର୍ତ୍ତମାନ ପର୍ଯ୍ୟନ୍ତ କରାଯାଇଥିବା ପ୍ରଶାସନିକ ଓ ବୈଷୟିକ ପ୍ରସ୍ତୁତି ବିଷୟ ଆଲୋଚନା ପାଇଁ ଉପସ୍ଥାପନ କରିଛନ୍ତି । ସାଟେଲାଇଟ୍ ଚିତ୍ର ଏବଂ କ୍ଷେତ୍ରସ୍ତରୀୟ ସତ୍ୟାପନ ମାଦ୍ୟମରେ ଯୋଗ୍ୟ ବିବେଚିତ ସମସ୍ତ ଚାଷୀଙ୍କଠାରୁ ଧାନ କିଣିବାକୁ ମୁଖ୍ୟ ଶାସନ ସଚିବ ନିର୍ଦ୍ଦେଶ ଦେଇଛନ୍ତି । ସମଗ୍ର ପ୍ରକ୍ରିୟାକୁ ଚାଷୀମାନଙ୍କ ନିମନ୍ତେ ସରଳ ଓ ସୁଗମ କରିବା ସହ ଧାନ କିଣାର ୨୪ ରୁ ୪୮ ଘଣ୍ଟା ମଧ୍ୟରେ ଦେୟ ପୈଠ କରିବାକୁ ସେ ନିର୍ଦ୍ଦେଶ ଦେଇଛନ୍ତି । ଚଳିତ ରବିଋତୁରେ ଅଧିକ ସଂଖ୍ୟକ ମହିଳା ସ୍ଵୟଂ ସହାୟକ ଗୋଷ୍ଠୀମାନଙ୍କ ମାଧ୍ୟମରେ ଧାନ ସଂଗ୍ରହ କରିବାକୁ ମଧ୍ୟ ମୁଖ୍ୟ ଶାସନ ସଚିବ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି ।
ଧାନ ସଂଗ୍ରହ ଓ ଦେୟ ପୈଠ ପାଇଁ ଯଥାକ୍ରମେ ପି ପାସ୍ ଏବଂ ଆଇ.ଏଫ୍.ଏମ୍.ଏସ୍. ଅନ୍ଲାଇନ୍ ବ୍ୟବସ୍ଥା ଗ୍ରହଣ କରିବାକୁ ମଧ୍ୟ ସେ କହିଛନ୍ତି । ଚଳିତ ବର୍ଷ ରବିଋତୁରେ ୧୪ ଲକ୍ଷ ମାଟ୍ରିକ୍ ଟନ୍ ଧାନ ସଂଗ୍ରହ କରିବାକୁ ବୈଠକରେ ସ୍ଥିର ହୋଇଛି । ମେ ୧ ତାରିଖ ଠାରୁ ଜୁନ୍ ୩୦ ତାରିଖ ମଧ୍ୟରେ ଧାନ ସଂଗ୍ରହ କରାଯିବ । ତେବେ ପ୍ରତି ଜିଲ୍ଲା ପାଇଁ ପ୍ରଯୁଜ୍ୟ ଧାନ ସଂଗ୍ରହ ଦିନ ସଂପୃକ୍ତ ଜିଲ୍ଲାସ୍ତରୀୟ ଧାନ ସଂଗ୍ରହ ବୈଠକରେ ସ୍ଥିର କରାହେବ । ଇତି ମଧ୍ୟରେ ସମସ୍ତ ଜିଲ୍ଲାର ବୈଠକ ଅନୁଷ୍ଠିତ ହୋଇ ଦିନ ଧାର୍ଯ୍ୟ କରାଯାଇଛି । ସର୍ବ ପ୍ରଥମେ ମେ ୧୩ ତାରିଖ ଦିନ ସମ୍ବଲପୁର ଜିଲ୍ଲାରେ ଧାନ କିଣା ଆରମ୍ଭ ହେବ । ରବି ଧାନର କ୍ୱିଣ୍ଟାଲ୍ ପିଛା ସର୍ବନିମ୍ନ ସହାୟକ ମୂଲ୍ୟ ୧୯୪୦ ଟଙ୍କାରେ ଧାର୍ଯ୍ୟ କରାଯାଇଛି । ୧୭ ଟି ଜିଲ୍ଲାର ଜଳସେଚିତ ଅଂଚଳର କୃଷକମାନଙ୍କ ଠାରୁ ଜଳସେଚନ ତଥ୍ୟନୁଯାୟୀ ଏକର ପିଛା ୨୪ ରୁ ୨୬ କ୍ଵିଣ୍ଟାଲ୍ ଧାନ ସଂଗ୍ରହ କରାଯିବ ।
ବିଭାଗୀୟ ପ୍ରମୁଖ ଶାସନ ସଚିବ କହିଛନ୍ତି ଯେ, ଚଳିତ ରବିଋତୁରେ ଧାନ ବିକ୍ରି ପାଇଁ ୨.୫୮ ଲକ୍ଷ ଚାଷୀ ୭.୬୨ ଲକ୍ଷ ଏକର ଜମି ପଞ୍ଜିକରଣ କରିଛନ୍ତି । ଗତ ୨୦୨୦-୨୧ ବର୍ଷରେ ସମୁଦାୟ ୨.୩୩ ଲକ୍ଷ ଚାଷୀ ନିଜର ୭.୬୦ ଲକ୍ଷ ଏକର ଜମି ରବି ଧାନ ବିକ୍ରି ନିମନ୍ତେ ପଞ୍ଜିକରଣ କରିଥିଲେ । ଚଳିତ ବର୍ଷ ଅଧିକ ସଂଖ୍ୟକ କ୍ଷୁଦ୍ର ଓ ନାମକୁ ମାତ୍ର ଚାଷୀ ପଞ୍ଜୀକୃତ କରିଛନ୍ତି । ୨୦୨୦ - ୨୧ ବର୍ଷରେ ୪.୫୧ ଲକ୍ଷ ନାମକୁ ମାତ୍ର ଚାଷୀ ପଞ୍ଜୀକୃତ ହୋଇଥିବା ବେଳେ ଚଳିତ ବର୍ଷ ଏହା ୬.୨୨ ଲକ୍ଷକୁ ବୃଦ୍ଧି ପାଇଛି । ସେହିପରି କ୍ଷୁଦ୍ର ଚାଷୀଙ୍କ ପଞ୍ଜିକରଣ ମଧ୍ୟ ଚଳିତ ବର୍ଷ ୪.୫୬ ଲକ୍ଷରୁ ଚଳିତ ବର୍ଷ ୪.୭୦ କୁ ବୃଦ୍ଧି ପାଇଛି । ପଂଜୀକୃତ ଚାଷୀଙ୍କ ମଧ୍ୟରେ ପ୍ରାୟ ୨୨, ୨୨୮ ଜଣ ଭାଗ ଚାଷୀ ଅଛନ୍ତି । ଧାନ କିଣାରେ ଅଂଶଗ୍ରହଣ ପାଇଁ ପଞ୍ଜୀକୃତ କରିଥିବା ୧୨୨ ଟି ମହିଳା ସ୍ବୟଂସହାୟକ ଗୋଷ୍ଠୀଙ୍କୁ ଏଥିରେ ସାମିଲ କରାଯିବ । ଗତ ବର୍ଷ ରବିଋତୁରେ ୧୦୧ ଟି ମହିଳା ସ୍ବୟଂସହାୟକ ଗୋଷ୍ଠୀ ସାମିଲ ହୋଇଥିଲେ ।
ପ୍ରତି ଜିଲ୍ଲାରେ ଅଧିକ ସଂଖ୍ୟକ ମହିଳା ସ୍ବୟଂସହାୟକ ଗୋଷ୍ଠୀଙ୍କୁ ସାମିଲ କରିବା ପାଇଁ ମୁଖ୍ୟ ଶାସନ ସଚିବ ଜିଲ୍ଲାସ୍ତରୀୟ ଧାନ ସଂଗ୍ରହ କମିଟିର ଅଧ୍ୟକ୍ଷ ତଥା ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛନ୍ତି । ପି-ପାସ୍ ଅନ୍ଲାଇନ୍ ବ୍ୟବସ୍ଥା ମାଧ୍ୟମରେ ଧାନ କିଣାଯିବ ଏବଂ ଆଇ.ଏଫ୍.ଏମ୍.ଏସ୍. ବ୍ୟବସ୍ଥା ଭିତ୍ତିରେ ଚାଷୀଙ୍କୁ ଦେୟ ପୈଠ କରାଯିବ । କୃଷକମାନଙ୍କୁ ଧାନ କିଣା ବିଷୟରେ ଏସ୍.ଏମ୍.ଏସ୍ ମାଧ୍ୟମରେ ଜଣାଇ ଦିଆଯିବ । କେବେ ଧାନ ବିକ୍ରୀ କରିବେ କେତେ ଧାନ ବିକ୍ରି କଲେ ଏବଂ ଧାନର ଦାମ ପୈଠ ଆଦି ବାବଦରେ କୃଷକମାନଙ୍କୁ ଏସ୍.ଏମ୍.ଏସ୍ ବାର୍ତ୍ତା ପଠାଯିବ । ମହିଳା ସ୍ବୟଂ ସହାୟକ ଗୋଷ୍ଠୀଙ୍କ ଛଡା ପ୍ରାୟ ୮୧୭ଟି ପ୍ରାଥମିକ କୃଷି ସମବାୟ ସମିତି ଧାନ ସଂଗ୍ରହରେ ସାମିଲ ହେବେ ।
