ଭୁବନେଶ୍ବର: ଦଳରୁ ଇସ୍ତଫା ଦେଇଛନ୍ତି କଂଗ୍ରେସର କାର୍ଯ୍ୟକାରୀ ସଭାପତି ପ୍ରଦୀପ ମାଝୀ । ପ୍ରଦୀପ ବିଜେଡିରେ ମିଶିବା ଲାଗି ଚର୍ଚ୍ଚା ଜୋର ଧରିଛି । ହେଲେ ସେ ବିଜେଡିରେ ମିଶିବେ ନା ଅନ୍ୟ କିଛି ବିକଳ୍ପ ବ୍ୟବସ୍ଥା କରିବେ ଏ ନେଇ ଚର୍ଚ୍ଚା ଲାଗି ରହିଛି । ପ୍ରଦୀପଙ୍କ ଇସ୍ତଫା ନେଇ ପ୍ରତିକ୍ରିୟା ରଖିଛନ୍ତି ପଞ୍ଚାୟତିରାଜ ମନ୍ତ୍ରୀ ତଥା ବିଜେଡି ନେତା ପ୍ରତାପ ଜେନା । ଆମ ନେତା ନବୀନ ପଟ୍ଟନାୟକଙ୍କ ଆଦର୍ଶରେ ଅନୁପ୍ରାଣିତ ହୋଇ ଲୋକଙ୍କ ସେବା କରିବାକୁ ଆସିଲେ ବିଜେଡି ସ୍ବାଗତ କରିବ ବୋଲି କହିଛନ୍ତି ପ୍ରତାପ ।
ପ୍ରତାପ କହିଛନ୍ତି ଯେ, ଅଧିକରୁ ଅଧିକ ଲୋକଙ୍କ ଲାଗି କାମ କରିବାକୁ ପ୍ରଦୀପଙ୍କ ଲକ୍ଷ୍ୟ । କଂଗ୍ରେସରେ ସେ ଏହା କରିପାରି ନଥିବାରୁ ଦଳ ଛାଡ଼ିଛନ୍ତି । ସେ ଯେଉଁ ଦଳରେ ଥିଲେ, ସେଥିରେ ଲୋକଙ୍କ ଲାଗି କାମ କରିବାର ସୁଯୋଗ ନାହିଁ ବୋଲି ସେ ଅନୁଭବ କରିଥିବେ । ସେହିପରି ଭାରତ ବର୍ଷରେ ଭାରତୀୟ ଜନତା ପାର୍ଟିର ବହୁ ବଦନାମ ରହିଛି । ପେଟ୍ରୋଲ, ଡିଜେଲ ଓ ଗ୍ୟାସ ମହଙ୍ଗା ହୋଇଛି । ନିତ୍ୟ ବ୍ୟବହାର ଜିନିଷ ଦର ବଢିଛି । ତେଣୁ ସେ ବିଜେପିକୁ ଯିବେ ବୋଲି ଆଶା କରୁନାହିଁ ।
