ଭୁବନେଶ୍ବର: ଆସୁଛି ବାତ୍ୟା ଜଓ୍ବାଦ(Cyclone Jawad) । ଆସନ୍ତାକାଲି ( ଶନିବାର) ପୁରୀ ଉପକୂଳର ସ୍ଥଳଭାଗ ଛୁଇଁପାରେ ସାମୁଦ୍ରିକ ଝଡ଼ । ତେବେ ଏହାକୁ ନେଇ ରାଜ୍ୟ ସରକାର ସମ୍ପୂର୍ଣ୍ଣ ପ୍ରସ୍ତୁତ । ବାତ୍ୟା ନେଇ ପ୍ରତାପ ଜେନାଙ୍କ ପ୍ରତିକ୍ରିୟା ରଖିଛନ୍ତି । ସମ୍ଭାବ୍ୟ ବାତ୍ୟା ମୁକାବିଲା ନେଇ ରାଜ୍ୟ ସରକାର ସମ୍ପୂର୍ଣ୍ଣ ପ୍ରସ୍ତୁତ ବୋଲି କହିଛନ୍ତି ପଞ୍ଚାୟତରାଜ ମନ୍ତ୍ରୀ ପ୍ରତାପ ଜେନା । ପ୍ରଭାବିତ ହେବାକୁ ଥିବା ବ୍ଲକର ତଳିଆ ଅଞ୍ଚଳରୁ ଲୋକଙ୍କୁ ସ୍କୁଲ ଏବଂ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତରଣ କରିବାକୁ ଉଦ୍ୟମ ଆରମ୍ଭ କରାଯାଇଛି ।
ବାତ୍ୟା ଆଶ୍ରୟ ସ୍ଥଳୀରେ ଖାଇବା , ପିଇବା ପାଣି ସୁବିଧା ଯୋଗାଇ ଦିଆଯିବ । ସେ ଦିଗରେ ବିଭାଗ ତରଫରୁ ପଦକ୍ଷେପ ନିଆଯାଉଛି । ଅତ୍ୟଧିକ ବର୍ଷା ଓ ବାତ୍ୟା ହେଲେ ପ୍ରଭାବିତ ଲୋକଙ୍କୁ ରିଲିଫ ସାମଗ୍ରୀ ବଣ୍ଟନ କରାଯିବ । ଜରୁରୀ ସ୍ଥାନରେ ଓଭର ହେଡ ଟ୍ୟାଙ୍କ ଏବଂ ପାନୀୟ ଜଳ ପ୍ରକଳ୍ପ ରହିଛି । ସେଠାରେ ବିଦ୍ୟୁତ ବିଚ୍ଛିନ୍ନ ହେଲେ ମଧ୍ୟ ଜେନେରେଟର ଜରିଆରେ ପାନୀୟ ଜଳ ଯୋଗାଇ ଦିଆଯିବ ବୋଲି ପଞ୍ଚାୟତରାଜ ମନ୍ତ୍ରୀ ପ୍ରତାପ ଜେନା କହିଛନ୍ତି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
