ଭୁବନେଶ୍ବର: କ୍ରାଇମ କ୍ଲିନ ପାଇଁ ନୂଆ ଟେକନିକ୍ । ଫୋକସରେ ରାଜଧାନୀର ବସ୍ତି । ବଢୁଥିବା ସଂଗଠିତ ଅପରାଧ । ଷ୍ଟ୍ରିଟ କ୍ରାଇମର ମୁଖ୍ଯ ସୁତ୍ରଧରଙ୍କୁ ରୋକିବା ନେଇ ମୁମ୍ବାଇ ଓ ଦିଲ୍ଲୀ ଢାଞ୍ଚାରେ ହେବ ଅପରେସନ କ୍ରାଇମ କ୍ଲିନ । ନୂଆ ବର୍ଷରେ ନୂଆ ଷ୍ଟ୍ରାଟେଜିରେ କାମ ଆରମ୍ଭ କରିଛି କମିଶନରେଟ ପୋଲିସ ।
ନୂଆ ବର୍ଷରେ କମିଶନରେଟ ପୋଲିସ ବସ୍ତିକୁ ଫୋକସ କରି ସମସ୍ତ ଥାନା ନଜରରେ ରଖାଯାଇଛି । ଅର୍ଥାତ କେଉଁ ଥାନା ଅଞ୍ଚଳରେ କେତେ ବସ୍ତି ସେସବୁର ଲିଷ୍ଟ କରି ସେସବୁ ଥାନାର ଜଣେ ଜଣେ ଅଫିସର, ହାବିଲଦାର, କନଷ୍ଟେବଳଙ୍କୁ ଗୋଟେ ଗୋଟେ ବସ୍ତିର ଦାୟିତ୍ବ ଦିଆଯାଇଛି । ବସ୍ତିରେ ବାହାର ଅପରାଧି ପଶିଲେ ବା ସେଠାକାର ବେକାର ଯୁବକ ଯୁବତୀ କ୍ରାଇମରେ ପାଦ ଦେଲେ ସବୁ ସୂଚନା ପାଇବ ପୋଲିସ । ଏଥିପାଇଁ ଥାନାର କର୍ମଚାରୀଙ୍କୁ ସୋର୍ସ ତିଆରି କରିବାକୁ ନିର୍ଦେଶ ଦିଆଯାଇଛି । ବସ୍ତିର ଲୋକଙ୍କ ସହ ସମ୍ପର୍କ ସ୍ଥାପନ ସହ ବସ୍ତି ଲୋକଙ୍କ ନିକଟତର ହେବାକୁ କୁହାଯାଇଛି । ଅର୍ଥାତ ପୋଲିସକୁ କ୍ରାଇମ ଓ କ୍ରିମିନାଲକୁ କମାଇବାକୁ ହେଲେ ବସ୍ତିର ଆରମ୍ଭ ହେଉଥିବା ଅପରାଧ ଉପରେ ରୋକ ଲଗାଇବାକୁ ପଡିବ। କାରଣ ଗତ ବର୍ଷ ରେକର୍ଡ ସଂଖ୍ଯକ ଛିନତାଇ ଭୁବନେଶ୍ବରରେ ହୋଇଛି । ଯେଉଁଥିରେ ଅଧିକାଂଶ ଅପରାଧି ବସ୍ତିରେ ରହି ଅପରେଟ କରୁଥିବାବେଳେ ଅଧିକାଶଂରେ ବସ୍ତିପିଲା ମଧ୍ଯ ସାମିଲ ହୋଇଛନ୍ତି।
ଅପରେସନ ସ୍ଲମ ଭିଜିଟରେ ଫୋକସ ଦେଇଛି ପୋଲିସ । ଏହି କ୍ରମରେ ବସ୍ତିରେ ଦିଆଯାଉଥିବା ଭଡାଟିଆଙ୍କ ତଥ୍ଯ ଘର ମାଲିକ ସେହି ଅଞ୍ଚଳରେ ଦାୟିତ୍ବରେ ଥିବା ପୋଲିସ କର୍ମଚାରୀକୁ ଦେବେ । ବସ୍ତିର କିଛି ପିଲାଙ୍କୁ ପୋଲିସ ସହାୟତା ଦେବେ। ପ୍ରତି ସପ୍ତାହରେ ବସ୍ତିରେ ମିଟିଂ କରି ଲୋକଙ୍କ ସୁବିଧା ଅସୁବିଧା ଉପରେ ନଜର ରଖିବେ । ଫଳରେ ବସ୍ତି ଲୋକଙ୍କ ସହ ପୋଲିସର ଭାବବିନିମୟ ରହିଲେ ବସ୍ତିରେ ଛୋଟ ଅପରାଧ ବି ପୋଲିସ ଜାଣିପାରିବ ବୋଲି ଭୁବନେଶ୍ବରରେ ନୂଆ ବର୍ଷରେ ଆରମ୍ଭ ହୋଇଥିବା ନୂଆ ଅପରେସନ ନେଇ ସୂଚନା ଦେଇଛନ୍ତି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
