ଭୁବନେଶ୍ବର: କେହି ଜଣେ ବି ଯୋଗ୍ୟ ହିତାଧିକାରୀ ଖାଦ୍ୟ ସୁରକ୍ଷା ଆଇନରୁ ବାଦ ପଡିବେ ନାହିଁ । ଏହାସହ ଅଯୋଗ୍ୟ ହିତାଧିକାରୀଙ୍କୁ ବାଦ ଦିଆଯିବ । ଏଥିପାଇଁ କେନ୍ଦ୍ର ସରକାରଙ୍କ ନିର୍ଦ୍ଦେଶ ପରେ ରାଜ୍ୟ ସରକାର କଡା ପଦକ୍ଷେପ ଗ୍ରହଣ କରୁଛନ୍ତି । ରାସନ କାର୍ଡକୁ ଆଧାର କାର୍ଡ ସହିତ ଲିଙ୍କ କରାଯାଉଛି ।
ଏହାଦ୍ବାରା ଯୋଗ୍ୟ ଅଯୋଗ୍ୟ ହିତାଧିକାରୀ ଜଣାପଡିବେ । ପ୍ରଥମେ ଏମଡିଏମ ହେଲା ଆଧାର ଲିଙ୍କ । ଏବେ ରାସନ କାର୍ଡ ପାଇଁ ଚାଲିଛି ଆଧାର ଲିଙ୍କ । ସରକାରଙ୍କ ଉଦ୍ଦେଶ୍ୟ ହେଉଛି ରାସନ କାର୍ଡରେ ସ୍ବଚ୍ଛତା ଆଣିବା ବୋଲି ଯୋଗାଣ ମନ୍ତ୍ରୀ କହିଛନ୍ତି । ଏହାସହ ଅଯୋଗ୍ୟ ହିତାଧିକାରୀଙ୍କୁ ବାଦ ଦେବା ସହ ଯେଉଁମାନେ ଦୁଇଟି ଆଧାର କାର୍ଡ କରିଛନ୍ତି ସେମାନଙ୍କୁ ଚିହ୍ନଟ କରିବା ସହଜ ହେବ ବୋଲି ଖାଦ୍ୟ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କହିଛନ୍ତି ।
ସରକାରଙ୍କ ଏହି ପଦକ୍ଷେପକୁ ନେଇ ବର୍ଷିଛନ୍ତି ବିରୋଧୀ । ରାସନ କାର୍ଡ ପ୍ରାରମ୍ଭରୁ ଏହାର ସ୍ବଚ୍ଛତା ନେଇ ବିରୋଧୀ ଅଭିଯୋଗ କରିଥିଲେ ମଧ୍ୟ ସେତେବେଳେ ସରକାର ଏହାକୁ ମାନିନଥିଲେ । ଏବେ ସରକାର କେମିତି ଏହାକୁ ମୁକାବିଲା କରିବେ ବୋଲି କହିଛନ୍ତି ବିରୋଧୀ ।
ଏହାସହ ଦାବି କରିଛନ୍ତି ତୁରନ୍ତ ଅଯୋଗ୍ୟ ହିତାଧିକାରୀଙ୍କୁ ବାଦ ଦେବାସହ ଚଞ୍ଚକତା କରି କାର୍ଡ ନେଇଥିବା ବ୍ୟକ୍ତିଙ୍କୁ ଦଣ୍ଡ ଦିଆଯାଉ ।
ଭୁବନେଶ୍ବରରୁ ତପନ ଦାଶ ଓ ସଞ୍ଜୀବ ରାୟ, ଇଟିଭି ଭାରତ
