ଭୁବନେଶ୍ୱର: ବର୍ତ୍ତମାନ ପୁରା ଦେଶରେ ନିର୍ବାଚନ ବାତାବରଣ ଦେଖିବାକୁ ମିଳୁଛି । 17ତମ ଲୋକସଭା ନିର୍ବାଚନ ପାଇଁ ଦଳ ଦଳ ମଧ୍ୟରେ ଚାଲିଛି ନାନା ପ୍ରକାର ପ୍ରସ୍ତୁତି । ଏଥିରୁ ବାଦ ପଡିନାହାଁନ୍ତି କଳାକାର ମଧ୍ୟ । ଯେଉଁଠାରେ କିଛି ଦିନ ହେବ ବଲିଉଡ ଷ୍ଟାର୍ସ ନିଜ ନିଜ ମନ ପସନ୍ଦୀୟ ଦଳରେ ସାମିଲ ହୋଇଥିବାର ଖବର ଶୁଣିବାକୁ ମିଳୁଥିଲା । ସେହିଠାରେ ଆଜି ଓଲିଉଡର ଅଭିନେତା ଅଖିଳ ପଟ୍ଟନାୟକ ଓ ସେକ୍ସୀ ଅଭିନେତ୍ରୀ ବିଦୁସ୍ମିତା ଦାଶ୍ ମନ୍ତ୍ରୀ ମଧ୍ୟ ରାଜନୀତିରେ ପଦାର୍ପଣ କରିଛନ୍ତି । ଏହା ସହିତ ମହାକାଳପଡାର ଅବସରପ୍ରାପ୍ତ ସରକାରୀ କର୍ମଚାରୀ ପଦ୍ମନାଭ ଚୌଧୁରୀ ମଧ୍ୟ ପଦ୍ମ ଧରିଛନ୍ତି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଏବଂ ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହାଙ୍କ ନୀତି ଆଦର୍ଶରେ ଅନୁପ୍ରାଣିତ ହୋଇ ମହାକାଳପଡାର ଅବସରପ୍ରାପ୍ତ ସରକାରୀ କର୍ମଚାରୀ ପଦ୍ମନାଭ ଚୌଧୁରୀ , ସିନେ ଅଭିନେତା ଅଖିଳ ପଟ୍ଟନାୟକ ଏବଂ ସିନେ ଅଭିନେତ୍ରୀ ବିଦୁସ୍ମିତା ମନ୍ତ୍ରୀ କେନ୍ଦ୍ରମନ୍ତ୍ରୀଧର୍ମେନ୍ଦ୍ର ପ୍ରଧାନ, ରାଷ୍ଟ୍ରୀୟ ଉପସଭାପତି ଓ ରାଷ୍ଟ୍ରୀୟ ପ୍ରବକ୍ତାବୈଜୟନ୍ତ ପଣ୍ଡା, ବରିଷ୍ଠ ନେତା ବିଶ୍ୱଭୂଷଣ ହରିଚନ୍ଦନ, ରାଜ୍ୟ ପ୍ରଭାରୀ ଅରୁଣ ସିଂହ, ବରିଷ୍ଠ ନେତା ଡା. ଦାମୋଦର ରାଉତ,ବିଜୟ ମହାପାତ୍ରଙ୍କ ଉପସ୍ଥିତିରେ ଆନୁଷ୍ଠାନିକ ଭାବେ ବିଜେପିରେ ସାମିଲ ହୋଇଛନ୍ତି ।
ପ୍ରକାଶ ଥାଉକି ବିଦୁସ୍ମିତା ଓଲିଉଡର ଚର୍ଚ୍ଚିତ ଅଭିନେତ୍ରୀଙ୍କ ମଧ୍ୟରୁ ଅନ୍ୟତମ । ନିଜର ସେକ୍ସୀ ଅନ୍ଦାଜ ପାଇଁ ସେ ସବୁବେଳେ ଚର୍ଚ୍ଚାର ବିଷୟ ପାଲଟିଥାଆନ୍ତି । ଆଲବମର ରାଣୀ କୁହାଯାଇଥିବା ବିଦୁସ୍ମିତା ଏବେ ରାଜନୀତିରେ ନିଜର ସ୍ଥାନ ସ୍ଥାପନ କରିପାରିବେ କି ନାହିଁ ତାହା ଦେଖିବାକୁ ବାକି ରହିଲା ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
