ନୂଆଦିଲ୍ଲୀ: ପୂର୍ବତନ ପ୍ରଶାସକ ତଥା ବିଶିଷ୍ଟ ଲେଖକ ତରୁଣକାନ୍ତି ମିଶ୍ର ପାଇବେ ସମ୍ମାନଜନକ ସାହିତ୍ୟ ଏକାଡେମୀ ପୁରସ୍କାର । କ୍ଷୁଦ୍ରଗଳ୍ପ ‘ଭାସ୍ବତୀ’ ପାଇଁ ତରୁଣକାନ୍ତିଙ୍କୁ ମିଳିବ ଚଳିତ ବର୍ଷର ଏହି ପୁରସ୍କାର । ସାହିତ୍ୟ ଏକାଡେମୀ ପକ୍ଷରୁ ଏନେଇ ବୁଧବାର ବିଧିବଦ୍ଧ ଭାବେ ଘୋଷଣା ହୋଇଛି ।
ବୁଧବାର ନିଆଦିଲ୍ଲୀଠାରେ ସାହିତ୍ୟ ଏକାଡେମୀ ପକ୍ଷରୁ ଅନୁଷ୍ଠିତ ବୈଠକରେ ଓଡିଆ ସମେତ 23ଟି ଭାରତୀୟ ଭାଷାରେ ଚଳିତ ବର୍ଷ ଏହି ପୁରସ୍କାର ପ୍ରଦାନ କରାଯିବ ବୋଲି ପ୍ରକାଶ ପାଇଛି । ପୁରସ୍କାର ପାଇଁ ମନୋନୀତ ହୋଇଥିବା ପୁସ୍ତକଗୁଡିକ ମଧ୍ୟରେ 7ଟି କବିତା ଗନ୍ଥ, 4ଟି ଉପନ୍ୟାସ, 6ଟି ଖୁଦ୍ରଗଳ୍ପ, 3ଟି ପ୍ରବନ୍ଧ ଏବଂ ଗୋଟିଏ ଲେଖାଏଁ ନନ୍-ଫିକ୍ସନ, ଆତ୍ମଜୀବନୀ ଏବଂ ଜୀବନୀ ଗନ୍ଥ ରହିଛି ।
ଆସନ୍ତା ୨୦୨୦ ଫେବ୍ରୁଆରି ୨୫ ତାରିଖରେ ନୂଆଦିଲ୍ଲୀ ଠାରେ ଏକ ସ୍ୱତନ୍ତ୍ର ଉତ୍ସବରେ ପୁରସ୍କାର ବିଜେତାମାନଙ୍କୁ 1 ଲକ୍ଷ ଟଙ୍କାର ନଗଦ ରାଶି ସହିତ ଏକାଡେମୀ ପୁରସ୍କାର ପ୍ରଦାନ କରାଯିବ ।
ଚଳିତ ବର୍ଷ ଓଡିଆ ଭାଷା ପାଇଁ ପୁରସ୍କାର ବିଜେତାଙ୍କୁ ବାଛିବାକୁ ଯେଉଁ 3 ଜଣିଆ କମିଟି ଏକାଡେମୀ ପକ୍ଷରୁ ଗଠନ ହୋଇଥିଲା ସେଥିରେ, ମାଳବିକା ରାୟ, ଫନି ମହାନ୍ତି ଏବଂ ପ୍ରଫୁଲ କୁମାର ମହାନ୍ତି ସାମିଲ ହୋଇଥିଲେ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
