ଭୁବନେଶ୍ବର: ସଂପ୍ରତି କୋଭିଡ-19 ପରିପ୍ରେକ୍ଷୀରେ ଲକଡାଉନ ଚାଲିଥିବାରୁ ଏହାଦ୍ବାରା ସବୁଠାରୁ ବେଶି ପ୍ରଭାବିତ ହୋଇଛନ୍ତି କୋମଳମତି ଶିଶୁ, ବାଳକ ବାଳିକା ଏବଂ ଛାତ୍ରଛାତ୍ରୀ । ସ୍କୁଲଗୁଡ଼ିକ ବନ୍ଦ ରହିଥିବାରୁ ପିଲାମାନେ ପୂରା ସମୟ ଘରେ ରହୁଛନ୍ତି । ତେଣୁ ଶିଶୁ, କିଶୋର ଏବଂ ଛାତ୍ରଛାତ୍ରୀମାନଙ୍କୁ ଏହି ଲକଡାଉନ ସମୟରେ ସୃଜନଶୀଳ କାର୍ଯ୍ୟରେ ନିୟୋଜିତ ରଖିବା ତଥା ସେମାନଙ୍କ ଅନ୍ତର୍ନିହିତ ପ୍ରତିଭାର ବିକାଶ ନିମନ୍ତେ ଓଡ଼ିଶା ସରକାରଙ୍କ ମହିଳା ଓ ଶିଶୁ ବିକାଶ ଏବଂ ମିଶନ ଶକ୍ତି ବିଭାଗ ଏବଂ କ୍ରୀଡ଼ା ଓ ଯୁବ ସେବା ବିଭାଗ ତଥା ୟୁନିସେଫର ମିଳିତ ସହଯୋଗରେ ‘ମୋ ପ୍ରତିଭା’ ଶୀର୍ଷକ ଏକ ଅନଲାଇନ ପ୍ରତିଯୋଗିତାର ଆୟୋଜନ କରୁଛନ୍ତି ।
5-18 ବର୍ଷ ବୟସର ଶିଶୁ ତଥା କିଶୋର କିଶୋରୀମାନଙ୍କ ପାଇଁ ‘ଲକଡାଉନ ସମୟରେ ଘର ଭିତରେ ରହିବାର ଅନୁଭବ’ ଓ ‘ଜଣେ ଯୁବ ନାଗରିକ ହିସାବରେ କୋଭିଡ-19 ସମୟରେ ମୋର କର୍ତ୍ତବ୍ୟ’ ପ୍ରସଙ୍ଗ ଉପରେ ଚିତ୍ରାଙ୍କନ, ପୋଷ୍ଟର ତିଆରି, ସ୍ଳୋଗାନ ରଚନା, କ୍ଷୁଦ୍ରଗଳ୍ପ (500 ଶବ୍ଦ ମଧ୍ୟରେ) ଓ କବିତା ରଚନା ପ୍ରତିଯୋଗିତା କରାଯିବ । ପଠାଯାଇଥିବା ବିଷୟ ସଂପୂର୍ଣ୍ଣ ନିଜସ୍ବ ହେବା ଆବଶ୍ୟକ ।
ଏହି ପ୍ରତିଯୋଗିତାରେ 5-10 ବର୍ଷ, 11-16 ବର୍ଷ ଏବଂ 16-18 ବର୍ଷ 3ଟି ବର୍ଗରେ କରାଯିବ । ବିଜେତାଙ୍କ ନାମ ପ୍ରତି ଗୁରୁବାର ଘୋଷଣା କରାଯିବ । ସମସ୍ତ ବିଷୟ ପ୍ରତିଦିନ ସକାଳ 10ଟାରୁ ସନ୍ଧ୍ୟା 6ଟା ମଧ୍ୟରେ ଅନଲାଇନରେ ପଠାଇବାକୁ ହେବ । ଓଡ଼ିଶା ସରକାର ଏବଂ ୟୁନିସେଫ ତରଫରୁ ବିଜେତାମାନଙ୍କୁ ମାନପତ୍ର ପ୍ରଦାନ କରାଯିବା ସହ ଶ୍ରେଷ୍ଠ ନିର୍ବାଚିତ ପ୍ରସଙ୍ଗଗୁଡ଼ିକ କୋଭିଡ-19 ସୂଚନା ପ୍ରଚାର ପ୍ରସାର ଅଭିଯାନରେ ବ୍ୟବହୃତ ହେବ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
