ଭୁବନେଶ୍ବର: ଓଡ଼ିଶାରେ ଅଣ୍ଟା ସଳଖିବ କଂଗ୍ରେସ । ଏନେଇ ଏଆଇସିସି ପାଖରୁ ଆସିଛି ମନ୍ତ୍ର । ଓଡ଼ିଶାରେ ଦଳ କିପରି ମଜବୁତ ହେବ ଆଉ କର୍ମୀଙ୍କ ମନରେ ନୂଆ ଉତ୍ସାହ ସଞ୍ଚରିତ ହେବ ସେ ନେଇ ମାଷ୍ଟରପ୍ଲାନ ଓ ପ୍ରୋଗ୍ରାମ ପ୍ରସ୍ତୁତ କରିଛି ଏଆଇସିସି । ଏହାକୁ ଫଳପ୍ରଦ କରିବା ପାଇଁ ରାଜ୍ୟ କଂଗ୍ରେସର ମାନସମନ୍ଥନ । ନିର୍ବାଚନ ବିପର୍ଯ୍ୟୟ ପରେ ହାଇକମାଣ୍ଡ ପୁଣି ସଭାପତି ଭାବରେ ନିରଞ୍ଜନ ପଟ୍ଟନାୟକଙ୍କ ଉପରେ ଆସ୍ଥା ପ୍ରକଟ କରିବା ପରେ ଓପିସିସି ସଭାପତି କଂଗ୍ରେସ ଭବନରେ ପ୍ରଥମ ବୈଠକ ଡାକି ଆଲୋଚନା କରିଛନ୍ତି ।
ନିରଞ୍ଜନ ପଟ୍ଟନାୟକ ପିସିସି କମିଟିର ପୁନର୍ଗଠନ ହେବା ନେଇ ସୂଚନା ଦେଇଛନ୍ତି । ଏଆଇସିସିର ନିର୍ଦ୍ଦେଶ କ୍ରମେ ପିସିସିର ପୁନର୍ଗଠନ କରାଯିବ ବୋଲି ସେ କହିଛନ୍ତି । ଏନେଇ ଚଳିତ ମାସରୁ ପୁନର୍ଗଠନ କାମ ତ୍ବରାନ୍ବିତ କରାଯିବ ବୋଲି ସେ କହିଛନ୍ତି ।
ଏହାସହ ଗତ ନିର୍ବାଚନରେ ଯେଉଁ ମାନେ ଦଳ ପାଇଁ କାମ କରିଛନ୍ତି, ସେମାନଙ୍କୁ ନେଇ ଛୋଟ କମିଟି ଗଠନ ପାଇଁ AICC ନିର୍ଦ୍ଦେଶ ଦେଇଥିବା ସେ କହିଛନ୍ତି । ତଳୁ ଉପର ପର୍ଯ୍ୟନ୍ତ ସମସ୍ତ କମିଟିର ପୁନଃ ଗଠନ ହେବ । ସେହିଭଳି ଜୋନ୍ କମିଟି ଆଉ ରହିବ ନାହିଁ । ଏହା ବଦଳରେ ପୂର୍ବ ଭଳି ବ୍ଲକ କମିଟି ରହିବ । ଏହାଛଡା ବିଜେପୁର ପାଇଁ କଂଗ୍ରେସ ଦେଢ ମାସ ଆଗରୁ ରଣନୀତି ପ୍ରସ୍ତୁତ କରିଛି ବୋଲି କହିଛନ୍ତି ନିରଞ୍ଜନ । କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ରଙ୍କ ନେତୃତ୍ବରେ ଏକ କମିଟି ଗଠନ କରାଯାଇଥିବା ସେ କହିଛନ୍ତି ।
ଅନ୍ୟପଟେ କଂଗ୍ରେସ ବିଧାୟକ ତାରାପ୍ରସାଦ ବାହିନୀପତି ଏନେଇ ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି, ଲକ୍ଷେ ବିଲେଇରେ ମୂଷା ମରେ ନାହିଁ । ଜୋନାଲ କମିଟି ସଭାପତି, କାର୍ଯ୍ୟକାରୀ ସଭାପତିଙ୍କ ଆବଶ୍ୟକତା ନାହିଁ । ରାଜ୍ୟ ସଭାପତିଙ୍କ ଉପରେ ବିଶ୍ବାସ ରଖିଲେ କଂଗ୍ରେସ ଉଧେଇବ, ନହେଲେ ନାହିଁ । ଏତେ AICC ସମ୍ପାଦକ, କାର୍ଯ୍ୟକାରୀ ସଭାପତିଙ୍କ ପାଇଁ ଦଳ ବଡ କ୍ଷତିର ସାମ୍ନା କରିଛି । ଏଆଇସିସିର ଚାରି ସମ୍ପାଦକ ତୁଛାକୁ ଆସିଥିଲେ । ପରିଣତି ଟିକଟ ପାଇଁ ଗୋଷ୍ଠୀ କନ୍ଦଳକୁ ଏମାନେ ହିଁ ବଢାଇଦେଲେ । ଜୋନ୍, ଜିଲ୍ଲା ଓ ରାଜ୍ୟସ୍ତରରେ କାର୍ଯ୍ୟକାରୀ ସଭାପତି ରହିବାର କୌଣସି ଆବଶ୍ୟକତା ନାହିଁ । ଏହା ପୁରା ପ୍ରହସନ ଥିଲା। କଂଗ୍ରେସ ଦଳର ବ୍ୟବସ୍ଥାରେ ସମ୍ପୂର୍ଣ୍ଣ ପରିବର୍ତ୍ତନ ଦରକାର ତେଣୁ ଗୋଟିଏ ବିଲେଇ ରହିବ ଭଲ ମୂଷା ଧରିବ ବୋଲି କହିଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
