ଭୁବନେଶ୍ବର: ବିଜେଡି ସରକାର ପଞ୍ଚମ ଇନିଂସର ତୃତୀୟ ବର୍ଷ ଚାଲିଛି । ଚଳିତ ବର୍ଷ ପଞ୍ଚାୟତ ନିର୍ବାଚନ, ପୌର ନିର୍ବାଚନରେ ବିଜେଡିକୁ ବଡ଼ ସଫଳତା ମିଳିବା ପରେ ନବୀନଙ୍କ ମନ୍ତ୍ରୀମଣ୍ଡଳର ରୂପରେଖ ବଦଳିବା ନେଇ ଚର୍ଚ୍ଚା ଜୋର ଧରିଛି । ପୂର୍ବରୁ 22 ବର୍ଷ ଶାସନରେ ନବୀନ ପ୍ରତି ଥର ମନ୍ତ୍ରୀମଣ୍ଡଳରେ ପରିବର୍ତ୍ତନ କରିଛନ୍ତି । ପଞ୍ଚମ ପାଳିରେ କୋଭିଡ ସଂକ୍ରମଣ ଥିଲା, ବୋଧ ହୁଏ ମନ୍ତ୍ରୀଙ୍କ କାର୍ଯ୍ୟଦକ୍ଷତା ମାପିବାରେ ବିଳମ୍ବ ହୋଇଛି । ତେବେ ଏଥର କୋଭିଡ କଟକଣା ହଟି ଥିବାରୁ ଦଳର ସୁପ୍ରିମୋ ମନ୍ତ୍ରୀମଣ୍ଡଳର ଅଦଳ ବଦଳ କରିପାରନ୍ତି ବୋଲି ଚର୍ଚ୍ଚା ହେଉଛି।
ତେବେ ଚଳିତ ଥର ଅନେକ ମନ୍ତ୍ରୀ ବିବାଦୀୟ ହୋଇପଡିଥିବା ସତ୍ତ୍ୱେ ନବୀନ ନୀରବତା ଅବଲମ୍ବନ କରିଛନ୍ତି । 2022 ର ପ୍ରଥମାର୍ଦ୍ଧରେ ଦୁଇ ଦୁଇଟି ନିର୍ବାଚନ ଅତିକ୍ରମ କରିଛି ଦଳ । ପଞ୍ଚାୟତ ଓ ପୌର ନିର୍ବାଚନରେ କିଛି ମନ୍ତ୍ରୀଙ୍କ ଦକ୍ଷତା ଏବଂ ପାରିବା ପଣିଆ ଉପରେ ପ୍ରଶ୍ନ ଉଠିଛି । ମନ୍ତ୍ରୀମାନଙ୍କ କାର୍ଯ୍ୟଦକ୍ଷତା ମାପିବା ପାଇଁ ସୁଯୋଗ ମିଳିଛି ବୋଲି ଅନୁମାନ କରାଯାଉଛି । ସେପଟେ 2024ରେ ସାଧାରଣ ନିର୍ବାଚନ ଆସୁଥିବାରୁ ମନ୍ତ୍ରୀ ମଣ୍ଡଳ ଅଦଳବଦଳ ନେଇ ଦୃଢ ବିଶ୍ବାସ କରାଯାଉଛି ।
ସାଙ୍ଗଠନିକ କ୍ଷେତ୍ରରେ ଯେଉଁମାନେ ପାରଙ୍ଗମ ସେମାନଙ୍କୁ ମନ୍ତ୍ରୀ ପଦରୁ ହଟାଇ ସାଙ୍ଗଠନିକ ଦାୟିତ୍ୱ ଦେଇ ପାରନ୍ତି ନବୀନ । ବିଭିନ୍ନ ଦଳରୁ ବିଜେଡିରେ ସାମିଲ ହୋଇଥିବା ଅନେକ ନେତାଙ୍କୁ ଥଇଥାନ କରିବା ପାଇଁ ବିଚାରକୁ ମଧ୍ୟ ନେଇ ପାରନ୍ତି । ତେବେ ଏଭଳି ସ୍ଥଳେ ରାଜନୀତି ସମୀକ୍ଷକଙ୍କ କହିବା ଅନୁସାରେ ପଞ୍ଚାୟତ ଓ ପୌର ନିର୍ବାଚନ ସଫଳତା ପରେ ନବୀନ ଏବେ ମନ୍ତ୍ରୀମାନଙ୍କ ଦକ୍ଷତା ଏବଂ ବିଭାଗ ବାରି ସମୀକ୍ଷା କରି ପାରନ୍ତି । ତା' ପରେ ଅଦଳବଦଳ ହେବାର ସମ୍ଭାବନା ରହିଛି । ସେପଟେ ବିଜେଡି ବରିଷ୍ଠ ନେତ୍ରୀ ତଥା ଉପସଭାନେତ୍ରୀ ପ୍ରମିଳା ମଲ୍ଲିକ ମନ୍ତ୍ରୀମଣ୍ଡଳ ଅଦଳବଦଳ କଥା ଆମେ କିଛି ଜାଣି ନାହୁଁ, କେବଳ ମୁଖ୍ୟମନ୍ତ୍ରୀ ହିଁ ଜାଣିଛନ୍ତି ବୋଲି କହିଛନ୍ତି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
