ଭୁବନେଶ୍ୱର: ରାଜ୍ୟରେ ଚର୍ଚ୍ଚା ପାଲଟିଛି ନର୍ସ ନିହାରିକା ପାତ୍ର ମୃତ୍ୟୁ ଘଟଣା । ଜଗତିସିଂହପୁର ଜିଲ୍ଲା ବିଲୁଆଖାଇ ନଦୀ ପଠାରୁ ମିଳିଛି ମୃତଦେହ । ଏହି ଘଟଣା ପୁନର୍ବାର ମାଧବୀଲତାର ଲୋମହର୍ଷଣକାରୀ ମୃତ୍ୟୁକୁ ମନେ ପକାଇଦେଇଛି । ଯାହାକୁ ନେଇ ଆରମ୍ଭ ହୋଇଯାଇଛି ରାଜନୀତି । ରାଜ୍ୟରେ ଆଇନ୍ ଶୃଙ୍ଖଳା ବ୍ୟବସ୍ଥା ବିପର୍ଯ୍ୟୟ ରହିଥିବା ବେଳେ ମହିଳା ମାନେ ଏଠି ଅସୁରକ୍ଷିତ ବୋଲି କହି ରାଜ୍ୟ ସରକାରକୁ ଆକ୍ଷେପ କରିଛି ବିରୋଧି ବିଜେପି ।
ସେପଟେ ଗୁରୁବାର ବିଜେପି ମହିଳା ମୋର୍ଚ୍ଚାର ଏକ ପ୍ରତିନିଧି ଦଳ ନିହାରିକାଙ୍କ ପରିବାର ଲୋକଙ୍କୁ ଭେଟିବ । ରାଜ୍ୟ ବିଜେପି ମହିଳା ମୋର୍ଚ୍ଚା ସଭାନେତ୍ରୀ ପ୍ରଭାତୀ ପରିଡାଙ୍କ ନେତୃତ୍ବରେ ବାଲିପାଟଣା ବ୍ଲକ ଭିଙ୍ଗାରପୁର ଗସ୍ତ କରିବ ଏହି ପ୍ରତିନିଧି ଦଳ । ଏହି ଟିମରେ ରହିଛନ୍ତି ରାଜ୍ୟ ସଂପାଦିକା ଲେଖାଶ୍ରୀ ସାମନ୍ତ ସିଂହାର, ପୂର୍ବତନ ମନ୍ତ୍ରୀ ସୁରମା ପାଢୀ ଓ ବିଧାୟିକା କୁସୁମ ଟେଟେ ।
ପ୍ରତିନିଧି ଦଳ ସକାଳ ୧୦ ଟାରୁ ଦଳୀୟ କାର୍ଯ୍ୟାଳୟରୁ ବାହାରି ଭିଙ୍ଗାରପୁରସ୍ଥିତ ମୃତ ନିହାରିକାଙ୍କ ପରିବାର ସଦସ୍ୟଙ୍କୁ ଭେଟିବେ । ପରେ ମୃତକଙ୍କ ମୃତଦେହ ମିଳିଥିବା ବିଲୁଆଖାଇ ନଦୀ ପଠା ଏବଂ ନିହାରିକା କାର୍ଯ୍ୟ କରୁଥିବା କଟକସ୍ଥିତ ନର୍ସିଂହୋମରେ ପହଞ୍ଚି ତଦନ୍ତ କରିବେ । ଶେଷରେ ମହିଳା ମୋର୍ଚ୍ଚାର ଏହି ପ୍ରତିନିଧି ଦଳ କଟକରେ ପୋଲିସ ଡିଜିଙ୍କୁ ସାକ୍ଷାତ କରିବାର କାର୍ଯ୍ୟକ୍ରମ ମଧ୍ୟ ରହିଛି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
