ଭୁବନେଶ୍ବର: ଜାନୁଆରୀ ମାସର କୋଭିଡ ଗାଇଡଲାଇନ ଜାରି କରିଛନ୍ତି ସ୍ବତନ୍ତ୍ର ରିଲିଫ୍ କମିଶନର । ପୂର୍ବଭଳି ଜାନୁଆରୀ ମାସରେ ସହରାଞ୍ଚଳରେ ଲାଗିବ ନାଇଟ କର୍ଫ୍ୟୁ । ରାତି ୧୦ଟାରୁ ସକାଳ ୫ଟା ପର୍ଯ୍ୟନ୍ତ ବଳବତ୍ତର ରହିବ ନାଇଟ କର୍ଫ୍ୟୁ । ତା ସହିତ ଜାନୁଆରୀରେ ପିକ୍ନିକ୍, ମେଳା, ପ୍ରଦର୍ଶନୀ ଓ ଭିଡ଼ ଉପରେ କଟକଣା ଜାରି କରାଯାଇଛି । ଜାନୁଆରୀ ୧ ତାରିଖ ସକାଳ ୫ଟାରୁ କଟକଣା ଲାଗୁ ହେବ ।
- ରାଜ୍ୟକୁ ଫେରିଲା ନାଇଟ କର୍ଫ୍ୟୁ
- ସହରାଞ୍ଚଳରେ ରାତି ୧୦ରୁ ସକାଳ ୫ ଯାଏଁ କଟକଣା
- ସକାଳ ୫ରୁ ରାତି ୧୦ଟା ଯାଏଁ ଖୋଲିବ ସବୁ ଦୋକାନ ବଜାର
ଖାଲି ସେତିକି ନୁହେଁ ଦୋକାନରେ ଏବଂ ବାହାରେ ସଠିକ୍ ସାମାଜିକ ଦୂରତା ଅବଲମ୍ବନ କରିବେ ଗ୍ରାହକ । ଭୁବନେଶ୍ୱର ଏବଂ ଝାଡ଼ସୁଗୁଡା ବିମାନବନ୍ଦର ପାଇଁ ମଧ୍ୟ ନିର୍ଦ୍ଦେଶାବଳୀ ଜାରି ହୋଇଛି । ବିମାନ ବନ୍ଦରେ ପହଞ୍ଚୁଥିବା ଯାତ୍ରୀଙ୍କ RTPCR ପରୀକ୍ଷା କରାଯିବ । ସମସ୍ତ ଯାତ୍ରୀଙ୍କ ଥର୍ମାଲ୍ ସ୍କ୍ରିନିଂ କରାଯିବ । ସ୍କ୍ରିନିଂ ସମୟରେ ଲକ୍ଷଣାତ୍ମକ ଥିଲେ ବୋଲି ଜଣାପଡିଥିବା ଯାତ୍ରୀମାନଙ୍କୁ ତୁରନ୍ତ ଅଲଗା କରି ସ୍ୱାସ୍ଥ୍ୟ ପ୍ରୋଟୋକଲ ଅନୁଯାୟୀ ଚିକିତ୍ସା ସୁବିଧାକୁ ନିଆଯିବ । ଯଦି କୌଣସି ଯାତ୍ରୀ କୋଭିଡ ପଜିଟିଭ ଚିହ୍ନଟ ହୁଅନ୍ତି ତେବେ ସେମାନଙ୍କର କଣ୍ଟାକ୍ଟ ଟ୍ରେସିଂ କରାଯିବ ।
ଭୁବେନଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
