ଭୁବନେଶ୍ବର: ଏଣିକି ଟ୍ରାଫିକ ନିୟମ ଉଲ୍ଲଙ୍ଘନ କଲେ ଖସିବା ମୁସ୍କିଲ । ଅଯଥାରେ ଟ୍ରାଫିକ ପୋଲିସ ସହ କରିପାରିବେ ନାହିଁ ଯୁକ୍ତି । ନିୟମ ଉଲ୍ଲଙ୍ଘନ କରିଥିଲେ କ୍ୟାମେରା କହିବ ସତ । କାରଣ ଲାଗୁ ହୋଇଛି ଟିଭିଡିଏସ ସିଷ୍ଟମ ଅର୍ଥାତ ଟ୍ରାଫିକ ଭାଓଲେଟର ଡିଟେକ୍ଟର ସିଷ୍ଟମ ।
ସିଗନାଲରେ ଜେବ୍ରା ଲାଇନ ଅତିକ୍ରମ କଲେ, ରେଡ ଲାଇଟ ଅତିକ୍ରମ କଲେ, ଟ୍ରିପଲ ରାଇଡ ବା ବିନା ହେଲମେଟ ଓ ସିଟ୍ ବେଲଟ, ଓଭରଲୋଡିଂ ଠୁ ଆରମ୍ଭ କରି ସ୍ପିଡି ଡ୍ରାଇଭିଂ ଆଦି ସମସ୍ତ ଘଟଣା ଉପରେ ନଜର ରଖିବ କ୍ୟାମେରା । ସିସି କ୍ୟାମେରାରେ ଜାଣିହେବ ନିୟମ ଉଲ୍ଲଙ୍ଘନର କଥା । ସଙ୍ଗେ ସଙ୍ଗେ ଫାଇନ ନ ଦେଲେ ଘରେ ପହଞ୍ଚିବ ନୋଟିସ ।
କାରଣ ଅଟୋମେଟିକ ନମ୍ବର ପ୍ଲେଟ ରିଡରରେ ଜଣାପଡିଯିବ, କେମିତି ଉଲ୍ଲଙ୍ଘନ କରିଛନ୍ତି ଚ୍ରାଫିକ ନିୟମ ? କେତେ ଦେବେ ଜୋରିମାନା ? ତେବେ ସଙ୍ଗେ ସଙ୍ଗେ ଜୋରିମାନା ନ ଦେଇପାରିଲେ କମିସନରେଟ କାର୍ଯ୍ୟାଳୟ କାଉଣ୍ଟରରେ ଜମା କରିପାରିବେ ଚାଲାଣ ଟଙ୍କା । ଫାଇନ ଦେବାରେ ବିଳମ୍ବ କଲେ ସୁଧ ସହ ଦେବେ ଫାଇନ । ଏହାସହ ରୋଡ ଟ୍ୟାକ୍ସ ଜମା ବେଳେ ଦେବେ ଫାଇନ । ଏଥର ଟ୍ରାଫିକ ଉଲ୍ଲଙ୍ଘନରୁ ଖସି ନଯିବାକୁ ଏମିତି ହୋଇଛି ବ୍ୟବସ୍ଥା।
ଥରେ ଟ୍ରାଫିକ ଉଲ୍ଲଙ୍ଘନ କରିବା ପରେ, ଦ୍ବିତୀୟ ଥର ଏପରି କଲେ ଦ୍ବିଗୁଣା ହେବ ଜୋରିମାନା ଆଦାୟ । ତେବେ ପ୍ରତ୍ୟେକ ଦିନ ୫୦ରୁ ୧୦୦ ନିୟମ ଉଲ୍ଲଙ୍ଘନକାରୀଙ୍କୁ କ୍ୟାମେରା ଜରିଆରେ ଠାବ କରାଯାଇ ଘରକୁ ପଠାଯାଉଛି ନୋଟିସ୍ । ରୁପାଲି, ଏଜି ଛକ ପରି ୮ଟି ସ୍ଥାନରେ ରହିଛି ଟିଭିଡିଏସ ସିଷ୍ଟମ ବା ଟ୍ରାଫିକ ଭାଓଲେଟର ଡିଟେକ୍ସନ ସିଷ୍ଟମ । ରବିବାର ଠାରୁ କଡାକଡି ଲାଗୁ ହେବ ନିୟମ ।
ତେବେ ଡକ୍ୟୁମେଣ୍ଟ ଯାଞ୍ଚ ପରେ କୋହଳ ହେବ ଫାଇନ । ନଚେତ୍ ଚାଲାଣ ନିଶ୍ଚୟ କଟିବ । ଟ୍ରାଫିକ ଉଲ୍ଲଙ୍ଘନକାରୀ ଓ ଟ୍ରାଫିକ ନିୟମ ଉପରେ ବିଶେଷ ଫୋକସ ଦିଆଯାଇଥିବା କହିଛନ୍ତି ପୋଲିସ କମିସନର । ଅନ୍ୟପଟେ ଏଯାବତ ୧୫ ପ୍ରତିଶତ ଦୁର୍ଘଟଣା କମିଥିବା ବେଳେ, ୨୪ ଘଣ୍ଟା ମଧ୍ୟରେ ମଦ୍ୟପାନ କରି ଗାଡି ଚଳାଇବା କାରଣରୁ ୧୪୦ ଜଣ ମଦ୍ୟପ ଡ୍ରାଇଭର ଗିରଫ ହୋଇଥିବା ଓଡିଶା ପୋଲିସ ଟ୍ବିଟର ପେଜରେ ସୂଚନା ଦିଆଯାଇଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
