ଭୁବନେଶ୍ବର: ବିଭିନ୍ନ ଦିଗରୁ ସମାଲୋଚନାର ଶିକାର ହେବା ପରେ ସ୍ବତନ୍ତ୍ର ରିଲିଫ କମିଶନର ଜାରି କରିଛନ୍ତି ନୂଆ ନିର୍ଦ୍ଦେଶାବଳୀ । ଏହି ନୂଆ ଗାଇଡଲାଇନ ଅନୁଯାୟୀ ସମସ୍ତ କୋରୋନା ମୃତକଙ୍କ ଶେଷକୃତ୍ୟ ସସମ୍ମାନେ ସମ୍ପନ୍ନ ହେବା ନେଇ ସ୍ପଷ୍ଟ କରାଯାଇଛି । ଏଥିରେ ପରିବାର ସଦସ୍ୟ ଚାହିଁଲେ ସାମିଲ ହୋଇପାରିବେ । କେବଳ ସେତିକି ନୁହେଁ ଆଇସୋଲେସନରୁ ବାହାରିବା ବେଳେ ହିଁ ମୃତ ଦେହକୁ ଦେଖିପାରିବେ ଓ ମୃତଦେହକୁ ସଠିକ୍ ଢଙ୍ଗରେ ପରିବହନ କରାଯିବ ବୋଲି ଗାଇଡଲାଇନରେ ଉଲ୍ଲେଖ ରହିଛି ।
ସୂଚନା ଅନୁଯାୟୀ କୋରୋନା ମୃତକଙ୍କ ଶେଷକୃତ୍ୟକୁ ନେଇ ଅନେକ ସମାଲୋଚନା ସୃଷ୍ଟି ହୋଇଥିଲା । ଯାହାର ସମାଧାନ ପାଇଁ ଜାରି ହୋଇଛି ନୂଆ ଗାଇଡଲାଇନ । ଏହି ନୂଆ ଗାଇଡଲାଇନ ଅନୁଯାୟୀ କୋରୋନା ମୃତକଙ୍କ ଶେଷକୃତ୍ୟ ସମୟରେ ପରିବାର ଲୋକେ ଶ୍ମଶାନରେ ଉପସ୍ଥିତ ରହିପାରିବେ । ସାମାଜିକ ଦୂରତା ବଜାୟ ରଖିବା ସହ ମାସ୍କ ପିନ୍ଧି ସେମାନେ ଉପସ୍ଥିତ ରହିବା ନେଇ ନିର୍ଦ୍ଦେଶ ଦିଆଯାଇଛି ।
ତେବେ ମୃତଦେହକୁ କୌଣସି ପରିବାର ସଦସ୍ୟ ଛୁଇଁ ପାରିବେ ନାହିଁ ବୋଲି ସ୍ପଷ୍ଟ ହୋଇଥିବା ବେଳେ ମୃତଦେହ ସତ୍କାର ପରେ ସେମାନେ ଅସ୍ଥି ପାଉଁଶ ନେଇ ପାରିବେ । ଏଥିସହ ଶେଷକୃତ୍ୟରେ 20ରୁ ଅଧିକ ଲୋକ ସାମିଲ ହୋଇପାରିବେ ନାହିଁ । ତେଣେ ଯଦି ପରିବାର ଲୋକେ ଏହି ପ୍ରକ୍ରିୟାରେ ସାମିଲ ହେବା ପାଇଁ ଅନିଚ୍ଛା ପ୍ରକାଶ କରନ୍ତି ତେବେ କୌଣସି ସମସ୍ୟା ନାହିଁ ବୋଲି ମଧ୍ୟ ସ୍ପଷ୍ଟ କରାଯାଇଛି ।
ଭୁବରନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
