ଭୁବନେଶ୍ବର: ଓଡ଼ିଶାରେ ନବୀନ ପଟ୍ଟନାୟକଙ୍କ ପଞ୍ଚମ ପାଳି ସରକାରକୁ 100 ଦିନ ପୂରିଛି। ଗତ ମେ 29 ତାରିଖରେ ଶପଥଗ୍ରହଣ କରିଥିବା ସରକାର ଇତିମଧ୍ୟରେ ଅନେକ ନୂଆ କାର୍ଯ୍ୟକ୍ରମ ହାତକୁ ନେଇଛନ୍ତି । ବିଶେଷକରି ପ୍ରଶାସନିକ ବ୍ୟବସ୍ଥାକୁ ସ୍ବଚ୍ଛ ଓ ପରିମାର୍ଜିତ କରିବାକୁ 5ଟି ଭଳି ବ୍ୟବସ୍ଥାର ସାହାଯ୍ୟ ନିଆଯାଇଛି । ସେହିପରି ଲୋକଙ୍କ ସହିତ ସର୍ବଦା ଯୋଡି ହୋଇ ରହିବାକୁ ପରାମର୍ଶ ଦିଆଯାଇଛି। ‘ମୋ ସରକାର ଯୋଜନା’ରେ ମୁଖ୍ୟମନ୍ତ୍ରୀଙ୍କ ସମେତ ବିଭାଗୀୟ ମନ୍ତ୍ରୀ ସାଧାରଣ ଲୋକଙ୍କ ସହ ପ୍ରତ୍ୟକ୍ଷ ଭାବରେ ଯୋଡିହେବାର ବ୍ୟବସ୍ଥା କରାଯାଇଛି । ସେହିପରି ସରକାରଙ୍କ ପକ୍ଷରୁ ଶିକ୍ଷା, ସ୍ବାସ୍ଥ୍ୟ, କ୍ରୀଡା, ଭିତ୍ତିଭୂମି କ୍ଷେତ୍ରରେ ଅନେକ କାର୍ଯ୍ୟକ୍ରମ ହାତକୁ ନିଆଯାଇଛି। ସେହିପରି ଶିକ୍ଷା ବ୍ୟବସ୍ଥାରେ ନୂତନତା ଅଣାଯାଉଥିବା ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ କହିଛନ୍ତି ।
ଆସନ୍ତା ଅକ୍ଟୋବର 2ରୁ ରାଜ୍ୟରେ ଆରମ୍ଭ ହେବ ‘ମୋ ସରକାର ଯୋଜନା’ । ଯେଉଁଥିରେ ସିଧା ଲୋକଙ୍କ ସହ କଥା ହେବେ ବିଭାଗୀୟ ମନ୍ତ୍ରୀ ଓ ମୁଖ୍ୟମନ୍ତ୍ରୀ। ସେହିପରି ମନ୍ତ୍ରୀ ପ୍ରତି ମାସର 7 ତାରିଖରେ ବିଭାଗୀୟ କାର୍ଯ୍ୟକ୍ରମ ସଂକ୍ରାନ୍ତୀୟ ରିପୋର୍ଟ ମୁଖ୍ୟମନ୍ତ୍ରୀଙ୍କୁ ପ୍ରଦାନ କରୁଛନ୍ତି । ବିଭାଗ କଣ କାର୍ଯ୍ୟକ୍ରମ ହାତକୁ ନେଇଛି, ଆଉ କଣ ଯୋଜନା ରହିଛି ଏହି ରିପୋର୍ଟରେ ଦର୍ଶାଯାଉଛି । ମୁଖ୍ୟମନ୍ତ୍ରୀ ନିଜେ ଏହାର ଅନୁଧ୍ୟାନ ମଧ୍ୟ କରୁଛନ୍ତି। ଏପରିକି ମନ୍ତ୍ରୀ ଓ ସଚିବଙ୍କ ଅଚାନକ ପରିଦର୍ଶନ ଅସାଧୁ କର୍ମଚାରୀଙ୍କ ମଧ୍ୟରେ ଭୟ ସୃଷ୍ଟି କରିଛି।
ନିର୍ବାଚନ ସମୟରେ ଲୋକଙ୍କୁ ଦିଆଯାଇଥିବା ପ୍ରତିଶ୍ରୁତି କିପରି ପୂରଣ ହେବ, ସେନେଇ ରୀତିମତ ସମୀକ୍ଷା କରାଯାଇ ସମ୍ପୃକ୍ତ ବିଭାଗର ମନ୍ତ୍ରୀ ଓ ସଚିବଙ୍କୁ ତାଗିଦ କରାଯାଉଛି। ଗ୍ରାମୀଣ ଭିତ୍ତିଭୂମି ସାଙ୍ଗକୁ ରୋଜଗାର ସୃଷ୍ଟି ଏବେ ସରକାରଙ୍କ ପାଇଁ ନୂଆ ଚ୍ୟାଲେଞ୍ଜ ହୋଇଛି। ତୃଣମୂଳ ସ୍ତରରେ ଆଜି ବି ଲୋକେ ଶୋଷଣର ଶିକାର ହେଉଛନ୍ତି । ଏସବୁ ସତ୍ତ୍ବେ ମଧ୍ୟ ଲୋକଙ୍କ ଆଶା ଅନେକ ରହିଛି।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
