ଭୁବନେଶ୍ବର: ନନ୍ଦନକାନନ ଆଜି ପାଳିଛି ୬୨ତମ ପ୍ରତିଷ୍ଠା ଦିବସ । ପ୍ରତିଷ୍ଠା ଦିବସରେ ଅନେକ କାର୍ଯ୍ୟକ୍ରମ ହାତକୁ ନିଆଯାଇଛି । ନନ୍ଦନକାନନକୁ ବିଶ୍ୱସ୍ତରୀୟ କରିବାକୁ ଆସନ୍ତା ବର୍ଷ ଆରମ୍ଭ ହେବ ଭିତ୍ତିଭୂମି ବିକାଶ କାର୍ଯ୍ୟ । ଅତ୍ୟାଧୁନିକ ବିଲ୍ଡିଂ ସହ ଚିଡ଼ିଆଖାନାରେ ରହିବ ହାଇଟେକ୍ ବ୍ୟବସ୍ଥା । ବିଦେଶୀ ସମେତ ରାଜ୍ୟ ବାହାରର ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ନୂଆ ନୂଆ ବ୍ୟବସ୍ଥା କରାଯିବ । ଏହାସହ ନନ୍ଦନକାନନରେ ଥିବା ପଶୁପକ୍ଷୀଙ୍କ ସଂଖ୍ୟା ବୃଦ୍ଧି ଏବଂ ବଂଶବିସ୍ତାର କରିବା ପାଇଁ ଖୁଆଡ ଗୁଡିକରେ ସ୍ବତନ୍ତ୍ର ବ୍ୟବସ୍ଥା କରାଯିବ ।
ବିଶ୍ୱସ୍ତରୀୟ ହେବ ନନ୍ଦନକାନନ । ଏନେଇ ଜଙ୍ଗଲ ଏବଂ ପରିବେଶ ବିଭାଗ ପକ୍ଷରୁ ପ୍ରସ୍ତୁତ ହୋଇଥିବା ମାଷ୍ଟର ପ୍ଲାନକୁ ମଞ୍ଜୁରୀ ଦେଇଛନ୍ତି ରାଜ୍ୟ ସରକାର । ନନ୍ଦନକାନନକୁ ବିଶ୍ୱସ୍ତରୀୟ କରିବା ପାଇଁ ଖର୍ଚ୍ଚ ହେବ ପ୍ରାୟ 6 ଶହ କୋଟି ଟଙ୍କା । ବିକଶିତ ହେବ ନନ୍ଦନକାନନର ଭିତ୍ତିଭୂମି ଓ ଆନୁଷଙ୍ଗିକ ବ୍ୟବସ୍ଥା । ଆକର୍ଷିତ ହେବେ ଦେଶବିଦେଶର ଦର୍ଶକ ଏବଂ ପର୍ଯ୍ୟଟକ । ଏନେଇ ଖସଡ଼ା ପ୍ରସ୍ତୁତ କରିଛି ଜଙ୍ଗଲ ଏବଂ ପରିବେଶ ବିଭାଗ । ଏହାସହ ନନ୍ଦନକାନନରେ ବିଭିନ୍ନ ପଶୁପକ୍ଷୀଙ୍କ ପ୍ରଜନନ, ଅନୁସନ୍ଧାନ ଓ ଉନ୍ନତ ପରିବେଶ ଯୋଗାଇବା ପାଇଁ ଖର୍ଚ୍ଚ ହେବ ଟଙ୍କା । ରୁଗ୍ଣ ଓ ନଷ୍ଟ ହୋଇଥିବା ଏନକ୍ଲୋଜର ନିର୍ମାଣ ଓ ପରିବର୍ତ୍ତନ କରାଯିବ ।
