ଭୁବନେଶ୍ବର: ଗହଣା ଦୋକାନ ଧରା ପକାଇଦେଲା ଚୋର । ରାଜଧାନୀର କୁଖ୍ୟାତ ଚୋର ନଣ୍ଡା ଓ ନାଲୁକୁ ଗିରଫ କଲା କମିଶନରେଟ ପୋଲିସ । ଦୁଇ ଚୋରକୁ ଗିରଫ କରିବା ସହ ଟଙ୍କପାଣି ରୋଡର ଗହଣା ଦୋକାନୀକୁ ମଧ୍ୟ ଗିରଫ କରିଛି ପୋଲିସ ।
ରାଜଧାନୀରେ ଘରି ପଶି, ଝରକା ବା ଗ୍ରିଲ ତାଡି କଳାକନା ବୁଲାଉଥିବା କୁଖ୍ୟାତ ଚୋର ଏବେ କମିସନରେଟ ପୋଲିସ ପଞ୍ଝାରେ । ନିରଞ୍ଜନ ସ୍ବାଇଁ ଓରଫ ନଣ୍ଡା ଓ ନାଲୁ ସ୍ବାଇଁ ଓରଫ ନାଲୁକୁ ଗିରଫ କରିଛି ସ୍ପେଶାଲ ସ୍କ୍ବାଡ । ସେମାନଙ୍କ ଠାରୁ 70 ଗ୍ରାମର ସୁନା ସହ 150 ଗ୍ରାମର ରୂପା ଅଳଙ୍କାର, ବାଇକ ଓ ସ୍କୁଟି ଜବତ କରିଛି ପୋଲିସ । ଗିରଫ ପରେ ସେମାନଙ୍କ ନାଁରେ 60ଟି ମାମଲା ଥିବା ଜଣାପଡିଛି ।
ରାଜଧାନୀର ବିଭିନ୍ନ ଥାନା ଅଞ୍ଚଳରେ ଗ୍ରିଲ ବା ଝରକା ନଚେତ ଭୋର ସମୟରେ ଘରେ ପଶି ଚୋରି କରୁଥିଲେ ଏମାନେ । ଚୋରି କରୁଥିବା ଅଳଙ୍କାର ନେଇ ଟଙ୍କପାଣିର ଏକ ସୁନା ଦୋକାନରେ ବିକ୍ରି କରୁଥିଲେ । ତେବେ ସେହି ଗହଣା ଦୋକାନରୁ ଜଣେ ଗ୍ରାହକ ସୁନା କିଣିବା ପରେ ନିଜ ସମ୍ପର୍କୀୟଙ୍କ କାନଫୁଲର ଚୋରି ସାମଗ୍ରୀ ବିଷୟରେ ଜାଣିପାରିଥିଲେ । ଏନେଇ ଖଣ୍ଡଗିରି ଥାନାରେ ହୋଇଥିବା ଅଭିଯୋଗକୁ ଆଧାର କରି ସ୍ପେଶାଲ ସ୍କ୍ବାର୍ଡ ସହାୟତାରେ ନଣ୍ଡା ଓ ନାଲୁକୁ ଗିରଫ କରିଛି କମିସନରେଟ ପୋଲିସ ।
ଦୁହିଁଙ୍କ ଘର ଅସ୍ତରଙ୍ଗ ଅଞ୍ଚଳରେ ହୋଇଥିବାବେଳେ ଉଭୟ 10 ବର୍ଷ ପୂର୍ବେ ମଧ୍ୟ ରାଜଧାନୀରେ ଚୋରି କରି ବେଶ ଚର୍ଚ୍ଚାରେ ରହିଥିଲେ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
