ଭୁବନେଶ୍ବର: ଦୀର୍ଘ ଅଢେଇ ମାସେ ଧରି ବନ୍ଦ ରହିଥିଲା ରାଜଧାନୀର ବିଭିନ୍ନ ପାର୍କ। କୋରୋନା ପାଇଁ କେନ୍ଦ୍ର ସରକାର ଘୋଷଣା କରିଥିଲେ ଲକ ଡାଉନ ୧ । ସେବେ ଠାରୁ ହିଁ ଲକ ଡାଉନ ୪ ପର୍ଯ୍ୟନ୍ତ ବନ୍ଦ ରହିଥିଲା ସମସ୍ତ ପାର୍କ । ସରକାରଙ୍କ ସଂଶୋଧିତ ଅନଲକରେ ସ୍ଥିତି ସମ୍ଭବତଃ ସ୍ବାଭାବିକ ହେବାରୁ ଏବେ ଖୋଲୁଛି ପାର୍କ । ପର୍ଯ୍ୟାୟ କ୍ରମେ ଏବେ ପାର୍କ ଖୋଲିଛନ୍ତି ବିଡିଏ କର୍ତ୍ତୃପକ୍ଷ। କିନ୍ତୁ ବହୁ ଲମ୍ବା ସମୟ ପରେ ପାର୍କ ଖୋଳୁଥିବାରୁ ପାର୍କକୁ ଆସୁଥିବା ଲୋକଙ୍କ ସଂଖ୍ୟା କମିଛି । ସେପଟେ ପାର୍କିଙ୍ଗ ଓ ପାର୍କ ଟାଇମିଂଗ କୁ ନେଇ ଲୋକଙ୍କ ଭିତରେ ଅସନ୍ତୋଷ ପ୍ରକାଶ ପାଇଛି।
ଅପରପକ୍ଷରେ ସମୟର ଆବଶ୍ୟକତା ଅନୁଯାୟୀ ଖୋଲୁଛି ପାର୍କ, ସ୍ଥିତି ସମ୍ପୂର୍ଣ୍ଣ ସୁଧାରିବା ପାଇଁ ସମୟ ଲାଗିବ ବୋଲି କହିଛନ୍ତି ବିଡ଼ିଓ କର୍ତ୍ତୃପକ୍ଷ । ଗୋଟିଏ ପଟେ ଆପତ୍ତି ଆଉ ଗୋଟିଏ ପଟେ ଆବଶ୍ୟକତା, ଏହା ଭିତରେ ପାର୍କ ଖୋଲିବା ନେଇ ଅନିଶ୍ଚିତତା ଭିତରେ ଜନସାଧାରଣ। ସେପଟେ ପାର୍କ ସକାଳ 5ଟା ପରିବର୍ତ୍ତେ 7 ଟାରେ ଖୋଲୁଥିବାରୁ ସୂର୍ଯ୍ୟଙ୍କ ତାପ ପ୍ରଖର ହେଉଛି, ଫଳରେ ପାର୍କରେ ୱାର୍କ ଆଉଟ କରିବା ସମ୍ଭବ ହେଉ ନାହିଁ ।
ବର୍ତ୍ତମାନ ଆଭିଜାତ୍ୟ ନୁହେଁ ସହରୀ ଜୀବନରେ ଆବଶ୍ୟକତା ରହିଛି ପାର୍କ। କିନ୍ତୁ ବିଡମ୍ବନା ଯେ, କୋଭିଡ଼ ମହାମାରୀ ସାଧାରଣ ମଣିଷର ଆବଶ୍ୟକତାକୁ ଅନ୍ଧାରକୁ ଠେଲି ଦେଇଛି । କିନ୍ତୁ ବର୍ତ୍ତମାନ ପାର୍କ ଗୁଡ଼ିକରେ ସାମାଜିକ ଦୂରତା ରକ୍ଷା, ମାସ୍କ ବ୍ୟବହାର ସହ ସମସ୍ତ ପାର୍କ ଖୋଲିବାର ଆବଶ୍ୟକତା ରହିଛି।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
