ଭୁବନେଶ୍ବର: ଘଡିସନ୍ଧି ମୂହୁର୍ତ୍ତରେ ରାଜ୍ୟ କଂଗ୍ରେସ । ସାଧାରଣ ନିର୍ବାଚନରେ ଦଳର ବଡ ବିପର୍ଯ୍ୟୟ ପରେ ଏବେ ଦଳ ଘୋର ଆର୍ଥିକ ସଙ୍କଟ ଦେଇ ଗତି କରୁଛି । ଏପରିକି ବିଜେପୁର ଉପନିର୍ବାଚନ ପାଇଁ ଦଳ ଅନ୍ୟମାନଙ୍କୁ ହାତପାତି ଟଙ୍କା ମାଗିଛି । ଏହି କଥା ଆମେ କହୁନୁ ଖୋଦ୍ ପିସିସି ସଭାପତି କହିଛନ୍ତି ।
ଶନିବାର ଦଳ ତରଫରୁ ଏକ ଆକାଉଣ୍ଟ ନମ୍ବର ଦିଆଯାଇଛି । ଦୁଇ ଦିନ ଧରି ନିଜେ ପିସିସି ସଭାପତି ଅପିଲ କରୁଛନ୍ତି ଟଙ୍କା ପାଇଁ । ଦୁଇ ଦିନରେ 1 ଲକ୍ଷ ଟଙ୍କା ମିଳିଥିବା କହିଛନ୍ତି ନିରଞ୍ଜନ । ଆଗକୁ ଆହୁରି ସହଯୋଗ ମିଳିବା ନେଇ ଦଳ ଆଶା ରଖିଛି ।
ତେବେ ଓଡ଼ିଶାର ଅନ୍ୟତମ ସର୍ବାଧିକ ଟିକସ ପ୍ରଦାନକାରୀ ନିରଞ୍ଜନ ପଟ୍ଟନାୟକଙ୍କର ଏମିତି କ’ଣ ଅଭାବ ରହିଲା ଯେ ସେ ହାତପାତି ଟଙ୍କା ମାଗୁଛନ୍ତି ବୋଲି ସାମ୍ବାଦିକଙ୍କ ପ୍ରଶ୍ନରେ କହିଛନ୍ତି, ‘ମୁଁ ସଭାପତି ହେଲି ବୋଲି କ’ଣ ଘର ଡିହ ବିକ୍ରି କରି ଦଳ ଚଳାଇବି । ’
ସେ ଆହୁରି କହିଛନ୍ତି, ପୂର୍ବ ନିର୍ବାଚନରେ ଯାହା ଖର୍ଚ୍ଚ ହୋଇଥିଲା ଏ ପର୍ଯ୍ୟନ୍ତ ବକେୟା ବିଲ୍ ଦିଆଯାଇ ପାରିନାହିଁ । ବିଜେପି ଓ ବିଜେଡି ନିର୍ବାଚନରେ ଯେଉଁଭଳି ଖର୍ଚ୍ଚ କରୁଛନ୍ତି ତାହାର ମୁକାବିଲା ଦଳ କରିପାରିବ ନାହିଁ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
