ଭୁବନେଶ୍ବର: ମୈତ୍ରିବିହାର ସରକାରୀ ଆପାର୍ଟମେଣ୍ଟରେ ମହିଳାଙ୍କୁ ଗଣ ଦୁଷ୍କର୍ମ ଘଟଣାର ଖୁଲାସା କରିଛି କମିଶନରେଟ୍ ପୋଲିସ । ବାହାରୁ ନୁହେଁ ସେହି ଆପାର୍ଟମେଣ୍ଟ ଭିତରେ ଥିଲେ ଅଭିଯୁକ୍ତ । ମୋଟ ତିନିଜଣ ଅଭିଯୁକ୍ତ ସମ୍ପୃକ୍ତ ଥିବା ବେଳେ ଦୁଇ ଜଣ ଅଭିଯୁକ୍ତ ମହିଳାଙ୍କ ସହ ଗଣ ଦୁଷ୍କର୍ମ କରିଥିଲେ । ଏହି ଘଟଣାରେ ପୋଲିସ 3 ଜଣଙ୍କୁ ଗିରଫ କରିଛି । ସେମାନେ ହେଲେ ଜଗା ସିଂ,ବିକାଶ ନାୟକ, ଟୁକୁନା ନାୟକ । ଗିରଫ ତିନି ଜଣ ଯାକ ମୈତ୍ରି ବିହାର ଅଞ୍ଚଳର ।
ପଡୋଶୀ ହୋଇ ରହୁଥିଲେ ଗଣଦୁଷ୍କର୍ମ କଲେ:
ଏନେଇ ପୋଲିସ କମିସନର ସୁରେଶ ଦେବଦତ୍ତ ସିଂ କହିଛନ୍ତି, ‘ଆପାର୍ଟମେଣ୍ଟରେ ୩୦ତାରିଖ ରାତିରେ ଘଟଣା ହୋଇଥିଲା । ଘଟଣାଟି ୫ମ ମହଲାରେ ଘଟିଥିଲା । ଅଭିଯୁକ୍ତମାନେ ଅଳଙ୍କାର ଲୁଟି ନେବା ସହ ଦୁଷ୍କର୍ମ କରିଥିବା ଅଭିଯୋଗ ହୋଇଥିଲା । ଫରେନସିକ ଯାଞ୍ଚ ସହ ଆମ ଟିମ୍ ରାତି ଅନିଦ୍ରା ରହି ଅପରାଧିଙ୍କୁ ଖୋଜିଥିଲେ । ସ୍ପେଶାଲ ସ୍କ୍ବାର୍ଡ ସିସିଟିଭି ଫୁଟେଜ ଓ ବାହାରେ କେହି ପ୍ରତ୍ୟକ୍ଷଦର୍ଶୀଙ୍କ ପଚରାଉଚରା ପରେ ଅଭିଯୁକ୍ତ ମାନେ ସେହି ଆପାର୍ଟମେଣ୍ଟ ଭିତରେ ଥିବା ପୋଲିସ ଜାଣିବାକୁ ପାଇଥିଲା । ଏନେଇ ପୋଲିସ ତଦନ୍ତ କରି ତିନିଜଣ ଅଭିଯୁକ୍ତ ସାମିଲ ଥିଲେ ବୋଲି ଜାଣିବାକୁ ପାଇଥିଲା । ବାହାରେ ଜଣେ ଜଗିଥିବା ବେଳେ ଆଉ ଦୁଇ ଜଣ ଭିତରେ ପଶି ଏଭଳି ଘଟଣା ଘଟାଇଥିଲେ । ଏମାନେ ମଧ୍ୟ ଗୋଟିଏ ଦିନ ପୂର୍ବରୁ ଘର ଭିତରେ ପଶି ମୋବାଇଲ ଚୋରି କରିଥିଲେ । ପରେ ମହିଳାଙ୍କ ଘରେ ପଶିବା ପାଇଁ ତିନିଦିନ ଧରି ଲକ୍ଷ୍ୟ କରିଥିଲେ । ବାଲକୋନି ବାଟରେ ଘରେ ପଶିବା ସହଜ ଥିଲା । ସେମାନେ ସେହି ବାଟେ ପଶି ରାତି ୨ଟାରେ ଏଭଳି ଘଟଣା ଭିଆଇଥିଲେ ।’
ଅପରାଧିଙ୍କ ରହିଛି ଲମ୍ବା କ୍ରାଇମ୍ ରେକର୍ଡ:
ଗିରଫ ତିନି ଜଣଙ୍କ ମଧ୍ୟରୁ ଦୁଇ ଜଣ ଯିଏ ମହିଳାଙ୍କ ଘର ଭିତରେ ପଶିଥିଲେ । ଏମାନଙ୍କ ନାଁରେ ପୂର୍ବରୁ ଅନେକ ଅପରାଧିକ ମାମଲା ରହିଛି । ଅନେକ ଚୋରି ଡକାୟତି ରାହାଜାନି ଭଳି ଅନେକ ହାର୍ଡକୋର ଅପରାଧ ଭାବରେ ରେକର୍ଡ ରହିଛି । ୨୦୧୯ରେ ଚୋରି ଉଦ୍ୟମରେ ଯୋଜନା କରି ଗିରଫ ହୋଇଛନ୍ତି ।
ସହର ବାସୀଙ୍କୁ ନିଜ ଚାରିପାଖ ସମ୍ପର୍କ ବଢାଇବାକୁ ପରାମର୍ଶ:
ମାନସିକ ପ୍ରକୃତି ଦେବତା ହୋଇପାରେ ନଚେତ ଅସୁର ହୋଇପାରେ । ଏଇ ଘଟଣାରେ ସେଇ ଦୁର୍ବୃତ୍ତ ସେଠାରେ ରହୁଥିଲେ ସାଙ୍ଗ ପାଖରେ । ଅର୍ଥାତ୍ ଆପଣଙ୍କ ଇନସାଇଡ ଗେଟ୍ ଭିତରେ ଅପରାଧି ତତ୍ତ୍ବ ହେଲେ ଆପଣ ମାନଙ୍କୁ ସଚେତନ ହେବାକୁ ପଡିବ । କାରଣ ଆମେ ସର୍ବଦା ଗେଟ୍ ବାହାରେ ଜଗି ରହିଛୁ । ତେଣୁ ଆପଣଙ୍କ ଚାରିପାଖରେ ଲୋକଙ୍କ ସହ ସମ୍ପର୍କ ବଢାଇବାକୁ ପୋଲିସ କମିଶନର ପରାମର୍ଶ ଦେଇଛନ୍ତି ।
ଇଟିଭି ଭାରତ, ଭୁବନେଶ୍ବର
