ଭୁବନେଶ୍ବର: ରାଜଧାନୀରେ ଦିନକୁ ଦିନ ବିଗୁଡୁଛି ଆଇନ ଶୃଙ୍ଖଳା ବ୍ୟବସ୍ଥା । ଜନଗହଳିପୂର୍ଣ୍ଣ ସ୍ଥାନରେ ଆତଙ୍କ ଖେଳାଉଛନ୍ତି ଦୁର୍ବୃତ୍ତ । ସପିଂ ମଲ ସାମ୍ନାରେ ଯୁବକଙ୍କୁ କାଠ ଫାଳିଆରେ ଆଖିବୁଜା ଆକ୍ରମଣ କରି ପୁଣି ଆତଙ୍କ ଖେଳାଇଲେ ଦୁର୍ବୃତ୍ତ । ଆକ୍ରମଣରେ ୨ ଜଣ ଯୁବକ ଆହତ ହୋଇଥିବା ସୂଚନା । ଗତକାଲି ସହିଦନଗର ବିଏମସି ଭବାନୀ ମଲ ସାମ୍ନାରେ ଏପରି ଆତଙ୍କ ଖେଳାଇ ଘଟଣାସ୍ଥଳରୁ ଚମ୍ପଟ ମାରିଥିଲେ ଦୁର୍ବୃତ୍ତ ।
ସୂଚନା ଅନୁଯାୟୀ, ଗତକାଲି ରାତିରେ କିଛି ଦୁର୍ବୃତ୍ତ କାଠ ଫାଳିଆ ଧରି ମଲ ଆଡକୁ ଆସିଥିଲେ । ହଠାତ କିଛି କହିବା ପୂର୍ବରୁ ମଲରୁ ବାହାରୁଥିବା ଖୋର୍ଦ୍ଧା ଅଞ୍ଚଳର ଆଦିତ୍ୟ ଦାସ ଓ ଆଶୁତୋଷଙ୍କୁ ଆଖିବୁଜା ଆକ୍ରମଣ କରିଥିଲେ । ଯାହାକୁ ନେଇ ସ୍ଥାନୀୟ ଲୋକେ ଆତଙ୍କିତ ହେବା ସହ ହୋ ହଲ୍ଲା କରିବାରୁ ଦୁର୍ବୃତ୍ତ ମାନେ ପଳାଇଥିଲେ । ରବିବାର ରାତି ୧୦ଟା ସମୟରେ ଏହି ଘଟଣା ଘଟିଥିବା ବେଳେ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ଲୁଟପାଟ ପାଇଁ ଏପରି କରିଥାଇପାରନ୍ତି ବୋଲି ପୋଲିସ ସନ୍ଦେହ କରୁଛି ।
ତେବେ ବିଗତ ଦିନରେ ରାଜଧାନୀରେ ଏଭଳି ଅନେକ ଘଟଣା ସାମ୍ନାକୁ ଆସୁଛି । କିଛିଦିନ ତଳେ ଏୟାରଫିଲ୍ଡ ଥାନା ବୋତଣ୍ଡା ଅଞ୍ଚଳରେ ଏକ ଫାଷ୍ଟଫୁଡ ଦୋକାନରେ ଏପରି ମରଣାନ୍ତକ ଆକ୍ରମଣ କରିଥିଲେ କିଛି ଯୁବକ । ସେହିପରି ସିଆରପି ଛକରେ ଜଣେ ଛାତ୍ରନେତାଙ୍କୁ ଗୁଳି ମାଡ କରି ଗିରଫ ହୋଇଥିଲେ ଯୁବକ । ମାର୍କେଟ ବିଲଡିଂରେ କିଛି ଦିନ ତଳେ କିଛି ଯୁବକ ମରଣାନ୍ତଙ୍କ ଆକ୍ରମଣ କରି ଜଣେ ବ୍ୟବସାୟୀଙ୍କୁ ହାଣି ଥିଲେ। ତେବେ ରାଜଧାନୀରେ ବାରମ୍ବାର ଏପରି ଘଟଣା ଘଟୁଥିବା ବେଳେ ଲୋକେ ଆତଙ୍କିତ ହେଉଛନ୍ତି । ତେଣୁ ପୋଲିସ ଏଥିପ୍ରତି ଅଧିକ ଧ୍ୟାନ ଦେବା ଆବଶ୍ୟକ ରହିଛି ।
ଇଟିଭି ଭାରତ, ଭୁବନେଶ୍ବର
