ଭୁବନେଶ୍ବର: ଜଙ୍ଗଲ ଓ ପରିବେଶ ମନ୍ତ୍ରୀଙ୍କ ଅତର୍କିତ ଚନ୍ଦକା ଅଭୟାରଣ୍ୟ ଗସ୍ତ । ଆଜି ପୂର୍ବାହ୍ନରେ ମନ୍ତ୍ରୀ ଶ୍ରୀ ଆରୁଖ ଅଭୟାରଣ୍ୟ ସ୍ଥିତ ଗୋଡିବାରୀ କୁମାର ଖୁଣ୍ଟି,ଡେରାସ୍,ଏବଂ ଅମ୍ବିଲ ପ୍ରଭୃତି ସ୍ଥାନ ପରିଦର୍ଶନ କରିବା ସହ ଅଭୟାରଣ୍ୟର ପରିଚାଳନା ବ୍ୟବସ୍ଥା ସମ୍ପର୍କରେ ସମୀକ୍ଷା କରିଛନ୍ତି ।
ଏହି ସମୟରେ ବନଖଣ୍ଡ ଅଧିକାରୀ ସହକାରୀ ବନ ସଂରକ୍ଷକ ,ରେଞ୍ଜ ଅଫିସର ଫରେଷ୍ଟର ତଥା ଅନ୍ୟାନ୍ୟ ବନ କର୍ମଚାରୀ ଉପସ୍ଥିତି ଥିଲେ । ସେମାନଙ୍କ ସହ ମନ୍ତ୍ରୀ ଶ୍ରୀ ଆରୁଖ ଅଭୟାରଣ୍ୟର ସୁରକ୍ଷା, ଜୀବଜନ୍ତୁଙ୍କ ସୁରକ୍ଷା ଓ ମଣିଷ ଓ ବନ୍ୟପ୍ରାଣୀ ସଂଘର୍ଷର ସଠିକ୍ ପରିଚାଳନା, ବନୀକରଣ ପରିବେଶ ଓ ପର୍ଯ୍ୟଟନ ପ୍ରଭୃତି ପ୍ରସଙ୍ଗ ଉପରେ ଆଲୋଚନା କରିଥିଲେ ।
ଏପରିକି ସମଗ୍ର ଅଭୟାରଣ୍ୟରେ ବର୍ଷସାରା ନାଇଟ୍ ପାଟ୍ରୋଲିଂ ଏବଂ ଫୁଟ୍ ପାଟ୍ରୋଲିଂ ନିୟମିତ କରିବାକୁ ନିର୍ଦ୍ଦେଶ ଦେଇଛନ୍ତି । ଜଙ୍ଗଲ ଅଗ୍ନି ନିର୍ବାପନ ପାଇଁ ଜଙ୍ଗଲ ନିଆଁ ନିର୍ବାପକ ସ୍ଵାର୍ଡ ଓ ଆବଶ୍ୟକୀୟ ଅଗ୍ନି ନିର୍ବାପକ ସାମଗ୍ରୀ ପ୍ରସ୍ତୁତ ରଖିବାକୁ ନିର୍ଦ୍ଦେଶ ଦେଇଛନ୍ତି ମନ୍ତ୍ରୀ । ସେହିଭଳି ହାତୀଙ୍କ ସୁରକ୍ଷା ଓ ପରିଚାଳନା ପାଇଁ ଆସୁଥିବା ଅର୍ଥର ସୁବିନିଯୋଗ କରିବା ସହ ସ୍ଵଚ୍ଛତା ଅବଲମ୍ବନ କରିବା ପାଇଁ ମନ୍ତ୍ରୀ ଅଧିକାରୀ ମାନଙ୍କୁ ପରାମର୍ଶ ଦେଇଛନ୍ତି ।
ବର୍ତ୍ତମାନ ଅଭୟାରଣ୍ୟରେ ୧୨ଟି ଓ୍ଵାଚ୍ ଟାଓ୍ଵାର ଅଛି ଯାହା ଅଭୟାରଣ୍ୟ ପାଇଁ ପ୍ରଯ୍ୟାପ୍ତ ନୁହେଁ । ତେଣୁ ହଜବନ୍ଧ ଠାରେ ଆଉ ଏକ ଓ୍ଵାଚଟାଓ୍ଵାର ନିର୍ମାଣ ପାଇଁ ଅନୁମୋଦିତ ୨୦ ଲକ୍ଷ ଟଙ୍କା ବ୍ୟୟକରି ଯଥାଶୀଘ୍ର ଟାୱାର ନିର୍ମାଣ କରିବାକୁ ମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
