ଭୁବନେଶ୍ୱର: ଜୁନ 21ରେ ବିଶ୍ବ ପାଳିବ ଯୋଗ ଦିବସ । ଯୋଗ ଦିବସ ପାଳନ କରିବାକୁ ଚଳଚଞ୍ଚଳ ସାରା ଦେଶ । ବିଭିନ୍ନ ଆୟୋଜନ ମଧ୍ୟରେ ଯୋଗ ଦିବସକୁ ନେଇ ଦେଖିବାକୁ ମିଳିଛି ଏକ ସୁନ୍ଦର କଳାକୃତି । ପେନସିଲ ମୁନରେ ଅଧା ସେଣ୍ଟିମିଟର ଯୋଗ ମୁଦ୍ରା ତିଆରି କରିଛନ୍ତି ଭୁବନେଶ୍ୱର ଉପକଣ୍ଠ ଜଟଣୀର ଶିଳ୍ପୀ ଏଲ ଇଶ୍ୱର ରାଓ ।
ଯୋଗ ଶରୀର ସହ ମନ ଓ ଆତ୍ମାକୁ ସଂଯୋଗ କରେ । କାହିଁ ଆବାହନ କାଳରୁ ଯୋଗକୁ ଶାସ୍ତ୍ରରେ ମର୍ଯ୍ୟାଦା ଦିଆଯାଇଛି । ‘ଶାନ୍ତି’ ଏ ଶବ୍ଦ ଭିତରେ ଯୋଡି ହୋଇ ରହିଛି ବାସ୍ତବିକ ସାରସ୍ୱତ। ବ୍ୟସ୍ତ ବହୁଳ ଜୀବନ ଚର୍ଯ୍ୟା ଭିତରେ ଯୋଗକୁ ଜୀବନ ସହିତ ବାନ୍ଧି ରଖିବାକୁ ପେନସିଲ ମୁନରେ ପ୍ରସ୍ତୁତ କରିଛନ୍ତି ଶିଳ୍ପୀ ରାଓ । ଅନେକ ପରିଶ୍ରମ କରି ଏହି କଳା କୃତିକୁ ପ୍ରସ୍ତୁତ କରିଛନ୍ତି ଏହି ନିଆରା ଶିଳ୍ପୀ ।
ଲକ୍ଷ୍ୟ କେବଳ ଗୋଟିଏ ସୁସ୍ଥ ସମାଜ ଗଠନ କରିବାର । ଶାନ୍ତି ଓ ନିରାମୟ ଜୀବନ ଯାପନ କରିବାର ।
ଅଧା ସେଣ୍ଡିମିଟର ପେନସିଲ ମୁନରେ ସାରା ବିଶ୍ୱକୁ ଏଭଳି ବାର୍ତ୍ତା ନିଶ୍ଚିତ ଦୃଷ୍ଟାନ୍ତମୂଳକ । ଯୋଗର ମାହାତ୍ମ୍ୟକୁ ସୁନ୍ଦର ଭାବରେ ଜୀବନ୍ତ କରି ତୋଳିଛନ୍ତି ଶିଳ୍ପୀ ରାଓ । ମଣିଷ ବ୍ୟସ୍ତ ବହୁଳ ଜୀବନ ଭିତରେ ଯୋଗ ଦ୍ୱାରା ଶାନ୍ତି ଓ ସୁସ୍ଥରେ ଜୀବନ ବିତାଇ ପାରିବେ ବୋଲି ଈଶ୍ୱର ରାଓ କହିଛନ୍ତି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
