ଭୁବନେଶ୍ବର: ରାଜ୍ୟକୁ କେମିତି ଫେରିବେ ପ୍ରବାସୀ ଓଡ଼ିଆ ତାହା ଏବେ ରାଜ୍ୟ ସରକାରଙ୍କ ପାଇଁ ବଡ ଚ୍ୟାଲେଞ୍ଜ ହୋଇଛି । ଲକଡାଉନ ପାଇଁ ଟ୍ରେନ ଓ ବିମାନ ସେବା ବନ୍ଦ ରହିଛି । ଲକ୍ଷ ଲକ୍ଷ ପ୍ରବାସୀ ଓଡିଆ ଶ୍ରମିକଙ୍କୁ ଫେରାଇ ଆଣିବା ପାଇଁ ରାଜ୍ୟ ସରକାର ପ୍ରସ୍ତୁତି ଆରମ୍ଭ କରିଛନ୍ତି । ଏନେଇ ପରିବହନ ମନ୍ତ୍ରୀ ପଦ୍ମନାଭ ବେହେରା କହିଛନ୍ତି କି ଯଦି ଟ୍ରେନ କିମ୍ବା ଏୟାରଲାଇନ୍ସ ଖୋଲିବନି, ତେବେ ଲୋକଙ୍କୁ ବସ୍ ଯୋଗେ ଅଣାଯିବ ।
ରାଜ୍ୟରେ 15 ହଜାର ବସ ରହିଛି । ସମ୍ଭବ ହେଲେ ଅନ୍ୟ ରାଜ୍ୟରୁ ପରିବହନ ମୂଲ୍ୟ ଦେଇ ଅଣାଯିବାର ବ୍ୟବସ୍ଥା କରାଯିବ । ଏନେଇ ଆଲୋଚନା ଚାଲିଛି ଏବଂ ଅନ୍ୟ ରାଜ୍ୟମାନଙ୍କ ସହ ମଧ୍ୟ ଆଲୋଚନା କରାଯାଉଥିବା ସେ ସୂଚନା ଦେଇଛନ୍ତି । ଆବଶ୍ୟକ କ୍ଷେତ୍ରରେ ଅନ୍ୟ ରାଜ୍ୟମାନଙ୍କର ସହଯୋଗ ଲୋଡାଯିବ । ସେମାନେ ମଧ୍ୟ ପ୍ରବାସୀ ଓଡ଼ିଆଙ୍କୁ ଫେରାଇବା ପାଇଁ ବ୍ୟବସ୍ଥା କରିବେ ବୋଲି ନିବେଦନ କରାଯାଇଛି । ଏବେ ପ୍ରବାସୀ ଓଡ଼ିଆଙ୍କ ରେଜିଷ୍ଟ୍ରେସନ ଚାଲିଛି । ଯେଉଁଥିରେ 5 ଲକ୍ଷରୁ ଉର୍ଦ୍ଧ୍ବ ଓଡିଆ ବାହାର ରାଜ୍ୟରେ ରହିଥିବା ଆକଳନ କରାଯାଉଛି ।
ତେବେ ଏତେ ସଂଖ୍ୟାରେ ଲୋକଙ୍କକୁ ଆଣିବା ପାଇଁ ରାଜ୍ୟରେ ଏତେ ସଂଖ୍ୟକ ବସ ନାହିଁ । ତେଣୁ ଅନ୍ୟ ରାଜ୍ୟର ସହଯୋଗ ଆବଶ୍ୟକ । କିନ୍ତୁ ଏଯାବତ କୈଣସି ନିଷ୍ପତ୍ତି ହୋଇନାହିଁ । ନିଷ୍ପତ୍ତି ହେଲା ପରେ ଏହାକୁ କାର୍ଯ୍ୟକାରୀ କରାଯିବ ବୋଲି ପଦ୍ମନାଭ ସ୍ପଷ୍ଟ କରିଛନ୍ତି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
