ଭୁବନେଶ୍ବର: ପାଟକୁରା ପାଟ ପିନ୍ଧିବା ପରେ ନବୀନ ନିବାସରେ ଅନୁଷ୍ଠିତ ହୋଇଛି ଗୁରୁତ୍ବପୂର୍ଣ୍ଣ ବୈଠକ । ନିର୍ବାଚନ ଫଳାଫଳକୁ ନେଇ ମୁଖ୍ୟମନ୍ତ୍ରୀ ଆଜି ଉଚ୍ଚସ୍ତରୀୟ ବୈଠକ ଡକାଇଛନ୍ତି । ଏଥିରେ ଜନାଦେଶକୁ ସ୍ବାଗତ କରାଯିବା ସହ ପାଟକୁରାରେ ବିକାଶ କାର୍ଯ୍ୟ ତ୍ବରାନିତ ଲାଗି ନିଷ୍ପତ୍ତି ନିଆଯାଇଛି ।
ବୈଠକରେ ପାଟକୁରା ନିର୍ବାଚନରେ କେଉଁ ପଞ୍ଚାୟତରୁ ବିଜେଡି କେତେ ଭୋଟ ପାଇଛି, ସେ ନେଇ ଆଲୋଚନା କରାଯାଇଛି । ଭୋଟ ବ୍ୟବଧାନ କମିବା ନେଇ ମଧ୍ୟ ଆଲୋଚନା ହୋଇଥିବା ସୂଚନା ରହିଛି । ଏହାସହ ପାଟକୁରାର ବିକାଶ କାର୍ଯ୍ୟ କିଭଳି ତ୍ବରାନିତ ହେବ ସେନେଇ ନବୀନ ନିର୍ଦ୍ଦେଶ ଦେଇଥିବା ଜଣାପଡିଛି ।
ବୈଠକ ପରେ ଆଳି ବିଧାୟକ ପ୍ରତାପ ଦେବ କହିଛନ୍ତି ଯେ ବିଜେଡି ଗତ ସାଧାରଣ ନିର୍ବାଚନରୁ ଏଥର ପାଟକୁରାରେ 3 ଗୁଣା ଅଧିକ ଭୋଟ ପାଇଛି । ଫଳାଫଳକୁ ନେଇ ଦଳ ଖୁସି ଅଛି ବୋଲି ସେ କହିଛନ୍ତି । ଏହି ବୈଠକରେ ବିଜେଡିର ଅନେକ ବରିଷ୍ଠ ନେତା ଯୋଗଦେଇଥିଲେ ।
ସେମାନଙ୍କ ମଧ୍ୟରେ ଆଠଗଡ ବିଧାୟକ ରଣେନ୍ଦ୍ର ପ୍ରତାପ ସ୍ବାଇଁ, ନୟାଗଡ ବିଧାୟକ ଅରୁଣ ସାହୁ, କାମାକ୍ଷାନଗର ବିଧାୟକ ପ୍ରଫୁଲ୍ଲ ମଲ୍ଲିକ, ମହାକାଳପଡା ବିଧାୟକ ଅତନୁ ସବ୍ୟସାଚୀ ନାୟକ, ଆଳି ବିଧାୟକ ପ୍ରତାପ ଦେବ, ନରସିଂହପୁର ବିଧାୟକ ଦେବୀ ପ୍ରସାଦ ମିଶ୍ର, ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ, ବିଜେପୁର ପୂର୍ବତନ ବିଧାୟିକା ରୀତା ସାହୁ, ଯାଜପୁର ବିଧାୟକ ପ୍ରଣବ ପ୍ରକାଶ ଦାଶ ପ୍ରମୁଖ ସାମିଲ ଥିଲେ । ସେହିଭଳି ଦଳର ମୁଖ୍ୟ ସଚେତକ ପ୍ରମିଳା ମଲ୍ଲିକ ମଧ୍ୟ ନବୀନ ନିବାସରେ ଉପସ୍ଥିତ ଥିଲେ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
