ଭୁବନେଶ୍ବର: ଚିଲିକା ହ୍ରଦ ନିକଟରେ ଅଚଳ ହୋଇପଡିଥିବା ମାଲେସିଆ ଜାହାଜ ରାଜହଂସରୁ ତୈଳ ଲିକ ନେଇ ଆଶଙ୍କା ରହିଛି । ତୈଳ ଲିକ୍ ହେଲେ ସାମୁଦ୍ରିକ ଜୀବ ତଥା ଚିଲିକାର ଜୈବ ବିବିଧତା ପ୍ରଭାବିତ ହେବ । ତେଣୁ ସେଥିପ୍ରତି ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ନଜର ରଖାଯାଇଥିବା ବିଭାଗୀୟ ସଚିବ ସୁରେଶ ମହାପାତ୍ର କହିଛନ୍ତି । ସେ ସ୍ଥାନରୁ ଜାହାଜକୁ କିମ୍ବା ଜାହାଜରୁ ତୈଳ ହଟାଇବାକୁ କୋଷ୍ଟଗାର୍ଡ ତରଫରୁ ନିର୍ଦ୍ଦେଶ ଦିଆଯାଇଥିବା କଥା ସେ ପ୍ରକାଶ କରିଛନ୍ତି ।
ଗତ 10ଦିନ ତଳେ ଚିଲିକା ହ୍ରଦ ନିକଟ ସମୁଦ୍ରରେ ମାଲେସିଆ ଜାହାଜ ଅଚଳ ହୋଇଥିଲା । ଏଥିରେ ଥିବା ତୈଳ ଲିକ୍ ହେଲେ ସାମୁଦ୍ରିକ ଜୀବମାନଙ୍କର କ୍ଷତି ପହଞ୍ଚାଇ ପାରେ । ସେଥିପାଇଁ କୋଷ୍ଟଗାର୍ଡ ତରଫରୁ ସେଠାରୁ ଜାହାଜକୁ ହଟାଇବାକୁ ନିର୍ଦ୍ଦେଶ ଦିଆଯାଇଥିଲା । ଜାହାଜ କମ୍ପାନୀ ଜାହାଜରୁ ତୈଳ ବାହାର କରିବାକୁ ପ୍ରତିଶ୍ରୁତି ଦେଇଛି ।
ଜାହାଜରେ 30ହଜାର ଲିଟର ତୈଳ ରହିଥିବା ଜଙ୍ଗଲ ବିଭାଗ ସଚିବ ସୁରେଶ ମହାପାତ୍ର ପ୍ରକାଶ କରିଛନ୍ତି ।
ସେ ସ୍ଥାନରୁ ଜାହାଜକୁ କିମ୍ବା ଜାହାଜରୁ ତୈଳ ହଟାଇବାକୁ କୋଷ୍ଟଗାର୍ଡ ତରଫରୁ ନିର୍ଦ୍ଦେଶ ଦିଆଯାଇଛି । ଏହି ତୈଳ ଲିକ୍ ହେଲେ ସାମୁଦ୍ରିକ ଜୀବମାନଙ୍କ କ୍ଷତି ହେବ । ତେଣୁ ଖୁବଶୀଘ୍ର କାର୍ଯ୍ୟାନୁଷ୍ଠାନ ନିଆଯିବ ବୋଲି ଜଙ୍ଗଲ ବିଭାଗ ସଚିବ କହିଛନ୍ତି ।
ପୁରୀ ଜିଲ୍ଲାପାଳ ଏହି ଘଟଣା ଉପରେ ନଜର ରଖିଥିବା ଚିଲିକା ଉନ୍ନୟନ କର୍ତ୍ତୃପକ୍ଷ ମୁଖ୍ୟ କାର୍ଯ୍ୟନିର୍ବାହୀ ସୁଶାନ୍ତ ନନ୍ଦ କହିଛନ୍ତି । ଜାହାଜରୁ ତୈଳ ଲିକ୍ ହେବାର ସମ୍ଭାବନା କମ ରହିଛି ଓ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜର ଅନୁସାରେ କାମ କରାଯାଉଥିବା ସେ ଉଲ୍ଲେଖ କରିଛନ୍ତି ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
