ଭୁବନେଶ୍ବର: କୋରୋନା ମହାମାରୀ ସମୟରେ କିପରି ହେବ ମେକ ଇନ ଓଡିଶା କନକ୍ଲେଭ ? ଆସନ୍ତା ନଭେମ୍ବର ମାସରେ ହେବାକୁ ଥିବା ଏହି ମେଗା ଇଭେଣ୍ଟ ନେଇ ଏବେ ଚିନ୍ତାରେ ପଡିଛନ୍ତି ରାଜ୍ୟ ସରକାର । ଶିଳ୍ପ ବିଭାଗ ଏହାର ନୋଡାଲ ଏଜେନ୍ସି ରହିଛି । ଏବେ ଯାଏଁ ଆମ ରାଜ୍ୟରେ 12 ହଜାର କୋଟି ଟଙ୍କାର ପୁଞ୍ଜି ନିବେଶ ମଧ୍ୟ ହୋଇଛି । ଓଡିଶାକୁ ପୁଞ୍ଜି ନିବେଶକାରୀମାନେ ଶିଳ୍ପାୟନର ରାଜ୍ୟ ହିସାବରେ ଗ୍ରହଣ କରିଛନ୍ତି । ସେଭଳି ବାତାବରଣ ଇକୋ ସିଷ୍ଟମ, ଇଣ୍ଡଷ୍ଟ୍ରିଆଲ ଡେଭଲପମେଣ୍ଟ ଓ ଇନଫ୍ରାଷ୍ଟକଚରକୁ ବଢାଇବାରେ ଓଡିଶା ସମର୍ଥ ହୋଇଛି ।
ସେପଟେ ସି-ପୋର୍ଟ ତା’ ସହିତ କୋଷ୍ଟାଲ ଡେଭଲପମେଣ୍ଟ ଓ ମାଇନିଂ ଓ ମିନେରାଲ ଭଳି ସବୁ କ୍ଷେତ୍ରରେ ପୁଞ୍ଜି ନିବେଶ ହୋଇଛି । ସବୁଠୁ ଗୁରୁତ୍ବପୂର୍ଣ୍ଣ 6ଟି ଫୋକସ ସେକ୍ଟର ଯଥା ପେଟ୍ରୋକେମିକାଲ, କେମିକାଲ ମାଇନ୍ସ, ମିନେରାଲ ଆଇରନ ଷ୍ଟିଲ ଓ ଆଲୁମିନିୟମ ପରି ଫୁଡ଼ ପ୍ରୋସେସିଂ ଏବଂ ଆଇଟି ଓ ଇଲେକ୍ଟ୍ରୋନିକ୍ସ । ଟ୍ରିଲିୟନ ଡ଼ଲାର ସ୍ବପ୍ନର ମାଧ୍ୟମ ହେବ ଆଇଟି ଓ ଇଲୋକ୍ଟ୍ରୋନିକ୍ସ । ତେବେ ବର୍ତ୍ତମାନ ସମୟରେ ଆମେରିକା ଓ ଚୀନା ମଧ୍ୟରେ ଚାଲିଥିବା ଟ୍ରେଡ ୱାରର ସୁଯୋଗ ନେଇ ରାଜ୍ୟ ଆଇଟି ଓ ଇଲେକ୍ଟ୍ରୋନିକ୍ସକୁ ସୁଦୃଢ଼ କରିବା ପାଇଁ ଚେଷ୍ଟା ଆରମ୍ଭ କରିଛି ।
ଏମିତିରେ 2020 ମେକଇନ ଓଡ଼ିଶା ପାଇଁ ବିଚାର ବିମର୍ଷ ଚାଲିଛି । ଏହାର ପ୍ରସ୍ତୁତି ପାଇଁ ବହୁତଗୁଡିଏ ଅନ୍ତର୍ଜାତୀୟ ଏଜେନ୍ସି ସହ ଡିଜିଟାଲ ପ୍ଲାଟଫର୍ମରେ କଥା ଚାଲିଛି । କୋଭିଡ ପରିସ୍ଥିତି ଓ ଷ୍ଟକ ହୋଲ୍ଡରମାନଙ୍କ ସ୍ଥିତିକୁ ଦେଖି ଉଚିତ ସମୟରେ ନିଷ୍ପତ୍ତି ନେବା ନେଇ ସ୍ପଷ୍ଟ କରିଛନ୍ତି ଆଇଟି ମନ୍ତ୍ରୀ ତୁଷାରକାନ୍ତି ବେହେରା । ସେ ଏହା ମଧ୍ୟ କହିଛନ୍ତି କି ବର୍ତ୍ତମାନ ସ୍ଥିତିରେ ଫିଜିକାଲି ମିଟ ବହୁତ କଠିନ ସମସ୍ୟା । କିଭଳି ଏହା ଆୟୋଜନ କରାଯିବ କିମ୍ବା ସ୍ଥଗିତ କରାଯିବ ସେ ଉପରେ ବିଚାରବିମର୍ଷ ଜାରି ରହିଛି । କିଛି ନହେଲେ ଭର୍ଚୁଆଲ ମାଧ୍ୟମରେ ଇଭେଣ୍ଟ ଆୟୋଜନ କରାଯିବ ବୋଲି ସେ ସୂଚନା ଦେଇଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
