ଭୁବନେଶ୍ବର: ଗାନ୍ଧିଜୀଙ୍କ ୧୫୦ ତମ ଜନ୍ମଜୟନ୍ତୀ ପାଳନ କରୁଛି ସାରା ଦେଶ । ଗାନ୍ଧୀଙ୍କ ସ୍ପର୍ଶରେ ଓଡ଼ିଶାର ଜନମାନସରେ ସ୍ବାଧୀନତା ସଂଗ୍ରାମର ଯେଉଁ ଉଦଘୋଷ ଆରମ୍ଭ ହୋଇଥିଲା ତାକୁ ମଧ୍ୟ ଆଜି ମନେପକାଉଛି ଓଡିଶା ।
ସ୍ବାଧୀନତା ସଂଗ୍ରାମ ସମୟରେ ଗାନ୍ଧିଜୀ ଓଡିଶାକୁ ୮ ଥର ଆସିଛନ୍ତି । ଗୋପବନ୍ଧୁ, ମଧୁସୂଦନ ଦାସ, ମାଳତୀ ଦେବୀ ଭଳି ଅନେକ ସ୍ବାଧୀନତା ସଂଗ୍ରାମୀ ଗାନ୍ଧୀଙ୍କର ଓଡିଶା ଗସ୍ତକୁ କେବଳ ସୁଫଳ କରିନଥିଲେ ବରଂ ଗାନ୍ଧୀଙ୍କ ପଛରେ କିଭଳି ଓଡିଶା ଛିଡା ହେବ, ସେ ନେଇ ପ୍ରଚେଷ୍ଟା ମଧ୍ୟ କରିଥିଲେ। ସ୍ଵାଧୀନତା ସମୟରେ ଗାନ୍ଧିଜୀ ଯେଉଁ ସବୁ ସ୍ଥାନକୁ ଆସିଥିଲେ ସେହି ପୀଠ ଆଜି ପବିତ୍ର ସ୍ଥାନରେ ପରିଣତ ହୋଇଛି । ପୁରୀ ଜିଲ୍ଲା ଡେଲାଙ୍ଗର ବେରବୋଇ, ବାଳିଅନ୍ତାର ନିକୁଞ୍ଜ ବିହାରୀ ପୀଠ, କଟକର ତେଲେଙ୍ଗାପେଣ୍ଠ । ୧୯୨୧ ମସିହା ମାର୍ଚ୍ଚ ୨୩ ତାରିଖ ଦୋଳ ପୂର୍ଣ୍ଣିମା ଦିନ ଗାନ୍ଧିଜୀ ନିଜର ସହଧର୍ମିଣୀ କସ୍ତୁରବା ଗାନ୍ଧୀଙ୍କ ସହ ପ୍ରଥମେ ଓଡିଶା ଆସିଥିଲେ।
ପ୍ରଥମେ କଟକର କଦମ ଇ ରସୁଲରେ ସଭା କରିଥିଲେ ଗାନ୍ଧିଜୀ । ସେହିଭଳି ୧୯୨୫,୧୯୨୮ , ୧୯୩୪,୧୯୩୬,୧୯୩୮,୧୯୪୬ ଇତ୍ୟାଦି ବିଭିନ୍ନ ସମୟରେ ଓଡ଼ିଶାର ବିଭିନ୍ନ ପ୍ରାନ୍ତରେ ସେ ବୁଲିଥିଲେ। ସେଥିମଧ୍ୟରୁ ରାଜଧାନୀ ଉପକଣ୍ଠ ବାଲିଅନ୍ତା ନିକୁଞ୍ଜ ବିହାରୀ ପୀଠ । ଏଠାରୁ ହିଁ ଜାତିଭେଦ ଭାବର ପ୍ରଥାକୁ ବିଲୋପ ପାଇଁ ନୀତିଗତ ଉଦ୍ୟମ କରିଥିଲେ ଜାତିର ଜନକ ମହାତ୍ମା ଗାନ୍ଧୀ । କାରଣ ତାଙ୍କ ଉଦ୍ୟମରେ ଏକାଧିକ ଓଡିଶା ଗସ୍ତ କାଳରେ ନିକୁଞ୍ଜ ବିହାରୀ ପୀଠରେ ହରିଜନଙ୍କୁ ମନ୍ଦିର ଭିତରେ ପ୍ରବେଶ କରାଇ କୀର୍ତ୍ତି ସ୍ତମ୍ଭ ସ୍ଥାପନ କରିଥିଲେ ମହାତ୍ମା। ଆଜି ୧୫୦ ତମ ଜନ୍ମ ଜୟନ୍ତୀ ଅବସରରେ ଏହି ପୀଠ ଏକ ବ୍ୟତିକ୍ରମ ଉଦ୍ୟମର ମୁକସାକ୍ଷୀ ନିଶ୍ଚିତ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
