ଭୁବନେଶ୍ବର: ଶିଶୁ ଦିବସରେ ରାଜ୍ୟସ୍ତରୀୟ ମହକ କାର୍ଯ୍ୟକ୍ରମ ଆୟୋଜିତ । ରାଜ୍ୟର ବିଭିନ୍ନ ପ୍ରାନ୍ତରୁ ଶିଶୁ ସାମିଲ । ଗୁରୁବାର, ଭୁବନେଶ୍ବର ଜୟଦେବ ଭବନରେ ଏକ ସ୍ବତନ୍ତ୍ର ଢଙ୍ଗରେ ପାଳିତ ହୋଇଛି ରାଜ୍ୟସ୍ତରୀୟ ମହକ କାର୍ଯ୍ୟକ୍ରମ ।
ଏହି ଅବସରରେ ରାଜ୍ୟର ବିଭିନ୍ନ ସ୍ଥାନରେ ଥିବା 248 ଟି ଶିଶୁ ସୁରକ୍ଷା ସଂଗଠନର ଶିଶୁଙ୍କ ଦ୍ବାରା ବିଭିନ୍ନ ସାମାଜିକ ସଚେତନତା ସାଂସ୍କୃତିକ କାର୍ଯ୍ୟକ୍ରମ ମଞ୍ଚରେ ପ୍ରଦର୍ଶନ କରାଯାଇଛି । ତେବେ ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ମହିଳା ଏବଂ ଶିଶୁ ବିକାଶ ମନ୍ତ୍ରୀ ଟୁକୁନି ସାହୁ ଯୋଗ ଦେଇ କହିଛନ୍ତି, ‘ଆଜିର ଶିଶୁ କାଲିର ଭବିଷ୍ୟତ । ଶିଶୁ ଦିବସରେ ଶିଶୁ ମାନଙ୍କ ମହକ ବିଛୁରିତ ହେଉ । ରାଜ୍ୟ ସରକାର ଶିଶୁର ବିକାଶ ନେଇ ଅହରହ ଉଦ୍ୟମ ଜାରି ରଖିଛନ୍ତି । ଶିକ୍ଷା, ଖାଦ୍ୟ ଏବଂ ପ୍ରତିଟି ଶିଶୁର ସର୍ବାଙ୍ଗୀନ ଉନ୍ନତି ନିମନ୍ତେ ଆମେ କାର୍ଯ୍ୟ କରୁଛୁ ।’ ଏହାସହ ସମସ୍ତ ସିସିଆଇରେ ଥିବା ଶିଶୁଙ୍କ ଯତ୍ନ ନିଆଯାଉଛି ବୋଲି ସେ କହିଛନ୍ତି ।
ଅନ୍ୟପଟେ ମହକ କାର୍ଯ୍ୟକ୍ରମ ପାଇଁ ଆମେ ଆଜି ନିଜ ଦକ୍ଷତା ପ୍ରତିପାଦନ କରି ପୁରସ୍କୃତ ହେଉଛୁ । ମହକ ଆମ ଜୀବନରେ ସରସ ସୁନ୍ଦର ଭରିଦେଇଛି । ଆମ ସ୍ବପ୍ନ ଆଜି ସାକାର ହୋଇଛି ବୋଲି ପୁରୀ ନୀଳାଚଳ ସେବା ପ୍ରତିଷ୍ଠାନର ଛାତ୍ରୀ ମିନତୀ ମୁର୍ମୁ କହିଛନ୍ତି । ସେହିପରି ଏଠାରେ କଳା ପ୍ରଦର୍ଶନ କରି ବହୁତ ଖୁସି ଲାଗୁଛି ବୋଲି କନ୍ଧମାଳର ବନବାସ ସେବା ସମିତିର ବନ୍ଦିତା ମଲିକ କହିଛନ୍ତି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
