ଭୁବନେଶ୍ବର: ଲିଫ୍ଟ ଦେବା ଆଳରେ ଲୁଟି ନେଲେ ସୁନା ମୁଦି । ରାଜଧାନୀ ଆଚାର୍ଯ୍ୟ ବିହାରରୁ ଉଠାଇ ନେଇ ଲୁଟ୍ ପରେ ରାସ୍ତାକଡକୁ ଫିଙ୍ଗି ଦେଲେ ଦୁର୍ବୃତ୍ତ । ଲୁଟ୍ ହୋଇଥିବା ବ୍ୟକ୍ତି ଜଣକ ଜଣେ ଶିକ୍ଷକ ବୋଲି ଜଣାପଡିଛି । ସମ୍ପର୍କୀୟଙ୍କ ଘରକୁ ଆସିଥିବା ସମୟରେ ଠକାମିର ଶିକାର ହୋଇଥିବା ସୂଚନା ।
ସୂଚନା ଅନୁଯାୟୀ, ଢେଙ୍କାନାଳ ଜରଡାର ଅକ୍ଷୟ କୁମାର ପାଲ ନାମକ ଜଣେ ବ୍ୟକ୍ତି ଭୁବନେଶ୍ବରର ତାଙ୍କ ଝିଆରିଙ୍କ ଘରକୁ ଆସିଥିଲେ । ଆଜି(ମଙ୍ଗଳବାର) ଘରକୁ ଫେରିବା ସମୟରେ ଆଚାର୍ଯ୍ୟ ବିହାରରେ କିଛି ବ୍ୟକ୍ତି ଲିଫ୍ଟ ଦେଇଥିଲେ । ପରେ ପାନୀୟ ଜଳରେ ନିଶା ଦେଇ ସୁନା ମୁଦି ସମେତ ନଗଦ ୬ ହଜାର ଟଙ୍କା ଲୁଟି ନେଇଛନ୍ତି । ଏଥିସହ ଲୁଟ୍ ପରେ ତାଙ୍କୁ କଟକ ଧବଳେଶ୍ବର ଘାଟରେ ଫିଙ୍ଗି ଦେଇଥିବା ଅଭିଯୋଗ ହୋଇଛି ।
ପରେ ଅଚେତ ଅବସ୍ଥାରେ କେତେକ ବ୍ୟକ୍ତି ତାଙ୍କୁ ଉଦ୍ଧାର କରି କଟକ ବଡମେଡିକାଲରେ ଭର୍ତ୍ତି କରିଥିଲେ । ପରିବାର ଲୋକେ ଏନେଇ ଖବର ପାଇ ଡାକ୍ତରଖାନାରେ ପହଞ୍ଚିବା ସହ ଶହୀଦ ନଗର ଥାନାରେ ଅଭିଯୋଗ କରିଛନ୍ତି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
