ଭୁବନେଶ୍ବର: କୋରୋନା ଭୂତାଣୁର ଭୟାବହତାକୁ ଦୃଷ୍ଟିରେ ରଖି ଗତ ମଙ୍ଗଳବାର ମଧ୍ୟରାତିରୁ ସାରା ଭାରତକୁ ଲକଡାଉନ ଘୋଷଣା କରାଯାଇଛି । ଇତିମଧ୍ୟରେ ତାଲାବନ୍ଦକୁ ବିତିଯାଇଛି 5 ଦିନ ।
ସେପଟେ ତାଲାବନ୍ଦ ଯୋଗୁଁ ଲୋକେ ବାହାରକୁ ବାହାରିବା ପାଇଁ ସୁଯୋଗ ପାଉନଥିବା ବେଳେ ଅତ୍ୟାବଶ୍ୟକ ସାମଗ୍ରୀ ପାଇଁ ଘରୁ ବାହାରିବାକୁ ସୁଯୋଗ ଦେଇଛନ୍ତି ସରକାର । ଯେଉଁଥିରେ ପନିପରିବା କିଣିବା ମଧ୍ୟ ସାମିଲ ରହିଛି । ଆଉ ଏଇ ବାହାନାରେ ଲୋକେ ବାହାରକୁ ବାହାରିବା ସହ ବାହାରେ ସମୟ ବିତାଇବା ପାଇଁ ସୁଯୋଗ ପାଉଛନ୍ତି । ତେବେ ଲୋକେ ଏହି ସୁଯୋଗକୁ ଏପରି ଆପଣାଇଛନ୍ତି ଯେ ନିଜ ଘର ଠାରୁ 10-15 କିମି ଦୂର ପରିବା ଆଣିବାକୁ ଆସୁଥିବା ଦେଖିବାକୁ ମିଳୁଛି ।
ଅନ୍ୟପଟେ ତାଲା ବନ୍ଦ ଯୋଗୁଁ ପୋଲିସ ଓ ପ୍ରଶାସନ ପକ୍ଷରୁ ବିଭିନ୍ନ ଗଳିକନ୍ଦିରେ କଡା କଟକଣା ରହିଥିବା ବେଳେ ଏହି ପଥିକମାନଙ୍କ ବାଟ ଓଗାଳୁଥିବା ଦେଖିବାକୁ ମିଳୁଛି । ଯାହାର ଜବାବରେ ସେମାନେ ନିକଟ ଦୋକାନରେ ଅଧିକ ଦର ଥିବାରୁ ଦୂରକୁ ପରିବା ଆଣିବାକୁ ଆସୁଥିବା କହିଛନ୍ତି । ତେଣୁ ଏହି କ୍ଷେତ୍ରରେ ପୋଲିସ ସେମାନଙ୍କୁ ସହଯୋଗ କରିବାକୁ ନିବେଦନ କରୁଥିବା ଦେଖିବାକୁ ମିଳିଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
