ଭୁବନେଶ୍ବର: ତାଲାବନ୍ଦ ସମୟରେ ସରକାର ଲାଗୁ କରିଥିବା ସମସ୍ତ କଟକଣା ଯେତେ କଷ୍ଟକର ହେଲେ ମଧ୍ୟ ଜନସାଧାରଣ ଅନୁପାଳନ କରି ଆସୁଛନ୍ତି । ଏବେ ସରକାର କେତେକ କୋହଳ ଘୋଷଣା କରିଥିବା ବେଳେ ରାଜ୍ୟରେ ମଦ ବିକ୍ରି ପାଇଁ ଅନୁମତି ଦେଇଛନ୍ତି । ଏହା ଅତ୍ୟନ୍ତ ଦୁଃଖଦାୟକ ଓ ଆଶ୍ଚର୍ଯ୍ୟଜନକ ନିଷ୍ପତ୍ତି ବୋଲି କହିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ ।
ସ୍ବାସ୍ଥ୍ୟ ବିଶେଷଜ୍ଞମାନେ ବାରମ୍ବାର କହି ଆସୁଛନ୍ତି ଯେ ମଦ୍ୟପାନ ଶରୀରର ରୋଗ ପ୍ରତିରୋଧକ ଶକ୍ତି ବଢାଏ ନାହିଁ । ବରଂ ଏହା ଶରୀରକୁ ରୋଗାଗ୍ରସ୍ତ କରିବାରେ ସାହାଯ୍ୟ କରେ । ତଥାପି ଯେଉଁଠାରେ ଚାହା ଦୋକାନ ଖୋଲିବା ମନା, ସେଠାରେ ସରକାର କାହା ଚାପରେ ଏପରି ଦୁର୍ଭାଗ୍ୟଜନକ ନିଷ୍ପତ୍ତି ନେଇଛନ୍ତି ବୋଲି ପ୍ରଶ୍ନ କରିଛନ୍ତି ନିରଞ୍ଜନ । ତାଲାବନ୍ଦ ଯୋଗୁଁ ଅନେକ କ୍ଷେତ୍ରରେ ରାଜସ୍ବ ହରାଉଥିବା ବେଳେ ଅବକାରୀ ରାଜସ୍ବ ବୃଦ୍ଧି ପାଇଁ ନା କିଛି ନିର୍ଦ୍ଧିଷ୍ଟ ଲୋକଙ୍କ ସ୍ବାର୍ଥ ପାଇଁ ସରକାର ଏହି ନିଷ୍ପତ୍ତି ନେଇଛନ୍ତି, ତାହା ରାଜ୍ୟବାସୀ ଜାଣିବା ଦରକାର ବୋଲି ସେ କହିଛନ୍ତି ।
ତେବେ ଏହି ତାଲାବନ୍ଦ ସମୟରେ ଜୀବନଧାରଣକୁ ଶୃଙ୍ଖଳିତ କରିବା ପାଇଁ ସରକାର ତୁରନ୍ତ ଏହି ଘୋଷଣା ପ୍ରତ୍ୟାହାର କରନ୍ତୁ ବୋଲି ଶନିବାର ଏକ ପ୍ରେସ ବିଜ୍ଞପ୍ତି ଜରିଆରେ ପିସିସି ସଭାପତି ନିରଞ୍ଜନ ପଟ୍ଟନାୟକ ପ୍ରକାଶ କରିଛନ୍ତି ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ ଓ ତପନ ଦାସ, ଇଟିଭି ଭାରତ
