ଭୁବନେଶ୍ବର: ଲିଙ୍ଗରାଜ ମନ୍ଦିର ସ୍ବତନ୍ତ୍ର ଆଇନ ସଂକ୍ରାନ୍ତ ଅଧ୍ୟାଦେଶ ସମ୍ପର୍କରେ କେନ୍ଦ୍ର ସରକାରଙ୍କ ପଦକ୍ଷେପ ଉପରେ ପ୍ରତିକ୍ରିୟା ରଖିଛନ୍ତି ବିଜେପି ନେତା ବାବୁ ସିଂ । ରାଜ୍ୟ ସରକାରଙ୍କୁ ଟାର୍ଗେଟ କରି ବାବୁ କହିଛନ୍ତି ପୁରୁଣା ସଂସ୍କୃତି ପରମ୍ପରା ଭାଙ୍ଗିବାରେ ରାଜ୍ୟ ସରକାର ପ୍ରତିଶୃତିବଦ୍ଧ । ନୀତି ନିୟମ ଭିତରେ କାର୍ଯ୍ୟ କରିବା ପାଇଁ କେନ୍ଦ୍ର ସରକାର ଆଦେଶ ଦେଇଛନ୍ତି । ସେଥିପାଇଁ ଏହି ଅଧ୍ୟାଦେଶକୁ ଫେରାଇ ଦେଇଛନ୍ତି । ରାଜ୍ୟ ସରକାରଙ୍କୁ ଆମେ ଚେତାଇ ଦେଉଛୁ, ଆପଣଙ୍କ ପାଖରେ ଭୋଟ, ବିଧାୟକ ଅଧିକ ଥାଇପାରନ୍ତି । କିନ୍ତୁ ନୀତି ନିୟମକୁ ଜଳାଞ୍ଜଳି ଦେଇ ଏଭଳି କିଛି କାମ କରନ୍ତୁ ନାହିଁ । ଯାହା ପାଇଁ ଆଗାମୀ ପିଢି ଆପଣଙ୍କୁ କେବେ କ୍ଷମା ଦେବ ନାହିଁ ବୋଲି ବାବୁ କହିଛନ୍ତି ।
ସେପଟେ ମନ୍ତ୍ରୀ ଅଶୋକ ପଣ୍ଡା କେନ୍ଦ୍ର ସରକାରଙ୍କୁ ସମାଲୋଚନା କରି କହିଛନ୍ତି କାଶୀ ବିଶ୍ବନାଥ, ସୋମନାଥ ଓ କେଦାରନାଥ ପାଇଁ ଅଲଗା ଆଇନ । ଆଉ ଏକାମ୍ର କ୍ଷେତ୍ର ପାଇଁ ଆଉ ଗୋଟିଏ ଆଇନ । ସେଠି ଗୋଟିଏ ମାପକାଠି ଏବଂ ଲିଙ୍ଗରାଜଙ୍କ ପାଇଁ ଆଉ ଏକ ମାପକାଠି କାହିଁକି ବୋଲି ପ୍ରଶ୍ନ ଉଠାଇଛନ୍ତି ମନ୍ତ୍ରୀ ପଣ୍ଡା । ସେହିପରି ମନ୍ତ୍ରୀ କହିଛନ୍ତି ଲିଙ୍ଗରାଜଙ୍କ ଅଧ୍ୟାଦେଶ ନେଇ ଦୁଇଥର ଭିଡିଓ କନ୍ଫରେନ୍ସିଂ ଜରିଆରେ ସ୍ପଷ୍ଟୀକରଣ ଦିଆଯାଇଛି । ଆଉଥରେ ପଚାରିଥିଲେ ଦିଆଯାଇଥାନ୍ତା । ଭିଡିଓ କନଫରେନ୍ସିଂ ଜରିଆରେ ମୁଖ୍ୟ ଶାସନ ସଚିବଙ୍କ ସହ ଆଲୋଚନା କରିପାରିଥାନ୍ତେ । ହେଲେ ଅଧ୍ୟାଦେଶ ଉପରେ ରୋକ ଲଗାଇବା ଓଡିଆଙ୍କ ଭାବାବେଗକୁ କୁଠାରଘାତ କରିଛି ବୋଲି କହିଛନ୍ତି ।
ଅନ୍ୟପଟେ ଅଧ୍ୟାଦେଶ ବିବାଦ ନେଇ ବର୍ଷିଲେ କଂଗ୍ରେସ ବିଧାୟକ ସୁର ରାଉତରାୟ । ଲିଙ୍ଗରାଜଙ୍କୁ କାହିଁକି ଏତେ ଶସ୍ତା କରୁଛ ସରକାର ବୋଲି ପଚାରିଛନ୍ତି ସୁର ? ମହାପ୍ରଭୁ ଶ୍ରୀଜଗନ୍ନାଥଙ୍କ ପରିକ୍ରମା ପ୍ରକଳ୍ପ କୁ ନେଇ ବିଧାନସଭା ଠାରୁ ଆରମ୍ଭ କରି ସଂସଦ ରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ତେବେ ଏହାକୁ ସହଜରେ ଗ୍ରହଣ କରି ପାରିନି କଂଗ୍ରେସ। କଂଗ୍ରେସ ନେତା ସୁର ରାଉତରାୟ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଭବାନୀ ଶଙ୍କର ଦାସ ଓ ସଞ୍ଜୀବ ରାୟ, ଇଟିଭି ଭାରତ
