ଭୁବନେଶ୍ବର: ଆଉ କିଛିଦିନ ପରେ ଶବ୍ଦ ଓ ଆଲୁଅ ସମାହାରରେ ଝଙ୍କୃତ ହୋଇ ଉଠିବ ମା ସମଲେଶ୍ବରୀଙ୍କ ପୀଠ । ଓଟିଡିସି ପକ୍ଷରୁ ସମ୍ବଲପୁରର ଅଧିଷ୍ଠାତ୍ରୀ ଦେବୀ ମା ସମଲେଶ୍ବରୀଙ୍କ ପୀଠରେ କୋଣାର୍କ ମନ୍ଦିରରେ ହେଉଥିବା ଲାଇଟ ଆଣ୍ଡ ସାଉଣ୍ଡ ଶୋ ଏଠାରେ ପ୍ରଦର୍ଶନ ହେବାକୁ ଯାଉଛି ।
ଏହାକୁ ନେଇ ଆଜି ସୂଚନା ଦେଇଛନ୍ତି ଓଟିଡିସି ଅଧକ୍ଷା ଶ୍ରୀମୟୀ ମିଶ୍ର । ସ୍ଥାନୀୟ ପାନ୍ଥନିବାସ ଠାରେ ଅନୁଷ୍ଠିତ ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ ଏନେଇ ପ୍ରସ୍ତୁତି ଜୋରଦାର ଚାଲିଥିବା ବେଳେ ଟେଣ୍ଡର ପ୍ରକ୍ରିୟା ମଧ୍ୟ ସରିଛି । ତେବେ ଏଥିପାଇଁ ଏକ କାହାଣୀ ପ୍ରସ୍ତୁତ କରିବାକୁ କମିଟି ଗଠିତ ହୋଇ ସାରିଛି । ଯଥାଶୀଘ୍ର ଏହା ଶେଷ ହେବା ସହିତ ଖୁବଶୀଘ୍ର ଲୋକମାନେ ଏହାର ମଜ୍ଜା ନେଇ ପାରିବେ । ତେବେ ଏଥିପାଇଁ ସମୁଦାୟ 8 କୋଟି ଟଙ୍କା ଖର୍ଚ୍ଚ କରାଯାଉଥିବା ବେଳେ ଏହି ଶୋ ମୁଖ୍ୟତଃ ଓଡ଼ିଆ, ସମ୍ବଲପୁରୀ ଭାଷାରେ ହେବା ସହିତ ହିନ୍ଦୀ କିମ୍ବା ଇଂରାଜୀରେ କରାଯିବା ନେଇ ମଧ୍ୟ ବିଚାର ଚାଲିଥିବା ସେ କହିଛନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
