ଭୁବନେଶ୍ୱର: କୋରୋନା ପାଇଁ ଲିଙ୍ଗରାଜ ମନ୍ଦିର ପ୍ରଶାସନ ପକ୍ଷରୁ ସତର୍କ ରହିବା ପାଇଁ ଶ୍ରଦ୍ଧାଳୁଙ୍କୁ ସଚେତନ କରାଯାଇଛି । ପ୍ରଶାସନ ପକ୍ଷରୁ ମନ୍ଦିର ପ୍ରବେଶ ପୂର୍ବରୁ ହାତ, ମୁହଁ ଧୋଇବା ସହ କାଶ, ଛିଙ୍କ ବେଳେ ମୁହଁକୁ ଘୋଡାଇବା ପାଇଁ କୁହାଯାଇଛି ।
କିନ୍ତୁ ପ୍ରକୃତ ଅବସ୍ଥା ଦେଖିଲେ ଏହା କେବଳ ନାମକୁ ମାତ୍ର ବୋଲି ଜଣାପଡିଛି । ଯେଉଁଠି ଶହଶହ ସଂଖ୍ୟାର ଶ୍ରଦ୍ଧାଳୁ ମନ୍ଦିରରେ ପ୍ରବେଶ କରୁଛନ୍ତି, ବାହାରେ ସେମାନଙ୍କ ହାତ ଧୋଇବା ପାଇଁ ପାଣି ଟ୍ୟାପ ପାଖରେ ଗୋଟିଏ ସାବୁନ ରଖାଯାଇଛି । ସେହିପରି ଗୋଡ଼ ଧୋଇବା ପାଇଁ ରଖାଯାଇଥିବା ପାଣି ଅପରିଷ୍କାର ଥିବା ବେଳେ ତାହାକୁ ରୀତିମତ ପରିବର୍ତ୍ତନ ପାଇଁ କୌଣସି ବ୍ୟବସ୍ଥା ହୋଇନଥିବା ଦେଖାଯାଇଛି ।
ଆହୁରି ମଧ୍ୟ ମନ୍ଦିର ପାଚେରୀ କଡ଼ରେ ଅପରିଷ୍କାର ହୋଇ ପଡ଼ିରହିଛି । ଏମିତିକି ଲୋକମାନେ ମଳତ୍ୟାଗ କରିଥିବା ଦେଖିବାକୁ ମିଳିଥିଲେ ମଧ୍ୟ ଏହାକୁ ସଫା କରିବା ପାଇଁ ପ୍ରଶାସନ କୌଣସି ପଦକ୍ଷେପ ନେଉନଥିବା ସ୍ଥାନୀୟ ଲୋକ ଓ ଯାତ୍ରୀମାନେ ଅସନ୍ତୋଷ ପ୍ରକାଶ କରିଛନ୍ତି ।
ସରକାରୀ ଅର୍ଥ ଆତ୍ମସାତ କରିବା ପାଇଁ ଅଧିକାରୀମାନେ ଲାଗି ପଡିଥିବାବେଳେ, ଯାହା କରିବା ପାଇଁ ଅର୍ଥ ଆସିଛି ତାହା କରୁନଥିବା କହିଛନ୍ତି ସ୍ଥାନୀୟ ଲୋକ । ଲୋକ ଦେଖାଣିଆ ଭାବେ ପ୍ରଶାସନ ସଚେତନ କରୁଥିବା ବେଳେ ଯାହା ଅତ୍ୟନ୍ତ ଆବଶ୍ୟକ ତାହା ଗ୍ରହଣ କରିବାକୁ ଶ୍ରଦ୍ଧାଳୁ ଦାବି କରିଛନ୍ତି ।
ଭୁବନେଶ୍ୱରରୁ ଲକ୍ଷ୍ମୀକାନ୍ତ ଦାସ,ଇଟିଭି ଭାରତ
