ଫୁଲବାଣୀ: ଗତ କିଛି ଦିନ ତଳେ ରାଇକିଆ ବ୍ଲକ ବାରବା ରେଞ୍ଜ ପଳାସପଲ୍ଲୀ ଅଞ୍ଚଳରେ ଗୋଟିଏ ହାତୀ ଛୁଆ କୂଅରେ ପଡିବା ଘଟଣା ମନରୁ ନଲିଭୁଣୁ ପୁଣି ଏଭଳି ଏକ ଘଟଣା ଫିରିଙ୍ଗିଆ ବ୍ଲକରେ ଦେଖିବାକୁ ମିଳିଛି । ଗୋଛାପଡା ରେଞ୍ଜ ଅର୍ନ୍ତଗତ ପକାରୀ ପଞ୍ଚାୟତ ଝିରିଙ୍ଗସାହି ନିକଟସ୍ଥ ଏକ ୮ ଫୁଟର କୂଅରେ ଛୁଆ ହାତୀ ପଡି ଯାଇଥିବା ଗୁରୁବାର ସକାଳୁ ଦେଖିବାକୁ ମିଳିଛି ।
ଘଟଣାକୁ ୨୪ ଘଣ୍ଟା ବିତିବାକୁ ବସିଥିବା ବେଳେ ଏ ପର୍ଯ୍ୟନ୍ତ ହାତୀ ଛୁଆକୁ ଉଦ୍ଧାର କରାଯିବା ପାଇଁ ବନ ବିଭାଗ ପକ୍ଷରୁ ଉଦ୍ୟମ କରାଯାଇନାହିଁ । ମିଳିଥିବା ସୂଚନାନୁସାରେ ବୁଧବାର ରାତିରେ ୧୦ ଟିକିଆ ହାତୀପଲ ଆମ୍ବ ଓ ପଣସ ଖାଇବା ପାଇଁ ଆସିଥିଲେ । ହାତୀପଲ ମଧ୍ୟରେ ଏକ ଛୁଆ ହାତୀ ଥିଲା ।
ହାତୀପଲ ପାହାନ୍ତାରୁ ଜଙ୍ଗଲକୁ ଫେରୁଥିବା ବେଳେ ପରିତ୍ୟକ୍ତ କୂଅରେ ହାତୀ ଛୁଆ ପଡି ଯାଇଥିବା ଅନୁମାନ କରାଯାଉଛି । ସକାଳେ ଜଙ୍ଗଲକୁ ଯାଇଥିବା କିଛି ଲୋକେ ହାତୀ ଛୁଆ ପଡ଼ିଥିବା ଦେଖିବାକୁ ପାଇଥିଲେ । ଘଟଣା ବନବିଭାଗ ଜାଣିବାଥିଲେ ମଧ୍ୟ ସନ୍ଧ୍ୟା ୭ଟା ପର୍ଯ୍ୟନ୍ତ କେହି ଘଟଣାସ୍ଥଳରେ ପହଞ୍ଚି ନଥିଲେ । ଗୁରୁବାର ଫିରିଙ୍ଗିଆ ରେଞ୍ଜର ବିଜୟ ମଲ୍ଲିକ ଏକ ଟିମ ସହ ସେଠାକୁ ଯାଇ ହାତୀ ଛୁଆକୁ ଉଦ୍ଧାର କରାଯିବାକୁ ଉଦ୍ୟମ କରାଯିବ ବୋଲି କହିଛନ୍ତି ।
ଇଟିଭି ଭାରତ, କନ୍ଧମାଳ
