ଖୋର୍ଦ୍ଧା: ରାଜ୍ୟର ଗ୍ରାମଞ୍ଚଳର ବିକାଶ ପାଇଁ ରାଜ୍ୟ ସରକାର ଯୋଜନା ପରେ ଯୋଜନା କରିଛନ୍ତି । ଏହାସହ ଗାଁର ବିକାଶ ପାଇଁ କୌଣସି ସମସ୍ୟା ରହିବ ନାହିଁ ବୋଲି ସରକାର ନିତିଦିନ ଡିଣ୍ଡିମ ପିଟୁଛନ୍ତି। ହେଲେ ସରକାର ଗାଁ ବିକାଶ ପାଇଁ କେତେ ସମ୍ବେଦନଶୀଳ ତାହା ଏହି ଗୋଟିଏ ଦୃଶ୍ୟରୁ ସ୍ପଷ୍ଟ ଅନୁମେୟ।
ରାଜଧାନୀ ଭୁବନେଶ୍ବରରୁ କିଛିଦୂରରେ ଅବସ୍ଥିତ ଖୋର୍ଦ୍ଧା ଜିଲ୍ଲାର ଜଟଣୀ ବ୍ଲକ ଅନ୍ତର୍ଗତ ବେଣାପଞ୍ଜରୀ ପଞ୍ଚାୟତ ଦେଇ ଯାଇଥିବା ଦୟାନଦୀରେ ଆଜି ପର୍ଯ୍ୟନ୍ତ ପୋଲଟିଏ ହୋଇ ପାରିନାହିଁ । ଫଳରେ ପଞ୍ଚାୟତର ପଣ୍ଡିଆବିଲି, ବୁଢ଼ାଙ୍ଗରା ସମେତ ଅନେକ ଗ୍ରାମ ଏବେ ବିପଦ ସଂକୁଳ ଅବସ୍ଥାରେ ନଦୀ ପାର ହୋଇ ଦୈନନ୍ଦିନ ଯାତାୟତ କରୁଛନ୍ତି । ଦୟାନଦୀର ଗୋଟିଏ ପଟେ ଜଟଣୀ ବ୍ଲକର ପଣ୍ଡିଆବିଲି ପଞ୍ଚାୟତର ଅନେକ ଗ୍ରାମ ଥିବା ବେଳେ ଅନ୍ୟପଟେ ପୁରୀ ଜିଲ୍ଲା ସୀମାନ୍ତ ପିପିଲି ଓ ଡେଲାଙ୍ଗ ବ୍ଲକର ଜୋରକଣି ଏବଂ ଚାରିପଡା ଅଞ୍ଚଳ । ବର୍ଷକର ଆଠମାସ ଏହି ସମସ୍ତ ଅଞ୍ଚଳର ଲୋକେ ଏକ ଦେଶୀ ଡଙ୍ଗାରେ ଯିବା ଆସିବା କରୁଛନ୍ତି । ଖାଲି ଏତିକି ନୁହେଁ ଛାତ୍ରଛାତ୍ରୀ ମଧ୍ୟ ବିପଦରେ ଜୀବନକୁ ବାଜି ଲଗାଇ ସ୍କୁଲ କଲେଜ ଯିବା ଆସିବା କରୁଛନ୍ତି ।
ରାଜଧାନୀରୁ ଅଳ୍ପ କେଇ ବାଟରେ ଅବସ୍ଥିତ ଏହି ଅଞ୍ଚଳରେ ଆଜି ପର୍ଯ୍ୟନ୍ତ ପୋଲଟିଏ ନହେବା ପ୍ରଶାସନର ପାରିବା ପଣିଆକୁ ନେଇ ପ୍ରଶ୍ନ ଉଠିଛି । ଲୋକେ ବାରମ୍ବାର ଅଭିଯୋଗ କରୁଥିଲେ ମଧ୍ୟ ଫଳ ଯଥା ପୂର୍ବଂ ତଥା ପରଂ । ଅବଶ୍ୟ ଗତ ନିର୍ବାଚନ ପୂର୍ବରୁ ରାଜନେତା ଓ ପ୍ରଶାସନ ଯୁଦ୍ଧକାଳୀନ ଭିତ୍ତିରେ ଏକ ଭଷା ପୋଲ ଓ ପରେ ସ୍ଥାୟୀ ପୋଲ ନିର୍ମାଣ କରିବାକୁ ପ୍ରତିଶ୍ରୃତି ଦେଇଥିଲେ।
କିନ୍ତୁ ନିର୍ବାଚନ ସରିଗଲା ପ୍ରତିଶ୍ରୃତି ମଧ୍ୟ ଲିଭିଗଲା । ଲୋକେ ଯେମିତି ଯାଉଥିଲେ ସେମିତି ମଧ୍ୟ ଯାଉଛନ୍ତି । ତେବେ ରାଜଧାନୀରେ ଥିବା ବାବୁଙ୍କ ନଜର କେବେ ଏହି ଲୋକଙ୍କ ଉପରେ ପଡିବ ଏବେ ତାକୁ ଅପେକ୍ଷା।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
