ଭୁବନେଶ୍ବର: କଏଦୀଙ୍କ ପାଇଁ ଖୁସି ଖବର । କାରଣ ଜେଲ ବିଭାଗ କରିବାକୁ ଯାଉଛି ବଡ ଧରଣର ପରିବର୍ତ୍ତନ । ଜେଲରେ ଦଣ୍ଡ ଭୋଗୁଥିବା କଏଦୀଙ୍କୁ ମିଳିବ ଏଟିଏମ କାର୍ଡ । କଏଦୀ ନିଜ ପ୍ରାପ୍ୟକୁ ଚାହିଁଲେ ପରିବାରକୁ ଦେଇପାରିବେ ବା ନିଜେ ଖର୍ଚ୍ଚ କରିପାରିବେ ।
ଏଥିପାଇଁ ପ୍ରସ୍ତୁତ ହେଉଛି ଯୋଜନା । ଜେଲ ଡିଜି ସତ୍ୟଜିତ ମହାନ୍ତିଙ୍କ ସୂଚନା ଅନୁସାରେ ଜେଲରେ ବନ୍ଦୀ ଜୀବନ ବିତାଉଥିବା କଏଦୀଙ୍କୁ ବିଭିନ୍ନ କାମ ବାବଦରେ ପାରିଶ୍ରମିକ ମିଳିଥାଏ । ଏହି ପାରିଶ୍ରମିକ ଅର୍ଥ ସିଧାସଳଖ କଏଦୀଙ୍କୁ ଦିଆଯାଇଥାଏ । କିନ୍ତୁ ଏହି ଅର୍ଥ ଏବେ କଏଦୀଙ୍କ ବ୍ୟାଙ୍କ ଜମାଖାତାରେ ଜମା କରାଯିବ । ଯାହାର ଏଟିଏମ କାର୍ଡ ମଧ୍ୟ ମିଳିବ । ଯଦି କଏଦୀ ଚାହିଁବେ ଏଟିଏମ କାର୍ଡକୁ ନିଜ ପରିବାର ବର୍ଗଙ୍କୁ ଦେଇପାରିବେ । ନଚେତ ନିଜ ପାଖରେ ରଖି ଜେଲରେ ଥିବା କ୍ୟାଣ୍ଟିନରୁ ପ୍ରସାଧନ ସାମଗ୍ରୀ ସହ ବିଭିନ୍ନ ଖାଦ୍ୟ ସାମଗ୍ରୀ କିଣିପାରିବେ । ଏଥିପାଇଁ ଜେଲ କର୍ତ୍ତୃପକ୍ଷ ବ୍ୟାଙ୍କ ସହ କଥାବାର୍ତ୍ତା ଶେଷ କରିଛନ୍ତି । ଖୁବଶୀଘ୍ର ଏହା କାର୍ଯ୍ୟକାରୀ ହେବ ବୋଲି ଡିଜି କହିଛନ୍ତି ।
ବର୍ତ୍ତମାନ କଏଦୀ ନିଜ ଟଙ୍କା ପାଖରେ ରଖୁଛନ୍ତି । କୌଣସି ସାମଗ୍ରୀ କିଣିବା ପାଇଁ ଚାହିଁଲେ ଜେଲରଙ୍କୁ ଟଙ୍କା ଦେଇ କୁପନ ନେଇଥାନ୍ତି । ଅଥବା ପରିବାର ଲୋକ ଆସିଲେ କିମ୍ବା ପୋଷ୍ଟ ଅଫିସ ସାହାଯ୍ୟରେ ଘରକୁ ପଠାଇଥାନ୍ତି । ଏହି ବ୍ୟବସ୍ଥା ଆରମ୍ଭ ହେଲେ ଯେଉଁ କଏଦୀଙ୍କ ପରିବାର ବର୍ଗ କଏଦୀଙ୍କ ରୋଜଗାର ଉପରେ ନିର୍ଭର ଥିବେ ସେମାନେ ଉପକୃତ ହୋଇପାରିବେ ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
