ଭୁବନେଶ୍ବର: ସୋମବାର ରାୟଗଡ଼ା ସ୍ବାଧୀନ ବିଧାୟକ ମକରନ୍ଦ ମୁଦୁଲି ନିଜର ସମର୍ଥକଙ୍କ ସହ ନବୀନ ନିବାସ ଆସିଥିଲେ । ଆଉ ଏହାପରେ ଆରମ୍ଭ ହୋଇଯାଇଥିଲା ଜୋରଦାର ଚର୍ଚ୍ଚା । କଂସାରୀଗୁଡ଼ାରେ ହେବାକୁ ଥିବା ପ୍ଲାଣ୍ଟ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଧନ୍ୟବାଦ ଦେବାକୁ ଆସିଥିବା ନେଇ ମକରନ୍ଦ କହିଛନ୍ତି ।
ଅଞ୍ଚଳର ବିକାଶ ହେବାକୁ ହେଲେ ସରକାରଙ୍କ ସହ ରହିବାକୁ ହେବ; ମକରନ୍ଦ ମୁଦୁଲି
ନବୀନ ନିବାସରୁ ବାହାରିବା ପରେ ମକରନ୍ଦ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ସ୍ବାଧୀନ ବିଧାୟକ ଓଡ଼ିଶା ତଥା ନିଜ ଅଞ୍ଚଳ ପାଇଁ କ’ଣ କରିପାରିବ। ନିଜ ଅଞ୍ଚଳର ବିକାଶ କରିବାକୁ ହେଲେ ସରକାରଙ୍କ ସହଯୋଗ ଏକାନ୍ତ ଆବଶ୍ୟକ। ଏବେ ମୁଁ ରାଜ୍ୟ ସରକାରଙ୍କ ସହିତ ଅଛି, ଦଳ ସହିତ ନାହିଁ ବୋଲି କହିଛନ୍ତି ମକରନ୍ଦ ।
ଏହା ସହ ଆଗକୁ ରାଜ୍ୟସଭା ନିର୍ବାଚନ ଥିବାରୁ ବିଜେଡିକୁ ସମର୍ଥନ କରିବେ କି ପ୍ରଶ୍ନରେ ସେ କହିଛନ୍ତି ଯେ, 'ସମୟ ଆସିଲେ ନିଷ୍ପତ୍ତି ନେବି'। ବର୍ତ୍ତମାନ ମୁଁ ସରକାରରେ ରହିଛି। ସରକାର ଯୁଆଡ଼େ, ଆମେ ସିଆଡ଼େ ବୋଲି ସେ କହିଛନ୍ତି ।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
