ଭୁବନେଶ୍ବର: ଏଥର ଦୁର୍ଗାପୂଜା ବିସର୍ଜନକୁ ପ୍ରଦୂଷଣ ମୁକ୍ତ କରିବା ପାଇଁ ବିଏମସି ପକ୍ଷରୁ ନିଆଯାଇଛି ନୂତନ ପଦକ୍ଷେପ । ବିସର୍ଜନ ପାଇଁ ବିଏମସି ପ୍ରଦୂଷଣ କଣ୍ଟ୍ରୋଲ ବୋର୍ଡ଼ ୪ଟି କୁତ୍ରିମ ପୋଖରୀ ତିଆରି କରିଛି । ଭୁବନେଶ୍ବର କଟକକୁ ସଂଯୋଗ କରୁଥିବା କୁଆଖିଆ ନଦୀ ବ୍ରିଜ ଏବଂ ଭୁବନେଶ୍ବର ପୁରୀ ରାସ୍ତାରେ ଦୟା ନଦୀ ବ୍ରିଜର ଉଭୟ ପାର୍ଶ୍ବରେ ଦୁଇଟି କୁତ୍ରିମ ପୋଖରୀ ନିର୍ମାଣ କରାଯାଇଛି ବୋଲି ସୂଚନା ଦେଇଛନ୍ତି ବିଏମସି ସିଟି ଇଞ୍ଜିନିୟର ଦେବ ସୁନ୍ଦର ମହାପାତ୍ର ।
ଭସାଣି ସମୟରେ ରାତି ତମାମ ବିଏମସି ଅଧିକାରୀ ପରିଚାଳନା କରିବେ । ଏସ୍କ୍ବାଭେଟର ମାଧ୍ୟମରେ ବିସର୍ଜିତ ମୂର୍ତ୍ତିର କୁଟା, ରଙ୍ଗ ପାଣିକୁ ସୈନିକ ସ୍କୁଲ ପାଖ ଟିଟିଏସ କେନ୍ଦ୍ରକୁ ପଠାଯିବ । ଅକ୍ଟୋବର ୫ ରୁ ମା’ ଦୁର୍ଗାଙ୍କର ସପ୍ତମୀ ପୂଜା ଆରମ୍ଭ ହୋଇଛି ଓ ୯ ତାରିଖରେ ଭସାଣି ହେବ। ଏଥର ଭସାଣିକୁ ସୁବ୍ୟବସ୍ଥିତ କରିବା ପାଇଁ କମିଶନରେଟ ପୋଲିସ ପକ୍ଷରୁ ପଦକ୍ଷେପ ଗ୍ରହଣ କରାଯାଇଥିବାବେଳେ ବିଏମସି ପକ୍ଷରୁ ମଧ୍ୟ ଦୁର୍ଗାଙ୍କ ଭସାଣି ପାଇଁ ନିଆରା ପ୍ରୟାସ କରାଯାଇଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
