ଭୁବନେଶ୍ବର: ଡେଡ଼ଲାଇନ ସରିବା ପରେ ଆରମ୍ଭ ହେଲା କାର୍ଯ୍ୟାନୁଷ୍ଠାନ। ରାଜଧାନୀର ବେଆଇନ କଲ୍ୟାଣମଣ୍ଡପରେ ପଡିଲା ତାଲା । ବିଏମସି ପକ୍ଷରୁ ୩ଟି ଜୋନରେ ପ୍ରଥମ ଦିନରେ ୮ଟି ବେଆଇନ କଲ୍ୟାଣମଣ୍ଡପକୁ ସିଲ୍ କରାଯାଇଛି। ନର୍ଥ ଜୋନରେ ପଟିଆ ସ୍ଥିତ ଋଷି ରିସର୍ଚ୍ଚ, ସାମନ୍ତପୁରରେ ପଣ୍ଡିତ ନୀଳକଣ୍ଠ ଲାଇବ୍ରେରୀ ଏବଂ ଇନଫରମେସନ ସାଇନ୍ସ କଲେଜ, ସାମନ୍ତପୁର ଗଜପତି ନଗରରେ ଆତ୍ମାରାମ ମଣ୍ଡପ, ସୈନିକ ସ୍କୁଲ ନିକଟସ୍ଥ ଜେବି ବିବାହ ମଣ୍ଡପକୁ ସିଲ୍ କରାଯାଇଛି ।
ପ୍ରେସଛକରେ ଥିବା ଆରସିଏମ ମାର୍କେଟ କମ୍ପ୍ଲେକ୍ସ, ବିଏମସି ସାଉଥ ଇଷ୍ଟ ଜୋନରେ ସହିଦ ନଗରରେ ଥିବା ପାଲାଡିୟମ କୋର୍ଟୟାର୍ଡ କଲ୍ୟାଣମଣ୍ଡପ, ସାଉଥୱେଷ୍ଟ ଜୋନ ଖଣ୍ଡଗିରି ଠାରେ ସାଇ ଗାର୍ଡେନ ଏବଂ ବରମୁଣ୍ଡାରେ ଚନ୍ଦନ ଲଜକୁ ସିଲ୍ କରିଛି ବିଏମସି । ଏଥିରେ ବିଏମସି , ବିଡିଏ ସ୍କ୍ବାଡ ଓ ପୋଲିସ ଉପସ୍ଥିତିରେ ମଣ୍ଡପକୁ ସିଲ୍ କରାଯାଇଛି।
ପୂର୍ବରୁ ୯୪ଟି ବେଆଇନ କଲ୍ୟାଣ ମଣ୍ଡପକୁ ହୋଇଥିଲା ନୋଟିସ। ଜାନୁଆରୀ ୩୧ ତାରିଖ ସୁଦ୍ଧା ସେମାନଙ୍କର ସମସ୍ତ ପ୍ରକାର ଆବଶ୍ୟକୀୟ ଅନୁମୋଦନ ନେବା ସହ ଏହାକୁ ବିଏମସିରେ ଦାଖଲ କରିବାକୁ ନିର୍ଦ୍ଦେଶ ଦିଆଯାଇଥିଲା । ପାର୍କିଂ ସ୍ଥାନ, ଅଗ୍ନି ନିର୍ବାପକ ବ୍ୟବସ୍ଥା, ଟ୍ରେଡ଼ ଲାଇସେନ୍ସ ଆଦି ବ୍ୟବସ୍ଥା ତୁରନ୍ତ ନିୟମିତ କରିବାକୁ ନିର୍ଦ୍ଦେଶ ଦିଆଯାଇଥିଲା।
ହେଲେ ଏବେ ବିବାହ ସିଜିନ ଚାଲିଥିବାରୁ, ବିଭିନ୍ନ କଲ୍ୟାଣ ମଣ୍ଡପକୁ ବୁକିଂ କରିଥିବା ଜନସାଧାରଣ ଏବେ ନାହିଁ ନଥିବା ଅସୁବିଧାର ସମ୍ମୁଖୀନ ହେବାକୁ ଯାଉଛନ୍ତି । ସୋମବାର ୩ଟି ଜୋନର ଜୋନାଲ ଡେପୁଟି କମିଶନରଙ୍କ ଦ୍ବାରା ସିଲ୍ ପ୍ରକ୍ରିୟା ଆରମ୍ଭ ହୋଇଛି।
ବିଏମସି ସାଉଥ ଇଷ୍ଟ ଜୋନର ଡେପ୍ୟୁଟି କମିଶନର ରୂପକ ପଟ୍ଟନାୟକଙ୍କ ସୂଚନା ଅନୁସାରେ ସୋମବାର ପୋଲିସ ସହାୟତରେ ସହିଦ ନଗରରେ ଥିବା ବେଆଇନ ପାଲାଡିୟମ କୋର୍ଟୟାର୍ଡ ମଣ୍ଡପକୁ ସିଲ୍ କରାଯାଇଛି।
ପର୍ଯ୍ୟାୟକ୍ରମେ ଏହି ସିଲ୍ ପ୍ରକ୍ରିୟା ଜାରି ରହିବ। ଯେଉଁମାନେ ପାର୍କିଂ ବ୍ୟବସ୍ଥା, ଅଗ୍ନିଶମ ବ୍ୟବସ୍ଥା, ବିଭିନ୍ନ ପ୍ରକାରର ଏନଓସି, ଲାଇସେନ୍ସ କରିନାହାଁନ୍ତି ସେମାନଙ୍କ ମଣ୍ଡପ ସିଲ୍ କରାଯିବ।
ଭୁବନେଶ୍ବରରେ ବିଭିନ୍ନ କଲ୍ୟାଣମଣ୍ଡପରେ ଆବଶ୍ୟକୀୟ ପାର୍କିଂ ବ୍ୟବସ୍ଥା ନଥିବାରୁ ପାର୍କିଂ ଜନିତ ସମସ୍ୟା ମୁଣ୍ଡବିନ୍ଧାର କାରଣ ସାଜିଛି । ଏ ସିଲ୍ ପ୍ରକ୍ରିୟା କେତେ ଜୋରଦାର ହେଉଛି ତାହା ସମୟ କହିବ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
