ଭୁବନେଶ୍ବର: ମୁଁ କିଛି ଭୁଲ କହିନାହିଁ । ଯଦି କହିଥାଏ, ତାହାଲେ ଏଥିପାଇଁ କ୍ଷମା ମାଗିବାକୁ ପ୍ରସ୍ତୁତ ଅଛି । ଏହା କହିଛନ୍ତି ବିରୋଧି ଦଳ ନେତା ପ୍ରଦୀପ୍ତ ନାୟକ । ରାଜ୍ୟରେ ହିତାଧିକାରୀଙ୍କୁ ମିଳୁଥିବା କିରାସିନି କୋଟାକୁ ନେଇ ଗୃହରେ ନିଜର ପ୍ରତିକ୍ରିୟା ରଖିଥିଲେ ବିରୋଧି ଦଳ ନେତା । ଏହାକୁ ନେଇ ଦେଖା ଦେଇଥିଲା ବିବାଦ ।
ଏ ପ୍ରସଙ୍ଗରେ ଶୂନ୍ୟକାଳରେ ସ୍ବାଧୀକାର ଭାଙ୍ଗ ନୋଟିସ ଆଣିଲେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର । କିରାସିନି କୋଟାକୁ ନେଇ ଉଭୟ ବିରୋଧୀ ଦଳ ନେତା ଓ ଯୋଗାଣ ମନ୍ତ୍ରୀ ଗୃହକୁ ବିଭ୍ରାନ୍ତି କର ତଥ୍ୟ ଦେଇଛନ୍ତି ବୋଲି କହିଛନ୍ତି ସେ । ଗତକାଲି ବିରୋଧୀ ଦଳର ନେତା କହିଥିଲେ ଯେ, କିରାସିନି କଳାବଜାରୀ ହେଉଛି । ଯେଉଁମାନେ କିରୋସିନ ନେଉ ନାହାନ୍ତି ତାହା ଯାଉଛି କୁଆଡେ? ଏହାପଛରେ ଶାସକ ଦଳର ବିଧାୟକ ରହିଥିବାର କହିଥିଲେ ।
ଏହାକୁ ନେଇ ନରସିଂହ ମିଶ୍ର ଆପତ୍ତି ଉଠାଇବା ଏହାକୁ ବିଧାନସଭାର ସ୍ବାଧୀକାର କମିଟିକୁ ପଠାଯାଉ ବୋଲି କହିଥିଲେ । କମିଟି ନିଷ୍ପତ୍ତି ନେବ କିଏ ଠିକ । ଆଉ ଯିଏ ଦୋଷୀ ତାଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ନିଆଯିବ । ଏନେଇ ଅନୁଧ୍ୟାନ କରାଯିବ ବୋଲି କହିଛନ୍ତି ବାଚସ୍ପତି । ଅନ୍ୟପକ୍ଷରେ ବିରୋଧୀ ଦଳର ନେତା ପ୍ରଦୀପ୍ତ ନାଏକ କହିଛନ୍ତି, ବିଭାଗ କଳାବଜାରୀକୁ ପ୍ରୋତ୍ସାହିତ କରୁଛି । ହେଲେ ବିଧାୟକଙ୍କୁ ଏପରି କହିବା ମୋର ଉଦ୍ଦେଶ୍ୟ ନଥିଲା ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
