ଭୁବନେଶ୍ବର: ସ୍ମାର୍ଟସିଟି ଭୁବନେଶ୍ବର ଲୋକଙ୍କୁ କେତେ ପସନ୍ଦ ? ଏବେ ରେଟିଂ କରି ଜଣାଇବେ ରାଜଧାନୀବାସୀ । ୨୧ଟି ମାନଦଣ୍ଡକୁ ନେଇ ବିଏମସି ଜନସାଧାରଣଙ୍କ ଠାରୁ ଲୋଡିଛି ମତାମତ । ଶିକ୍ଷା, ସ୍ବାସ୍ଥ୍ୟ, ଗମନାଗମନ, ପାନୀୟ ଜଳ ବ୍ୟବସ୍ଥା, ପରିମଳ ବ୍ୟବସ୍ଥା,ବିଦ୍ୟୁତ ସରବରାହ, ଡ୍ରେନେଜ ବ୍ୟବସ୍ଥା, ମହିଳା ସୁରକ୍ଷା, ସହରର ସ୍ବଚ୍ଛତା, ଜଳବନ୍ଦୀ ସମସ୍ୟା, ସୁଗମ ଚଳଣି ପାଇଁ ଆୟ, ସବୁଜିମା ସହର, ବ୍ୟାଙ୍କର ସ୍ମାର୍ଟ କାରବାର ବ୍ୟବସ୍ଥା ନେଇ ଲୋକେ ନିଜର ମତାମତ ଦେବେ । ଏହି ମତାମତ ପ୍ରକ୍ରିୟା ଚଳିତ ମାସ ୨୯ ପର୍ଯ୍ୟନ୍ତ ଚାଲିବ ।
ଗୁରୁବାର ଭୁବନେଶ୍ବର ମହାନଗର ନିଗମର କମିଶନର ପ୍ରେମଚନ୍ଦ୍ର ଚୌଧୁରୀଙ୍କ ଅଧ୍ୟକ୍ଷତାରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଛି । କେଉଁ ସହରରେ ରହିବା କେତେ ସହଜ, କେନ୍ଦ୍ର ସରକାରଙ୍କ ସହରାଞ୍ଚଳ ବିକାଶ ବିଭାଗ ପକ୍ଷରୁ ଇଜ ଅଫ ଲିଭିଙ୍ଗ ଇନଡେକ୍ସକୁ ନେଇ ଭଲ ମତାମତ ଲୋଡା ଯାଇଛି । ଦେଶରେ ଭୁବନେଶ୍ବର ଯଶଖ୍ୟାତିକୁ ଶୀର୍ଷରେ ପହଞ୍ଚାଇବା ପାଇଁ ସହରବାସୀଙ୍କ ଜୀବନଶୈଳୀ ବ୍ୟବସ୍ଥା କଣ ? ସେ ନେଇ ରାଜଧାନୀବାସୀଙ୍କୁ ନିଜର ବହୁମୂଲ୍ୟ ମତାମତ ଦେବାକୁ ଅନୁରୋଧ କରିଛନ୍ତି ସେ ।
ଏପଟେ ସହରର ସ୍ବଚ୍ଛତା, ପାନୀୟ ଜଳ ଯୋଗାଇବାରେ ବିଏମସି ବିଫଳ ହୋଇଥିବା ନେଇ କେତେକ ଭୁବନେଶ୍ବରବାସୀ ମତ ଦେଇଛନ୍ତି । ଅନ୍ୟପଟେ କେନ୍ଦ୍ର ସହରାଞ୍ଚଳ ବିକାଶ ମନ୍ତ୍ରାଳୟ ପକ୍ଷରୁ ଦେଶରେ ୧୦୦ଟି ସ୍ମାର୍ଟସିଟି ଭିତରେ ଏହି ପ୍ରତିଯୋଗିତା କରାଯାଉଛି । ପରେ ମୂଲ୍ୟାୟନ କରାଯାଇ ମନ୍ତ୍ରାଳୟ ପକ୍ଷରୁ କୃତି ପ୍ରତିଯୋଗୀଙ୍କୁ ପୁରସ୍କୃତ କରାଯିବାର ବ୍ୟବସ୍ଥା ରହିଛି ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
