ଭୁବନେଶ୍ବର: ସାରା ରାଜ୍ୟରେ ଚତୁର୍ଦ୍ଧାବିଗ୍ରହଙ୍କ ବାହୁଡା ଯାତ୍ରା ଶାନ୍ତିଶୃଙ୍ଖଳା ସହ ସମ୍ପନ୍ନ ହୋଇଛି । ଗୋଟିଏ ପଟେ ଶ୍ରୀଗୁଣ୍ଡିଚା ଶ୍ରୀହିନ ହୋଇପଡିଥିବାବେଳେ ଶ୍ରୀଜିଉଙ୍କୁ ପୁଣି ଥରେ ଦେଉଳରେ ପାଇ ଚଳଚଞ୍ଚଳ ଶ୍ରୀମନ୍ଦିର । ସେପଟେ ରାଜଧାନୀରେ କୁନି ପିଲାଙ୍କ ସହ ରଥରେ ଶ୍ରୀମନ୍ଦିର ବାହୁଡିଛନ୍ତି ମହାବାହୁ । କୁନି କୁନି ପିଲାଙ୍କ ଦ୍ବାରା ଏଠାରେ ରଥଟଣା ହୋଇଥାଏ ।
ଦୀର୍ଘ 14 ବର୍ଷ ଧରି ପୁରୁଣା ଭୁବନେଶ୍ବରର ବିଭିନ୍ନ ସାହିର ଲୋକଙ୍କ ସହାୟତାରେ ଆୟୋଜିତ ହୋଇଆସୁଛି ଏହି ରଥଯାତ୍ରା । ରୀତିନୀତି ଅନୁସାରେ ମହାପ୍ରଭୁଙ୍କ ସମସ୍ତ କାର୍ଯ୍ୟ ସମ୍ପନ୍ନ ହୋଇଥାଏ । ଛୋଟ ଛୋଟ ପିଲାଙ୍କ ଦ୍ବାରା ନିର୍ମିତ ରଥରେ ଶ୍ରୀଜିଉ ଜମ୍ବେଶ୍ୱର ପାଟଣାରୁ ଗଙ୍ଗାଯମୁନାରେ ଥିବା ମାଉସୀ ମା ଘରକୁ ଯାଇଥିଲେ । ନବଦିନାତ୍ମକ ରହଣ ପରେ ଆଜି ପୁଣି ନିଜ ସ୍ଥାନକୁ କୁନି କୁନି ଶ୍ରଦ୍ଧାଳୁଙ୍କ ଦ୍ୱାରା ବାହୁଡ଼ିଛନ୍ତି ।
କୁନି କୁନି ପିଲାଙ୍କ ଦ୍ୱାରା ପରିଚାଳିତ ଏହି ଯାତ୍ରାରେ ଶ୍ରଦ୍ଧାଳୁମାନେ ମଧ୍ୟ ଯୋଗଦେଇ ରଥ ଟାଣିବା ସହିତ ମହାପ୍ରଭୁଙ୍କ ଆଶିଷ ଲାଭ କରୁଥିଲେ । ପିଲାମାନଙ୍କ ଦ୍ୱାରା ପରିଚାଳିତ ଏହି ରଥଯାତ୍ରାର ମୁଖ୍ୟ ଉଦ୍ୟୋକ୍ତା ବସନ୍ତ କୁମାର ସମର୍ଥାଙ୍କ ଅନୁସାରେ ଶ୍ରୀକ୍ଷେତ୍ର ସାଆନ୍ତଙ୍କ ରୀତିନୀତି ଅନୁସାରେ ଏଠାରେ ମଧ୍ୟ ସବୁ ରୀତିନୀତି ବିଧି ଅନୁସାରେ ପାଳିତ ହୋଇଥାଏ । ଯେଉଁଥିରେ ଆଖପାଖ ସାହିର ଶିଶୁମାନେ ମୁଖିଆ ହିସାବରେ ଯୋଗ ଦେଇଥାନ୍ତି । ସେମାନଙ୍କୁ ସାହିର ବରିଷ୍ଠ ଲୋକମାନେ ସହଯୋଗ କରିଥାନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
