ଭୁବନେଶ୍ୱର: ଖଣ୍ଡଗିରି ପାଦଦେଶରେ ଆରମ୍ଭ ହୋଇଛି ମାଘ ସପ୍ତମୀ ମେଳା ବା ଅନନ୍ତ କେଶରୀଙ୍କ ଯାତ୍ରା । ଏହି ଯାତ୍ରା ପ୍ରତିବର୍ଷ ମାଘ ସପ୍ତମୀ ଠାରୁ ପୂର୍ଣ୍ଣିମା ପର୍ଯ୍ୟନ୍ତ ଅନୁଷ୍ଠିତ ହୋଇଥାଏ । ହେଲେ ଚଳିତ ବର୍ଷ କୋଭିଡ ଗାଇଡ଼ଲାଇନ ଭିତରେ ଅର୍ଥନୀତି ନୁହେଁ କେବଳ ପରମ୍ପରା ରକ୍ଷା ପାଇଁ ଖଣ୍ଡଗିରି କୁମ୍ଭ ମେଳା କରଯାଉଛି । ଏହା ୯ ଦିନ ଧରି ଚାଲିବାକୁ ଥିବା ବେଳେ ଅନନ୍ତ କେଶରୀ ଜାଗମରା ନାଗା ମଠରୁ ଆସି ଖଣ୍ଡଗିରି ରାଣିହଂସପୁରକୁ ବିଜେ କରିଥାନ୍ତି ଓ ପୂଜା ପାଇଥାନ୍ତି ।
ଏଥିରେ ରାଜ୍ୟ ତଥା ରାଜ୍ୟ ବାହାରୁ ସାଧୁ ସନ୍ଥଙ୍କ ସମାଗମ ଦେଖିବାକୁ ମିଳିଛି । ସନ୍ଥମାନେ ଦେଶର ବିଭିନ୍ନ ପ୍ରାନ୍ତରୁ ଆଗମନ କରି ଜପତପ ସହ ଯଜ୍ଞ କରୁଥିବା ବେଳେ ହରିନାମ ଓ ରାମ ନାମ ଭଜନ କୀର୍ତ୍ତନରେ କମ୍ପୁଛି ଖଣ୍ଡଗିରି ପାଦଦେଶ । କାରଣ ବିଶ୍ୱାସ ରହିଛି ଏଠାରେ କଣ୍ଡଖିରୀ ସେବନ କରି ଜପତପ କରିବା ଦ୍ୱାରା ଆତ୍ମାକୁ ଶାନ୍ତି ମିଳେ ଓ ରୋଗ ଦୁରେଇ ଯାଏ । ତେଣୁ, ବିଶ୍ୱର ମଙ୍ଗଳ ପାଇଁ ଏଠାରେ ଅନେକ ସାଧୁସଂନ୍ଥ ଏକାଠି ହୋଇଥାନ୍ତି ଆଉ ଯଜ୍ଞ କରିଥାନ୍ତି ।
କିନ୍ତୁ, ଚଳିତ ବର୍ଷ କୋଭିଡ କଟକଣା ଭିତରେ ଏହା ଅନୁଷ୍ଠିତ ହେଉଉଥିବାରକୁ କେବଳ ଘଣ୍ଟ ଘଣ୍ଟା ସହ ଠାକୁର ଅନନ୍ତ କେଶରୀଙ୍କ ଶୋଭାଯାତ୍ରା କରାଯିବ । ଏପରିକି ଚଳିତ ବର୍ଷ ଆତଶବାଦି ଫୁଟିବା ଉପରେ ରୋକ ଲାଗିଥିବା ବେଳେ ସାଧୁଙ୍କ ସତସଙ୍ଗ ଓ ପ୍ରବଚନକୁ ମଧ୍ୟ ବାରଣ କରାଯାଇଛି । ଏପରିକି ଭିଡକୁ ନିୟନ୍ତ୍ରଣ କରିବାକୁ ଦୋକାନ ବଜାରର ମଧ୍ୟ ପସରା ଦେଖିବାକୁ ମିଳିନି । ଏହାରି ଭିତରେ ପରମ୍ପରା ଅନୁଯାୟୀ କେବଳ ପୂଜାବିଧିକୁ ଅନୁମତି ମିଳିଛି । ତେଣୁ, ଆଜିଠାରୁ ୯ ଦିନ ଧରି ଅର୍ଥାତ ପୂର୍ଣ୍ଣିମା ପର୍ଯ୍ୟନ୍ତ ଏହି ମେଳା ଅନୁଷ୍ଠିତ ହେବ । ପୂଜାରେ ଖଣ୍ଡଗିରି ଅଧିଷ୍ଠାତ୍ରୀ ଦେବୀ ମା’ ବାରଭୁଜନଙ୍କ ନିକଟରେ ଅଖଣ୍ଡ ଦୀପ ଜାଳିବା ସହ ହନୁମାନଙ୍କ ମନ୍ଦିରରେ ରାମ ଚରିତ ମାନସ ୯ ଦିନ ବ୍ୟାପି କରାଯିବ । ଶେଷ ଦିନ ପୁର୍ଣ୍ଣ ଆହୁତି ସହ ସମ୍ପନ ହେବ ଯାତ୍ରା । ହେଲେ କରୋନା ପାଇଁ ସାଧୁ ମାନଙ୍କ ଭିଡ ଆଗଭଳି ସେତେଟା ନଥିବାରୁ ପୂଜା ପାଠର କୋଳାହଳ ନାହିଁ ସତ ତଥାପି ବିଶ୍ୱ ଶାନ୍ତିର କାମନା କରି ଜପତପ ସହ ଯଜ୍ଞ କରି ବେଶ ଖୁସି ଅଛନ୍ତି ସାଧୁସନ୍ଥ
।
ଅନ୍ୟପଟେ ବିଏମ୍ସିର କୋଭିଡ ଗାଇଡଲାଇନକୁ ନଜରରେ ରଖି କେବଳ ପୂଜାକୁ ଅନୁମତି ଦେଇଥିବା ବେଳେ ଦୋକାନ ବଜାର ଓ ଯାତ୍ରାକୁ ଅନୁମତି ମିଳିନି । ଯାହାକୁ ନେଇ ବ୍ୟବସାୟୀ ଓ ଯାତ୍ରା କଳକାର ହତାଶ ହୋଇଛନ୍ତି ବୋଲି ଆୟୋଜକ କହିଛନ୍ତି । କାରଣ ଏହା ସେମାଙ୍କ ଅର୍ଥନୀତିକୁ ସୁଦୃଢ କରିଥାଏ । ଏପରିକି ପୂର୍ବ ଭଳି ବିଭିନ୍ନ ପ୍ରକାରର ଦୋକାନର ପସରା ମେଲି ନଥିବା, ଯାତ୍ରାର ସଜସଜା ଓ ପରିବେଷଣ ନଥବାରୁ ଲୋକ ଗହଳି ହେଉନଥିବା କହିଛନ୍ତି ଆୟୋଜକ ।
ଭୁବନେଶ୍ୱରରୁ ଦେବଶ୍ମିତା ରାଉତ, ଇଟିଭି ଭାରତ
