ଭୁବନେଶ୍ବର: ରୋଗୀଙ୍କ ପାଇଁ ଉନ୍ନତ ମାନର ରନ୍ଧା ଖାଦ୍ୟ ଯୋଗାଇବ କ୍ୟାପିଟାଲ ହସ୍ପିଟାଲ । ହସ୍ପିଟାଲରେ ଉନ୍ନତ ଧରଣର ରନ୍ଧାଖାଦ୍ୟ ପାଇଁ ସରକାରଙ୍କୁ ପ୍ରସ୍ତାବ ଦେଇଛନ୍ତି ହସ୍ପିଟାଲ କର୍ତ୍ତୃପକ୍ଷ ।
ରୋଗୀ ପିଛା 45 ଟଙ୍କା (ସରକାରୀ ଅର୍ଥ)ରେ ତିନି ଥର ଦିନକୁ ଦିଆଯାଉଥିବା ରନ୍ଧା ଖାଦ୍ୟକୁ ନେଇ କିଭଳି ଉନ୍ନତ ମାନର ଖାଦ୍ୟ ଦିଆଯିବ ସେ ନେଇ ଯୋଜନା ଚାଲିଛି । ଏହାକୁ ନେଇ ସରକାର ଅବଗତ ଥିବାବେଳେ ରନ୍ଧା ଖାଦ୍ୟ ଉପରେ ଦର ଧାର୍ଯ୍ୟ କରାଯାଇନାହିଁ ।
ସୂଚନା ଅନୁସାରେ ରାଜ୍ୟରେ ସମସ୍ତ ହସ୍ପିଟାଲରେ ରୋଗୀଙ୍କୁ ମାଗଣାରେ ରନ୍ଧା ଖାଦ୍ୟ ଦିଆଯାଉଛି । ଯାହା ଉନ୍ନତ ମାନର ଖାଦ୍ୟ ରହିଥିବା ବେଳେ କ୍ୟାପିଟାଲ ହସ୍ପିଟାଲରେ ଆହୁରି କିଭଳି ରୋଗୀମାନଙ୍କୁ ଉନ୍ନତ ମାନର ଖାଦ୍ୟ ଯୋଗାଇ ଦିଆଯିବ ସେନେଇ ସରକାରଙ୍କୁ ପ୍ରସ୍ତାବ ଦେଇଛନ୍ତି କ୍ୟାପିଟାଲ ହସ୍ପିଟାଲ କର୍ତ୍ତୃପକ୍ଷ । ରୋଗୀ ପିଛା ଦୈନିକ ଖାଦ୍ୟକୁ ନେଇ 45 ଟଙ୍କା(ସରକାରୀ ଅର୍ଥ) ଥିବାବେଳେ ଏହାକୁ ବଢାଇବା ପାଇଁ ପ୍ରସ୍ତାବ ରହିଛି । ପ୍ରସ୍ତାବ ଅନୁସାରେ ରୋଗୀ ପିଛା ୮୦, ୯୦ଓ ୧୦୦ ଟଙ୍କା ରଖାଯିବାକୁ ପ୍ରସ୍ତାବ ଦିଆଯାଇଛି ।
ଅନ୍ୟପଟେ ରାଜ୍ୟରେ କ୍ଷୀରର ଦର ବୃଦ୍ଧିକୁ ନେଇ ହସ୍ପିଟାଲ କର୍ତ୍ତୃପକ୍ଷ ଚିନ୍ତାରେ ପଡିଛନ୍ତି । ଯାହା 4 ଟଙ୍କା କମ କରିବାକୁ ହସ୍ପିଟାଲ ଅଧିକାରୀ ପ୍ରସ୍ତାବ ରଖିଛନ୍ତି । ଏହି ବିଷୟରେ ସରକାରଙ୍କ ସହ ଆଲୋଚନା କରି ଏକ ସମାଧାନର ରାସ୍ତା ବାହାର କରାଯିବ ବୋଲି କ୍ୟାପିଟାଲ ହସ୍ପିଟାଲର ନିର୍ଦେଶକ ଅଶୋକ ପଟ୍ଟନାୟକ କହିଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
